କୋଲକାତା: ପଶ୍ଚିମବଙ୍ଗରେ ଚାଲିଥିବା ଏସ୍ଆଇଆର ପ୍ରକ୍ରିୟାକୁ ନେଇ ମୁଖ୍ୟମନ୍ତ୍ରୀ ମମତା ବାନାର୍ଜୀ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ଚିଠି ଲେଖିଛନ୍ତି। ମମତା ଏହି ଏସ୍ଆଇଆର୍ ପ୍ରକ୍ରିୟାକୁ “ବିପଜ୍ଜନକ’ ବୋଲି ଉଲ୍ଲେଖ କରିଛନ୍ତି ଏବଂ ଏହାକୁ ତୁରନ୍ତ ବନ୍ଦ କରିବାକୁ ଅନୁରୋଧ କରିଛନ୍ତି। ମମତା କହିଛନ୍ତି ଯେ ଏହି ପ୍ରକ୍ରିୟା “ବିଶୃଙ୍ଖଳିତ ଏବଂ ଜବରଦସ୍ତି’, ଯାହା କେବଳ ଅଧିକାରୀମାନଙ୍କୁ ନୁହେଁ ବରଂ ସାଧାରଣ ନାଗରିକଙ୍କୁ ମଧ୍ୟ ବିପଦରେ ପକାଇଛି। ମମତାଙ୍କ କହିବାନୁସାରେ ଏସ୍ଆଇଆର୍ ସାରା ରାଜ୍ୟରେ ଅରାଜକତା ସୃଷ୍ଟି କରିଛି। ସେ ଆହୁରି ମଧ୍ୟ କହିଛନ୍ତି ଯେ ଅନେକ ବିଏଲ୍ଓ ପ୍ରବଳ ଚାପର ସମ୍ମୁଖୀନ ହେଉଛନ୍ତି, ଏବଂ ଏହି ଚାପ ସହିତ ଅନେକ ମୃତ୍ୟୁ ସହ ମଧ୍ୟ ଜଡିତ।
ଜଳପାଇଗୁଡ଼ିରେ ଜଣେ ଅଙ୍ଗନୱାଡି କର୍ମୀଙ୍କ ଆତ୍ମହତ୍ୟା ଘଟଣାକୁ ଉଲ୍ଲେଖ କରି ମମତା କହିଛନ୍ତି ଯେ ଏହି ମାନବିକ ମୂଲ୍ୟ ଯେକୌଣସି ଗଣତାନ୍ତ୍ରିକ ପ୍ରକ୍ରିୟା ପାଇଁ ଗ୍ରହଣୀୟ ନୁହେଁ। ସେହିପରି ଟିଏମ୍ସି ନେତା କୁନାଳ ଘୋଷ କହିଛନ୍ତି ଯେ ବର୍ତ୍ତମାନ ସମୟ ଏକ ସଂବେଦନଶୀଳ ସମୟ ହୋଇଥିବାରୁ ଏସଆଇଆର କରିବା ଉଚିତ୍ ହେବ ନାହିଁ। ପୁଣି ସୀମାବର୍ତ୍ତୀ ଅଞ୍ଚଳଗୁଡ଼ିକରେ ସୁରକ୍ଷା ଚିନ୍ତା ମଧ୍ୟ ରହିଛି। ଅନ୍ୟପକ୍ଷେ ବିଜେପି କିନ୍ତୁ ଏହାକୁ ମମତା ବାନାର୍ଜୀଙ୍କ “ହତାଶା ଭାବ’ ବୋଲି କହିଛି। ନକଲି ଭୋଟର ଚିହ୍ନଟ ଯୋଗୁଁ ଶାସକ ଦଳ ତୃଣମୂଳ କଂଗ୍ରେସ (ଟିଏମ୍ସି) ସମ୍ପୂର୍ଣ୍ଣ ଆତଙ୍କିତ ହୋଇଯାଇଛି। ପ୍ରବୀଣ ଭଣ୍ଡାରୀ ଏବଂ ଅମିତ ମାଲବ୍ୟଙ୍କ ପରି ବିଜେପି ନେତାମାନେ ସିଧାସଳଖ ମମତା ବାନାର୍ଜୀଙ୍କୁ ଟାର୍ଗେଟ କରି କହିଛନ୍ତି ଯେ ଏହି ଚିଠି ଟିଏମ୍ସିର “ଆତଙ୍କ ଏବଂ ଚିନ୍ତା’କୁ ସ୍ପଷ୍ଟ ଭାବରେ ସୂଚିତ କରୁଛି।
