ଇଂଲଣ୍ଡରେ ଗୋଟିଏ ଟେଷ୍ଟ୍ ଖେଳିବ ଭାରତ

ଲଣ୍ଡନ: ଆସନ୍ତା ବର୍ଷ ଭାରତ ଓ ଇଂଲଣ୍ଡ ମଧ୍ୟରେ ଗୋଟିଏ ଟେଷ୍ଟ ମ୍ୟାଚ୍ ଆୟୋଜନ ପାଇଁ ଯୋଜନା ଚାଲିଥିବା ଜଣାପଡ଼ିଛି । ତେବେ ଏହା ଗୋଟିଏ ମ୍ୟାଚ୍ ବିଶିଷ୍ଟ ସିରିଜ୍ ହେବ କିମ୍ବା ଅଗଷ୍ଟରେ ଖେଳାଯାଇଥିବା ସିରିଜ୍ ଅନ୍ତର୍ଭୁକ୍ତ ହେବ, ତାହା ବର୍ତ୍ତମାନ ସ୍ପଷ୍ଟ ହୋଇନାହିଁ। ତେବେ ଚଳିତ ମାସ ପ୍ରାରମ୍ଭରେ ମାଞ୍ଚେଷ୍ଟର ଟେଷ୍ଟ ବାତିଲ ହେବା ପରେ ଏହି ଟେଷ୍ଟ ମ୍ୟାଚ୍‌ଟି ଇସିବିର ଆର୍ଥିକ କ୍ଷତିକୁ ଭରଣା କରିପାରିବ ବୋଲି ଏକ ଇଏସ୍‌ପିଏନ୍ କ୍ରିକ୍‌ଇନ୍‌ଫୋ ରିପୋର୍ଟରେ ପ୍ରକାଶ ପାଇଛି । ସୂଚନାଯୋଗ୍ୟ, ଭାରତୀୟ ଟିମ୍‌ରେ କରୋନା ସଂକ୍ରମଣ କାରଣରୁ ଭାରତ ଓ ଇଂଲଣ୍ଡ ମଧ୍ୟରେ ମାଞ୍ଚେଷ୍ଟରରେ ଖେଳାଯିବାକୁ ଥିବା ୫ମ ଟେଷ୍ଟ ମ୍ୟାଚ୍‌କୁ ବାତିଲ କରିବାକୁ ପଡ଼ିଥିଲା । ଅନ୍ୟପକ୍ଷରେ ଆସନ୍ତା ବର୍ଷ ଜୁଲାଇରେ ଭାରତୀୟ ଟିମ୍ ସୀମିତ ଓଭର୍ ସିରିଜ୍ ପାଇଁ ଇଂଲଣ୍ଡ ଗସ୍ତ କରିବ । ଏହି ଗସ୍ତ ଅବସରରେ ଉଭୟ ଟିମ୍ ମଧ୍ୟରେ ୩ଟି ଟି-୨୦ ଓ ୩ଟି ଦିନିକଆ ମ୍ୟାଚ୍ ଖେଳାଯିବ । ଏହା ଜୁଲାଇ ୧ ତାରିଖରୁ ୧୪ ତାରିଖ ପର୍ଯ୍ୟନ୍ତ ଚାଲିବ ।