ଗଞ୍ଜାମ : ରାତି ଅଧରେ ଶୋଇବା ଶେଯରେ ପତ୍ନୀଙ୍କୁ ଧାରୁଆ ଅସ୍ତ୍ରରେ ହାଣି ହତ୍ୟା କରିଛି ନିଷ୍ଠୁର ସ୍ୱାମୀ । ମୃତ ମହିଳା ଜଣକ ହେଲେ ରଶ୍ମିତା ଗୌଡ । ରଶ୍ମିତାଙ୍କୁ ତାଙ୍କ ସ୍ୱାମୀ କାହିଁକି ହତ୍ୟା କଲା ତାହାର ଖୋଳତାଡ ଆରମ୍ଭ କରିଛି ପୁଲିସ ।
ସୂଚନା ଅନୁଯାୟୀ, ଭଞ୍ଜନଗର ଥାନା ଅନ୍ତର୍ଗତ ଅଢେଇଗାଆଁର ଅନ୍ତର୍ଯ୍ୟାମୀ ଗୌଡ ଓରଫ ଡାକ ଶୋଇବା ଶେଯରେ ନିଜ ପତ୍ନୀ ରଶ୍ମିତାକୁ ଏକ ଧାରୁଆ ଅସ୍ତ୍ରରେ ମୁଣ୍ଡ ଓ ଦୁଇହାତକୁ ବାରମ୍ବାର ଆଘାତ କରିଥିଲେ । ପତ୍ନୀଙ୍କ ସମସ୍ତ ନେହୁରା ନିଷ୍ଠୁର ସ୍ୱାମୀଙ୍କ କାନକୁ ଶୁଭିନଥିଲା। ସେ ବାରମ୍ବାର ଚୋଟ ପରେ ଚୋଟ ପକାଇ ଚାଲିଥିଲା । ରଶ୍ମିତା ନିସ୍ତେଜ ହୋଇଯିବା ପରେ ଘଟଣାସ୍ଥଳରୁ ଫେରାର ହୋଇଯାଇଥିଲା । ଘଟଣା ଜଣାପଡିବା ପରେ ଗ୍ରାମବାସୀଙ୍କ ସହାୟତାରେ ରଶ୍ମିତାକୁ ତୁରନ୍ତ ଭଞ୍ଜନଗର ମେଡିକାଲରେ ଭର୍ତ୍ତି କରାଯାଇଥିଲା । ଏଠାରେ ଚିକିତ୍ସାଧୀନ ଅବସ୍ଥାରେ ରଶ୍ମିତାଙ୍କ ମୃତ୍ୟୁ ଘଟିଥିଲା ।
ଏନେଇ ମୃତ ରଶ୍ମିତାର ଭାଇ କୃଷ୍ଣଚନ୍ଦ୍ର ଗୌଡ ବେଲଗୁଣ୍ଠା ଫାଣ୍ଡିରେ ଏତଲା ଦେଇଥିଲେ । ବେଲଗୁଣ୍ଠା ଫାଣ୍ଡି ପୁଲିସ ଭଞ୍ଜନଗର ମେଡିକାଲରେ ପହଂଚି ଶବକୁ ଜବତ କରିବାସହ ଏକ ହତ୍ୟା ମାମଲା ରୁଜୁ କରିଛି । ଅଭିଯୁକ୍ତ ସ୍ୱାମୀ ଅନ୍ତର୍ଯ୍ୟାମୀଙ୍କୁ ଧରିବାକୁ ଛାନଭିନ୍ ଆରମ୍ଭ କରିଥିବା ଫାଣ୍ଡି ଅଧିକାରୀ ପ୍ରକାଶ ଚନ୍ଦ୍ର ସାହୁ ସୂଚନା ଦେଇଛନ୍ତି । ଏସମ୍ପର୍କରେ ଭଞ୍ଜନଗର ପୁଲିସ ମାମଲା ରୁଜୁ କରିଛି ।
ଫାଣ୍ଡି ଅଧିକାରୀଙ୍କ ସୂଚନା ପ୍ରକାରେ ହତ୍ୟାର ଶୀକାର ହୋଇଥିବା ରଶ୍ମିତାର ଭାଇ କୃଷ୍ଣଚନ୍ଦ୍ର ତା’ର ଭଉଣୀକୁ ସ୍ୱାମୀ ଅନ୍ତର୍ଯ୍ୟାମୀ ହତ୍ୟା କରିଥିବା ଉଲ୍ଲେଖ କରିଛନ୍ତି । ଏଥିରେ ରଶ୍ମିତାର ନଣନ୍ଦ ଓ ନଣନ୍ଦେଇ ଅନ୍ତର୍ଯର୍୍ୟାମୀକୁ ପ୍ରରୋଚିତ କରିଥିବା ଅଭିଯୋଗ ହୋଇଛି । ରଶ୍ମିତା ୧୬ବର୍ଷ ହେଲା ବାହା ହୋଇଥିଲେ ମଧ୍ୟ ସ୍ୱାମୀ ଅନ୍ତର୍ଯ୍ୟାମୀ ଅଧିକ ୫ଲକ୍ଷ ଟଙ୍କା ଯୌତୁକ ଆଣିବାକୁ ବାରମ୍ବାର ଧମକ ଦେଉଥିଲେ ବୋଲି କୃଷ୍ଣ ଏତଲାରେ ଦର୍ଶାଇଛନ୍ତି । ଏଭଳି ଘଟଣା ଅଢେଇଗାଆଁକୁ ସ୍ତବ୍ଧ କରିଦେଇଛି । ଫେରାର ସ୍ୱାମୀ ଗିରଫ ହେବା ପରେ ଘଟଣାର ବାସ୍ତବ ସତ୍ୟ ପଦାକୁ ଆସିବ ବୋଲି ଭଞ୍ଜନଗର ଥାନା ଅଧିକାରୀ ସୁଦୀପ୍ତ କୁମାର ସାହୁ ସୂଚନା ଦେଇଛନ୍ତି ।
ଶେଯରେ ପତ୍ନୀକୁ ହତ୍ୟାକଲା ସ୍ୱାମୀ
