ଭୁବନେଶ୍ୱର : ପତ୍ନୀଙ୍କୁ ହତ୍ୟା କରିବା ଅଭିଯୋଗରେ ଭରତପୁର ଥାନା ପୁଲିସ ଅଭିଯୁକ୍ତ ସ୍ୱାମୀକୁ ଗିରଫ କରି ବୁଧବାର କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତ ହେଲା ଗଞ୍ଜାମର ସାଗର ପ୍ରଧନେ(୨୫) । ଅଭିଯୁକ୍ତର ଜାମିନ୍ ନାମଞ୍ଜୁର ହୋଇଯିବାରୁ ତାକୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।
ସୂଚନାନୁସାରେ, ଗିରଫ ଅଭିଯୁକ୍ତ ଜଣକ ମୃତ ମହିଳାଙ୍କୁ ୨୦୧୯ ମସିହାରେ ବିବାହ କରିଥିଲେ । ଅଭିଯୁକ୍ତ ଜଣକ ରଙ୍ଗ ମିସ୍ତ୍ରୀ ଭାବେ କାର୍ଯ୍ୟ କରୁଥିବା ବେଳେ ପତ୍ନୀ ଗୃହ କାର୍ଯ୍ୟ କରନ୍ତି । ଉଭୟଙ୍କର ଏକ ୧୮ମାସର ଶିଶୁ ପୁତ୍ର ମଧ୍ୟ ଅଛି । ଗତ ଦୁଇ ମାସ ତଳୁ ସେମାନେ ଅଭିଯୋଗକାରିଣୀଙ୍କ ଭରତପୁର ଥାନା ଅଞ୍ଚଳରେ ଥିବା ଏକ ଘରେ ଭଡାରେ ରହୁଥିଲେ । ପୂର୍ବରୁ ପତ୍ନୀଙ୍କ ଚରିତ୍ରକୁ ନେଇ ଉଭୟଙ୍କ ମଧ୍ୟରେ ନିୟମିତ ଭାବେ କଳିଝଗଡା ଲାଗିରହୁଥିଲା ।
ଘଟଣା ଦିନ ଅପରାହ୍ନରେ ଉଭୟଙ୍କ ମଧ୍ୟରେ ପୁନର୍ବାର ଝଗଡା ଆରମ୍ଭ ହେବା ସହିତ ଏହି ଝଗଡା କ୍ରମଶଃ ଗୁରୁତର ରୂପ ନେଇଥିଲା । ଏହି ସମୟରେ ଅଭିଯୁକ୍ତ ଜଣକ ଉତକ୍ଷିପ୍ତ ହୋଇ ପତ୍ନୀଙ୍କୁ ତଳେ ପକାଇ ଦେବା ସହିତ ତାଙ୍କ ବେକ ଚିପି ଜୀବନରୁ ମାରିଦେଇଥିଲେ । ଅଭିଯୋଗକାରିଣୀଙ୍କ ଅଭିଯୋଗ ଆଧାରରେ ଭରତପୁର ଥାନା ପୁଲିସ ମାମଲା ରୁଜୁ କରି ତଦନ୍ତ କରିବା ସହିତ ନିମ୍ନୋକ୍ତ ଅଭିଯୁକ୍ତଙ୍କୁ ଗିରଫ କରିଥିଲେ । ପଚରା ଉଚରା ବେଳେ, ଅଭିଯୁକ୍ତ ଜଣକ ନିଜ ଅପରାଧ ସ୍ୱୀକାର କରିଥିଲେ । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଚାଲୁ ରହିଛି ।
