ଝୁଲନ୍ତା ଅବସ୍ଥାରେ ମହିଳାଙ୍କ ଶବ ଉଦ୍ଧାର କଲା ଯାଜପୁରରୋଡ଼ ପୋଲିସ

ଯାଜପୁର : ଯାଜପୁର ଜିଲ୍ଲାର ଯାଜପୁର ରୋଡ ଥାନା ଅନ୍ତର୍ଗତ ବ୍ୟାସନଗର ପୌରପରିଷଦ ସ୍ଥିତ ୭ ନଂ ୱାର୍ଡ ସୋବରା ଗ୍ରାମ ନିକଟରେ ଏକ ଘରେ ଜଣେ ମହିଳାଙ୍କ ମୃତ ଶରୀରକୁ ଉଦ୍ଧାର କରିଛି ଯାଜପୁରରୋଡ଼ ପୋଲିସ । ସୂଚନା ମୁତାବକ ଆଜି ସକାଳେ ଲକ୍ଷ୍ମୀ ମହାରଣା (ବୟଷ ୨୮) ତାଙ୍କ ପୁଅ ଝିଅଙ୍କୁ ସ୍କୁଲରେ ଛାଡି ଘରକୁ ଫେରିଥିଲେ । କିନ୍ତୁ ସ୍କୁଲ ଛୁଟି ହେଲା ବେଳକୁ ଆଉ ଛୁଆ ଦୁଇ ଜଣଙ୍କୁ ଆଣିବାକୁ ଯାଇ ନ ଥିଲେ। ଏତେ ଡେରି ହେବାରୁ ସ୍କୁଲ ତରଫରୁ ଛୁଆ ଦୁଇଜଣଙ୍କର ବାପାଙ୍କ ପାଖକୁ ଫୋନ ଯାଇଥିଲା । ତାଙ୍କ ବାପା ଶିବ ମହାରଣା ଫୋନ କଲ୍ ପାଇ ସଙ୍ଗେ ସଙ୍ଗେ ପ୍ଲାଣ୍ଟ୍ ରୁ ଆସି ଛୁଆ ଦୁଇଜଣଙ୍କୁ ଘରକୁ ନେଇ ଯାଇ ଦେଖନ୍ତି ତ ତାଙ୍କ ସ୍ତ୍ରୀ ଫ୍ୟାନରେ ଏକ ଓଢଣି ବେକରେ ଲଗେଇ ଆତ୍ମହତ୍ୟା କରିଛି । ଯାଜପୁରରୋଡ଼ ଥାନାଧିକାରୀ ଉପେନ୍ଦ୍ରକୁମାର ପ୍ରଧାନ ଘଟଣା ସ୍ଥଳରେ ପହଞ୍ଚି ସାଇଣ୍ଟିଫିକ ଟିମ ଦ୍ୱାରା ତଦନ୍ତ କରିଥିଲେ ଏବଂ ମୃତ ଶରୀରକୁ ଜବତ କରି ବ୍ୟବଛେଦ ନିମନ୍ତେ ଦାନଗଦୀ ଗୋଷ୍ଟି ସ୍ୱାସ୍ଥ୍ୟ କେନ୍ଦ୍ରକୁ ପଠାଇଛି ।ଘଟଣାର ସମ୍ପର୍କରେ ପୋଲିସ ତଦନ୍ତ ଚଳାଇଛି । ମୃତ ଲକ୍ଷ୍ମୀ ମହାରଣା ବ୍ୟାସନଗର ପୌରପରିଷଦର ଜଣେ ସଫେଇ କର୍ମଚାରୀ ଭାବେ କାର‌୍ୟ୍ୟରତ ଥିଲେ । ତାଙ୍କ ସ୍ୱାମୀ ଶିବ ମହାରଣା ଜଣେ ସ୍ଥାନୀୟ ଶିଳ୍ପାଞ୍ଚଳରେ ଘରୋଇ କାରଖାନାରେ ସୁରକ୍ଷା କର୍ମୀ ଭାବେ କାର‌୍ୟ୍ୟ କରନ୍ତି ।ତାଙ୍କ ଝିଅର ବୟସ ୭ ବର୍ଷ ହୋଇଥିବାବେଳେ ତାଙ୍କ ପୁଅର ବୟସ ୪ ବର୍ଷ ବୋଲି ଜଣାପଡିଛି । ଉଭୟ ପରିବାରସହ ଦୀର୍ଘ ସାତ ବର୍ଷ ଧରି ରହିଆସୁଥିଲେ ବୋଲି ଜଣାପଡିଛି । ମହିଳା ଜଣଙ୍କ କେଉଁ କାରଣ ପାଇଁ ଆତ୍ମ ହତ୍ୟା କରିଛି ପୋଲିସ ତଦନ୍ତ ଚଳାଇଛି ।