ପୋଲିସ କନଷ୍ଟେବଳରୁ ସଂସଦ ପର୍ଯ୍ୟନ୍ତ ଯାତ୍ରା

ନୂଆଦିଲ୍ଲୀ: ଲୋକସଭା ନିର୍ବାଚନ ୨୦୨୪କୁ ଦୃଷ୍ଟିରେ ରଖି ଗତକାଲି ବିଜେପି ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିଛି । ବିଜେପିର ଏହି ପ୍ରାର୍ଥୀ ତାଲିକାରେ ୧୯୫ ଜଣ ପ୍ରାର୍ଥୀଙ୍କ ନାମ ଘୋଷଣା କରାଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନାମ ସହିତ ତାଙ୍କର ଜଣେ ବିଶେଷ କମାଣ୍ଡର ଚନ୍ଦ୍ରକାନ୍ତ ରଘୁନାଥ ପାଟିଲ (ସିଆର ପାଟିଲ) ଙ୍କ ନାମ ମଧ୍ୟ ଏହି ତାଲିକାରେ ରହିଛି ।୨୦୧୯ ଲୋକସଭା ନିର୍ବାଚନରେ ​​ପାଟିଲ ସର୍ବାଧିକ ଭୋଟ ବ୍ୟବଧାନରେ ଜିତିଥିଲେ । ପୁରା ଦେଶରେ ସର୍ବାଧିକ ଭୋଟରେ ଜିତିବା ଘଟଣାରେ ପ୍ରଧାନମନ୍ତ୍ରୀ ମୋଦୀ ମଧ୍ୟ ତାଙ୍କ ପଛରେ ଅଛନ୍ତି । ୨୦୧୯ ଲୋକସଭା ନିର୍ବାଚନରେ ​​CR ପାଟିଲ ୯,୭୨,୭୩୯ ଭୋଟ୍ ପାଇଥିଲେ। ସେ ତାଙ୍କ ପ୍ରତିଦ୍ୱନ୍ଦ୍ୱୀ କଂଗ୍ରେସ ପ୍ରାର୍ଥୀ ଧର୍ମେଶ ପଟେଲଙ୍କୁ ୬,୮୯,୬୮୮ ଟି ଭୋଟରେ ପରାସ୍ତ କରିଥିଲେ ।୧୯୫୫ ମସିହାରେ ମହାରାଷ୍ଟ୍ରର ଜାଲଗାଓଁରେ ଜନ୍ମଗ୍ରହଣ କରିଥିବା ପାଟିଲ । ବିଜେପିରେ ଯୋଗଦେବା ପୂର୍ବରୁ ପାଟିଲ ଗୁଜରାଟ ପୋଲିସରେ କନଷ୍ଟେବଳ ଭାବରେ କାର୍ଯ୍ୟ କରିବା ସହ ଏକ କୋଅପରେଟିଭ୍ ବ୍ୟାଙ୍କ ମଧ୍ୟ ପରିଚାଳନା କରୁଥିଲେ । ପାଟିଲ ଗୁଜୁରାଟ ପୋଲିସରେ ୧୪ ବର୍ଷ କାର୍ଯ୍ୟ କରିଥିଲେ ଏବଂ ୧୯୮୯ରେ ବିଜେପିରେ ଯୋଗ ଦେଇଥିଲେ।ପାଟିଲ ୨୦୦୯ ରେ ପ୍ରଥମ ଥର ପାଇଁ ନବସାରିରୁ ଲୋକସଭା ନିର୍ବାଚନରେ ଜିତି ସଂସଦ ପର୍ଯ୍ୟନ୍ତ ପହଞ୍ଚିଥିଲେ । କୁହାଯାଏ ଯେ, ତାଙ୍କ ନାମ ତତ୍କାଳୀନ ମୁଖ୍ୟମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ପ୍ରସ୍ତାବିତ ହୋଇଥିଲା । ଏହା ପରେ ୨୦୧୪ରେ ମଧ୍ୟ ସେ ନବସାରି ଆସନରୁ ଜିତିଥିଲେ ଏବଂ ୨୦୧୯ରେ ସେ ସର୍ବାଧିକ ଭୋଟରେ ବୃହତ ବିଜୟ ହାସଲ କରି ଜାତୀୟ ରେକର୍ଡ ସୃଷ୍ଟି କରିଥିଲେ।୨୦୨୦ରେ ପାଟିଲଙ୍କୁ ଗୁଜରାଟର ରାଜ୍ୟ ସଭାପତି ଦାୟିତ୍ଵ ଦିଆଯାଇଥିଲା । ୨୦୨୨ ଗୁଜୁରାଟ ବିଧାନସଭା ନିର୍ବାଚନରେ ​​ବିଜେପିକୁ ମିଳିଥିବା ରେକର୍ଡ ସଂଖ୍ୟକ ଭୋଟ ପାଇଁ ସମସ୍ତେ ତାଙ୍କର ସାଂଗଠନିକ ଦକ୍ଷତାକୁ ପ୍ରଶଂସା କରିଥିଲେ । ଗୁଜୁରାଟ ବିଜେପି ସଭାପତି ପଦରେ ଥିବା ପାଟିଲଙ୍କ ଟିକେଟ୍ କଟାଯାଇପାରେ ବୋଲି କଳ୍ପନାଜଳ୍ପନା ଲାଗିଥିଲା । କିନ୍ତୁ ଦଳ ତାଙ୍କୁ ପୁନର୍ବାର ପ୍ରାର୍ଥୀ କରି ସମସ୍ତ କଳ୍ପନା ଜଳ୍ପନାର ଅନ୍ତ ଘଟାଇଛି।