ସ୍ତ୍ରୀକୁ ନିର୍ଯାତନା ଅଭିଯୋଗରେ ସ୍ୱାମୀ ଗିରଫ

ଅନୁଗୁଳ: ଅନୁଗୁଳ ପୁଲିସ ବୁଧବାର ସ୍ତ୍ରୀକୁ ମାଡ଼ମାରିବା ଅଭିଯୋଗରେ ସ୍ୱାମୀଙ୍କୁ ଗିରଫ କରିଛି । ସୂଚନା ଯେ, ବଅଁରପାଳ ଥାନା ଅନ୍ତର୍ଗତ ମହିଧରପୁର ପ୍ରଫୁଲ ସାହୁ ତାଙ୍କ ସ୍ତ୍ରୀ ଇନ୍ଦିରା ସାହୁଙ୍କୁ ନିର୍ଯାତନା ଦେବାସହ ମାଡ଼ମାରିଥିଲେ । ଏ ନେଇ ସେ ଜାନୁଆରୀରେ ବଅଁରପାଳ ଥାନାରେ ଲିଖିତ ଅଭିଯୋଗ କରିଥିଲେ । କିନ୍ତୁ କିଛି ସୁଫଳ ମିଳିନଥିଲା । ତେଣୁ ସେ ଅନୁଗୁଳରେ ଥିବା ସଖୀ ସେଣ୍ଟରରେ ପହଞ୍ଚିଥିଲେ । ସେଠାରୁ ସେ ଅନୁଗୁଳ କୋର୍ଟର ଲିଗାଲ ସେଲର ଦ୍ୱାରସ୍ଥ ହୋଇଥିଲେ । ଲିଗାଲ ସେଲରେ ୬ ତାରିଖରେ ପହଞ୍ଚିବାକୁ ନୋଟିସ୍ ଦିଆଯାଇଥିଲା । ତେଣୁ ଇନ୍ଦିରା ଲିଗାଲ ସେଲରେ ପହଞ୍ଚିବା ପାଇଁ ଅନୁଗୁଳ ସରକାରୀ ମହାବିଦ୍ୟାଳୟ ପାଖରେ ରହୁଥିବା ଜଣେ ସମ୍ପର୍କୀୟଙ୍କ ଘରେ ପହଞ୍ଚିଥିଲେ । ତେବେ ସେଠାରେ ପ୍ରଫୁଲ ପହଞ୍ଚି ଇନ୍ଦିରାଙ୍କୁ ବାହାରକୁ ଡାକି ନିସ୍ତୁକ ମାଡ଼ ମାରିବା ସହ ଇନ୍ଦିରାଙ୍କ ମୋବାଇଲ ଭାଙ୍ଗି ଦେଇଥିଲେ । ଏ ନେଇ ଇନ୍ଦିରା ଅନୁଗୁଳ ଟାଉନ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇ ପୁଲିସ ଏକ ମାମଲା ରୁଜୁକରି ବୁଧବାର ପ୍ରଫୁଲଙ୍କୁ ଗିରଫ କରି କୋର୍ଟଚାଲାଣ କରିଛି ।