ମୁମ୍ବାଇ : ମୁମ୍ବାଇରେ ବିଶାଳ ବିଲବୋର୍ଡ ଭାଙ୍ଗିବା ଘଟଣାରେ ମୃତ୍ୟୁ ସଂଖ୍ୟା ୧୬ରେ ପହଞ୍ଚିଛି। ଏନଡିଆରଏଫ ଟିମ୍ ଆଜି ସକାଳେ ଘଟଣାସ୍ଥଳରୁ ଆଉ ଦୁଇ ମୃତଦେହ ଉଦ୍ଧାର କରିଛନ୍ତି। ଏହି ଘଟଣାରେ ୭୪ ଜଣ ଆହତ ହୋଇଛନ୍ତି। ଗତ ସୋମବାର ଏହି ଅଘଟଣ ଘଟିଥିବା ବେଳେ ୩ ଦିନ ପରେ ବି ମୁଖ୍ୟ ଅଭିଯୁକ୍ତକୁ ଗିରଫ କରି ପାରିନି ପୁଲିସ୍ ।
ଏହି ଘଟଣାର ମୁଖ୍ୟ ଅଭିଯୁକ୍ତ ଏମ୍/ଏମ୍ ଏଗୋ ମିଡିଆ ଏଜେନ୍ସିର ମାଲିକ ଭାବେଶ ଭିଣ୍ଡେ ଫେରାର ହୋଇ ଯାଇଥିବା ବେଳେ ପୁଲିସ୍ ତାଙ୍କ ପତ୍ତା ପାଇ ପାରୁନି। ଯାଞ୍ଚ ସମୟରେ ଜଣାପଡ଼ିଛି ଭାବେଶ ଭିଣ୍ଡେ ଜଣେ ଅଭ୍ୟାସଗତ ଅପରାଧୀ। ତାଙ୍କ ନାମରେ ବଳାତ୍କାର ସମେତ ୨୩ଟି ମାମଲା ରୁଜୁ ହୋଇଛି। କିଛି ମାମଲାରେ ସେ ଜେଲ୍ ଯାଇଥିବା ବେଳେ ଜାମିନରେ ବାହାରକୁ ଆସିଥିବା ଜଣାଯାଇଛି। ଭବେଶ ଭିଣ୍ଡେ ୨୦୦୯ ମସିହାରେ ମହାରାଷ୍ଟ୍ର ବିଧାନସଭା ନିର୍ବାଚନରେ ସ୍ୱାଧୀନ ପ୍ରାର୍ଥୀ ଭାବେ ମଇଦାନକୁ ଓହ୍ଲାଇଥିଲେ। ମାତ୍ର ସେ ନିର୍ବାଚନ ହାରି ଯାଇଥିଲେ। ଉକ୍ତ ସମୟରେ ସେ ଦାଖଲ କରିଥିବା ସତ୍ୟପାଠରେ ତାଙ୍କ ନାଁରେ ୨୩ଟି ମାମଲା ରୁଜୁ ହୋଇଥିବା ଉଲ୍ଲେଖ ଥିଲା।
ସୂଚନା ମୁତାବକ, ଗତ କିଛି ବର୍ଷ ହେଲା ଭିଣ୍ଡେ ହୋର୍ଡିଂ ଓ ବ୍ୟାନର ଲଗାଇବା ନିମନ୍ତେ ରେଲୱେ, ମୁମ୍ବାଇ ମହାନଗର ନିଗମ, ବିଏମସିରୁ ବହୁ ଟେଣ୍ଡର ହାତେଇଥିଲା। ଏହି ସବୁ କାମ ନିମନ୍ତେ ସେ ବହୁ ଥର ନିୟମ ଉଲ୍ଲଘଂନ କରିଥିବା ଜଣାଯାଇଛି। ଏନେଇ ବି ତାଙ୍କ ନାମରେ ବହୁ ମାମଲା ରୁଜୁ ହୋଇଛି। ଭବେଶ ପ୍ରଥମେ ଗୁଜୁ ଆଡ ନାମକ ଏକ କମ୍ପାନୀ ଚଳାଉଥିବା ବେଳେ କମ୍ପାନୀ ବିରୋଧରେ ବହୁ ମାମଲା ରୁଜୁ ହୋଇଥିଲା। ଏହାପରେ ନଗରପାଳିକା ତାଙ୍କ କମ୍ପାନୀକୁ ବ୍ଲାକ ଲିଷ୍ଟ କରିବାରୁ ସେ ଏଗୋ ମିଡିଆ ନାମକ କମ୍ପାନୀ ସ୍ଥାପନ କରିଥିଲେ। ଏହି କମ୍ପାନୀ ଅଧୀନରେ ବହୁ ଟେଣ୍ଡର ହାତେଇ ସେ ବହୁ ଅନିୟମିତ କାମ କରୁଥିଲେ। କେତେବେଳେ ବିନା ଅନୁମତିରେ ବଡ଼ ବଡ଼ ହୋର୍ଡିଂ ଲଗାଉଥିଲେ ତ କେତେବେଳେ ମନ ଇଚ୍ଛା ବଡ଼ ବଡ଼ ଗଛ କାଟି ପକାଉଥିଲେ।
