ୱାସିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଛନ୍ତି, ୩୪ ବର୍ଷ ମଧ୍ୟରେ ପ୍ରଥମ ଥର ପାଇଁ ଇସ୍ରାଏଲ ଏବଂ ଲେବାନନ୍ ମଧ୍ୟରେ ସିଧାସଳଖ ଶାନ୍ତି ଆଲୋଚନା ଆରମ୍ଭ ହେବାକୁ ଯାଉଛି। ଟ୍ରମ୍ପ ତାଙ୍କ ସୋସିଆଲ ମିଡିଆ ପୋଷ୍ଟ ଟ୍ରୁଥ୍ ସୋସିଆଲରେ କହିଛନ୍ତି, ଇସ୍ରାଏଲ ଏବଂ ଲେବାନନ୍ ମଧ୍ୟରେ ଆଲୋଚନା ନେଇ ମତେ କିଛି ଆଶ୍ୱସ୍ତି ମିଳିଛି। ଦୁଇ ଦେଶର ନେତା ପ୍ରାୟ ଦୀର୍ଘ ବର୍ଷ ଧରି କଥା ହୋଇନାହାନ୍ତି। ଏବେ ଏହି ଆଲୋଚନା ଶୁକ୍ରବାର ହେବାକୁ ଯାଉଛି। ଯାହା ଏକ ସକାରାତ୍ମକ ସଙ୍କେତ। ଏହା ମଧ୍ୟପ୍ରାଚ୍ୟରେ ଶାନ୍ତି ପାଇଁ ନୂତନ ଆଶା ପ୍ରଦାନ କରିପାରିବ। ଯଦି ଏହି ଆଲୋଚନା ଆଗକୁ ବଢ଼େ, ତେବେ ଇସ୍ରାଏଲ ଏବଂ ଲେବାନନ ମଧ୍ୟରେ ଦୀର୍ଘ ଦିନ ଧରି ରହିଥିବା ଉତ୍ତେଜନା ହ୍ରାସ ପାଇବାର ସମ୍ଭାବନା ରହିଛି। ଇସ୍ରାଏଲୀ ପ୍ରତିରକ୍ଷା ବାହିନୀ (ଆଇଡିଏଫ୍) ଦକ୍ଷିଣ ଲେବାନନରେ ନିରନ୍ତର ଅପରେସନ୍ ଚଳାଇଥିବାରୁ ଦୁଇ ଦେଶ ମଧ୍ୟରେ ପରିସ୍ଥିତି ବର୍ତ୍ତମାନ ଉତ୍ତେଜନାପୂର୍ଣ୍ଣ ରହିଛି। ଏହି ସମୟରେ, ହେଜବୁଲ୍ଲା ମଧ୍ୟ ଇସ୍ରାଏଲ ଉପରେ ପ୍ରତିଶୋଧମୂଳକ ଭାବେ ରକେଟ ଆକ୍ରମଣ ଆରମ୍ଭ କରିଛି। ଫଳରେ ସୀମାବର୍ତ୍ତୀ ଅଞ୍ଚଳରେ ସଙ୍କଟ ସୃଷ୍ଟି ହୋଇଛି।
ଏହି ଖବର କ୍ଷେତ୍ରୀୟ କୂଟନୈତିକ ପ୍ରୟାସରେ ଉଷ୍ମତା ସୃଷ୍ଟି କରିଛି। ପୂର୍ବରୁ, ଇରାନ ଏବଂ ଆମେରିକା ଏକ ଅସ୍ଥାୟୀ ଅସ୍ତ୍ରବିରତି ପାଇଁ ଆଲୋଚନା କରିଥିଲେ, କିନ୍ତୁ ଇସ୍ରାଏଲ-ଲେବାନନ ପ୍ରସଙ୍ଗକୁ ସେହି ଚୁକ୍ତିନାମାରୁ ବାଦ୍ ଦିଆଯାଇଥିଲା। ଇରାନ କଡ଼ା ପ୍ରତିକ୍ରିୟା ପ୍ରକାଶ କରି ପରିସ୍ଥିତିକୁ ଅସ୍ତ୍ରବିରତିର ଉଲ୍ଲଂଘନ ବୋଲି କହିଥିଲା। ଉଲ୍ଲେଖଯୋଗ୍ୟ, ଇରାନ-ଆମେରିକା ଉତ୍ତେଜନା ମଧ୍ୟରେ ଇସ୍ରାଏଲ-ଲେବାନନ୍ ଆଲୋଚନା ଖବରକୁ ଆଞ୍ଚଳିକ ଶାନ୍ତି ଦିଗରେ ଏକ ସମ୍ଭାବ୍ୟ ମୋଡ଼ ଭାବରେ ଦେଖାଯାଉଛି।
