ନାବାଳିକା ଅପହରଣ କରି ଯୁବକ ଗିରଫ

ସମ୍ବଲପୁର : ସମ୍ବଲପୁର ଜିଲ୍ଲା ନାକଟିଦେଉଳ ଥାନା ସାହେବି ପଞ୍ଚାୟତ ଅଞ୍ଚଳରେ ନାବାଳିକା ଅପହରଣ ଅଭିଯୋଗରେ ପୁଲିସ ଜଣଙ୍କୁ ଗିରଫ କରିଛି । ଗିରଫ ଯୁବକ ଜଣକ ହେଲେ ନାକଟିଦେଉଳ ଥାନା ସାହେବି ପଞ୍ଚାୟତ ଅନ୍ତର୍ଗତ ଝାରବେଡା ଗ୍ରାମର ସୁଶାନ୍ତ କୁମାର ନାୟକ( ୨୮) । ଏ ସଂକ୍ରାନ୍ତରେ ଅପହରଣ ହୋଇ ଥିବା ନାବାଳିକାଙ୍କ ବାପା ନାକଟିଦେଉଳ ଥାନାରେ ଲିଖିତ ଅଭିଯୋଗ କରିବା ପରେ ଏକ ମାମଲା ରୁଜୁ ହୋଇଥିଲା । ଅଭିଯୋଗ ପରେ ପୁଲିସ ଘଟଣାର ତଦନ୍ତ କରି ନାବାଳିକାଙ୍କୁ ଉଦ୍ଧାର କରିବା ସହ ଯୁବକ ଜଣଙ୍କୁ ଗିରଫ କରି ଥିଲା । ଉଭୟ ନାବାଳିକା ଓ ଗିରଫ ଯୁବକ ଜଣଙ୍କୁ ନେଇ ନାକଟିଦେଉଳ ଡାକ୍ତରଖାନାରେ ଡାକ୍ତରୀମାଇନା କରିବା ସହ ଗୁରୁବାର ଗିରଫ ଅଭିଯୁକ୍ତଙ୍କୁ କୋର୍ଟ ଚାଲାଣ କରା ଯିବ ବୋଲି ଥାନା ଅଧିକାରୀ ବିଭୁତି ଭୂଷଣ ଦଳେଇ ସୂଚନା ଦେଇଛନ୍ତି । ଘଟଣାରୁ ଜଣା ଯାଇଛି ଯେ, ନାକଟିଦେଉଳ ଥାନା ଅନ୍ତର୍ଗତ ସାହେବି ପଞ୍ଚାୟତ ଅଞ୍ଚଳର ୨ ଜଣ ନାବାଳିକା ଗତ ୬ତାରିଖ ରାତି ପ୍ରାୟ ସାଢ଼େ ୧୧ଟା ବେଳେ ନିଖୋଜ ହୋଇ ଥିବା ନେଇ ଥାନାରେ ନାବାଳିକାଙ୍କ ବାପା ଲିଖିତ ଅଭିଯୋଗ କରିଥିଲେ । ହେଲେ ନାବାଳିକା ଦ୍ୱୟ ସେମାନଙ୍କ ପ୍ରେମିକମାନଙ୍କୁ ଫୋନ କରି ଡାକିଥିଲେ । ହେଲେ ସେଥି ମଧ୍ୟରୁ ଜଣେ ପ୍ରେମିକ ଫୋନ କରିବା ପରେ ଆସିଥିଲେ ଏବଂ ଆଉ ଜଣେ ଯୁବକ ଆସି ନ ଥିଲେ । ଏହାପରେ ସମସ୍ତେ ଫେରାର ହୋଇଯାଇଥିଲେ । ଅଭିଯୋଗ ପରେ ପୁଲିସ ନାବାଳିକାଙ୍କୁ ଉଦ୍ଧାର କରିବା ସହ ଜଣେ ଅଭିଯୁକ୍ତଙ୍କୁ ଗିରଫ କରିଥିଲା ।