ଉତ୍ତରପ୍ରଦେଶ : ଗତକାଲି ଉତ୍ତରପ୍ରଦେଶର ସୁଲତାନପୁର ଜିଲ୍ଲାରେ ପ୍ରବଳ ଝଡ଼-ତୋଫାନ ଏବଂ ବର୍ଷା ତାଣ୍ଡବ ସୃଷ୍ଟି କରିଛି । ଏହି ପ୍ରାକୃତିକ ବିପର୍ଯ୍ୟରେ ୨ ଶିଶୁଙ୍କ ସମେତ ୭ ଜଣଙ୍କର ମୃତ୍ୟୁ ଘଟିଛି । ଏଥିସହ ଏଥିରେ ୨୧ ଜଣ ମଧ୍ୟ ଆହତ ହୋଇଛନ୍ତି । ସମସ୍ତ ଆହତଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି । ଜିଲ୍ଲା ପ୍ରଶାସନ ପ୍ରଭାବିତ ପୀଡିତ ପରିବାରକୁ ସହାୟତା ଏବଂ କ୍ଷତିପୂରଣ ପ୍ରଦାନ କରିଛନ୍ତି । ସର୍ବାଧିକ ଝଡ଼-ତୋଫାନ ବଲଡିରାଇ, ହଲିଆପୁର, ଅଖଣ୍ଡନଗର, ବନ୍ଧୁଆକଲା ଏବଂ କୁଦ୍ୱାର ଥାନା ଅଞ୍ଚଳ ସମେତ ଅନେକ ଅଞ୍ଚଳରେ ଅନୂଭତ ହୋଇଛି । ବିଭିନ୍ନ ସ୍ଥାନରେ ଗଛ ଏବଂ ବିଦ୍ୟୁତ୍ ଖୁଣ୍ଟ ପଡ଼ି ଜନଜୀବନକୁ ଅସ୍ତବ୍ୟସ୍ତ କରିଦେଇଛି ।
ସୂଚନାନୁଯାୟୀ, ଜଣେ ୨୦ ବର୍ଷୀୟ ବ୍ୟକ୍ତି ତାଙ୍କ ଭଉଣୀ ବାହାଘର ପାଇଁ ୧୦ ଦିନ ପୂର୍ବରୁ ବିଦେଶରୁ ଫେରିଥିଲେ । କିନ୍ତୁ ଭଉଣୀ ବାହାଘର ପୂର୍ବରୁ କୁଡୱାର ଥାନା ନିକଟରେ ବିଦ୍ୟୁତ୍ ଖୁଣ୍ଟ ତାଙ୍କ ଉପରେ ପଡ଼ିଯିବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଛି । ବଲଦିରାୟ ଥାନା ନିକଟରେ ମଧ୍ୟ ଦୁଇ ଜଣଙ୍କର ମୃତ୍ୟୁ ହୋଇଛି । ମାଫିଆତ ସହରରେ ଘର ଛାତର ଇଟା ଖସି ଜଣେ ୮ ବର୍ଷୀୟ ଝିଅର ମୃତ୍ୟୁ ଘଟିଛି । ସେହିପରି ସିଂଘନୀ ଗାଁର ୫୮ ବର୍ଷୀୟ ବ୍ୟକ୍ତିଙ୍କ ଉପରେ ଗଛ ପଡ଼ିଯିବାରୁ ତାଙ୍କର ମୃତ୍ୟୁ ଘଟିଥିଲାବେଳେ ପତ୍ନୀ ଗୁରୁତର ଆହତ ହୋଇଛନ୍ତି । ଡୋଭିଆରା ଗାଁର ଜଣେ ୩୫ ବର୍ଷୀୟ ମହିଳାଙ୍କ ଉପରେ ମାଟି କାନ୍ଥ ଭୁଶୁଡି ତାଙ୍କର ମୃତ୍ୟୁ ହୋଇଛି । ଅଖଣ୍ଡନଗର ଥାନା ଅନ୍ତର୍ଗତ ବରାମଦପୁର ଗାଁର ଜଣେ ୮ ବର୍ଷୀୟ ପିଲାର ମୃତ୍ୟୁ ଘଟିଛି ଏବଂ ୧୬ ବର୍ଷୀୟ ଓ ୧୧ ବର୍ଷୀୟ ପିଲା ଆହତ ହୋଇଛନ୍ତି । ବନ୍ଧୁଆକାଲାର ଅଲିଗଞ୍ଜରେ ଗଛ ପଡ଼ି ୪୦ ବର୍ଷୀୟ ମହିଳାଙ୍କ ଜୀବନ ଚାଲିଯାଇଛି । ମାଟି କାନ୍ଥ ପଡ଼ି କୁରେଭାର ଥାନା ଅନ୍ତର୍ଗତ ପଟନା ମଣିପୁରର ଜଣେ ୭୦ ବର୍ଷୀୟ ମହିଳାଙ୍କର ମଧ୍ୟ ମୃତ୍ୟୁ ହୋଇଛି । ସେପଟେ ପୂର୍ବାଞ୍ଚଳ ଏକ୍ସପ୍ରେସୱେର ୮୦ କିଲୋମିଟର ଥିବା ଟୋଲ ପ୍ଲାଜା ମଧ୍ୟ କ୍ଷତିଗ୍ରସ୍ତ ହୋଇଛି । ଯାହା ଦ୍ବାରା ଲୋକ ଅନେକ ସମସ୍ୟାର ସମ୍ମୁଖୀନ ହୋଇଛନ୍ତି ।
