ନୂଆଦିଲ୍ଲୀ : ଡିସେମ୍ବର ୫ରେ ଉତ୍ତରପ୍ରଦେଶର ମୈନପୁରୀ ଲୋକସଭା ଆସନ ସମେତ ରାଜସ୍ଥାନ, ବିହାର, ଛତିଶଗଡଓ ଉତ୍ତରପ୍ରଦେଶର ମୋଟ ୪ଟି ବିଧାନସଭା ଆସନରେ ଉପନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏହି ପରିପ୍ରେକ୍ଷୀରେ ମଙ୍ଗଳବାର ବିଜେପି ପକ୍ଷରୁ ଏହି ଉପନିର୍ବାଚନ ପାଇଁ ଦଳୀୟ ପ୍ରାର୍ଥୀ ତାଲିକା ପ୍ରକାଶ କରାଯାଇଛି । ମୁଲାୟମ ସିଂହ ଯାଦବଙ୍କ ପରଲୋକ ଯୋଗୁଁ ଖାଲିପଡିଥିବା ମୈନପୁରୀ ଲୋକସଭା ଆସନରେ ବିଜେପି ପକ୍ଷରୁ ରଘୁରାଜ ସିଂହ ଶାକ୍ୟଙ୍କୁ ପ୍ରାର୍ଥୀ କରାଯାଇଛି ।
ଏଠାରେ ମୁଲାୟମଙ୍କ ବୋହୁ ତଥା ସମାଜବାଦୀ ପାର୍ଟୀ ମୁଖ୍ୟ ଅଖିଳେଶଙ୍କ ପତ୍ନୀ ଡିମ୍ପଲ ଯାଦବ ପ୍ରତିଦ୍ୱନ୍ଦ୍ୱିତା କରୁଛନ୍ତି । ଅପରପକ୍ଷରେ ରାଜସ୍ଥାନର ସର୍ଦ୍ଦାରସହର ବିଧାନସଭା ଉପନିର୍ବାଚନ ପାଇଁ ଅଶୋକ କୁମାର ପିଞ୍ଚାଙ୍କୁ ପ୍ରାର୍ଥୀ କରାଯାଇଥିବାବେଳେ ବିହାରର କୁରହାନି ଆସନରେ କେଦାର ପ୍ରସାଦ ଗୁପ୍ତା, ଛତିଶଗଡର ଭାନୁପ୍ରତାପପୁର ଆସନରେ ବ୍ରହ୍ମାନନ୍ଦ ନେତମଙ୍କୁ ଏବଂ ଉତ୍ତରପ୍ରଦେଶର ଦୁଇଟି ବିଧାନସଭା ଆସନ ଖଟାଉଲି ଓ ରାମପୁର ଆସନ ପାଇଁ ଯଥାକ୍ରମେ ରାଜକୁମାରୀ ସୈନି ଓ ଆକାଶ ସାକ୍ସେନାଙ୍କୁ ଟିକଟ ପ୍ରଦାନ କରାଯାଇଛି । ଡିସେମ୍ବର ୮ରେ ଏହି ଆସନ ପାଇଁ ଭୋଟଗଣତି କରାଯିବ ।
