ବ୍ରଜାଘାତରେ ସ୍ୱାମୀ ଓ ସ୍ତ୍ରୀର ମୃତ୍ୟୁ

ରାମନାଗୁଡା : ରାୟଗଡ଼ା ଜିଲ୍ଲା ରାମନାଗୁଡା ବ୍ଲକ ଗୁଲୁଣ୍ଠି ପଞ୍ଚାୟତର ତାମିଲଗୁଡା ଗ୍ରାମରେ ବ୍ରଜଘାତ ଘଟି ୨ଜଣଙ୍କ ମୃତ୍ୟୁ ଘଟିଥିବା ଜଣାପଡ଼ିଛି । ମୃତକ ମାନଙ୍କ ହେଲେ ଗୋପନ ପାତିକା(୩୫) ଓ ତାଙ୍କ ସ୍ତ୍ରୀ ପ୍ରିୟା ପାତିକା(୨୬) । ସୂଚନା ଅନୁଯାୟୀ, ଗ୍ରାମ ନିକଟସ୍ଥ ପାହାଡ଼କୁ ପୋଡୁ ଚାଷ କରିବା ନିମନ୍ତେ ଡଙ୍ଗର ସଫା କରିବା ସମୟରେ ଘଡଘଡି ସହ ବର୍ଷା ହୋଇଥିଲା । ଠିକ୍ ସେହି ସମୟରେ ନିକଟରେ ରହିଥିବା ତେନ୍ତୁଳି ଗଛ ମୂଳେ ସ୍ୱାମୀ ଆଉ ସ୍ତ୍ରୀ ଆଶ୍ରୟ ନେଇଥିଲେ ଠିକ ସେହି ସମୟରେ ବଜ୍ରପାତ ଘଟି ଉଭୟଙ୍କ ପ୍ରାଣବାୟୁ ଉଡ଼ିଯାଇଥିଲା । ଉଭୟେ ଘରକୁ ନ ଫେରିବାରୁ ଗାଁ ଲୋକେ ବହୁ ଖୋଜାଖୋଜି କରିବା ପରେ ତେନ୍ତୁଳି ଗଛ ମୂଳେ ଅଚେତ ଅବସ୍ଥାରେ ପଡିଥିବା ଦେଖି ଗ୍ରାମକୁ ଧରି ଆସିଥିଲେ କିନ୍ତୁ ସେତେବେଳ ପର୍ଯ୍ୟନ୍ତ ଉଭୟଙ୍କ ପ୍ରାଣବାୟୁ ଚାଲିଯାଇଥିବା ଜଣାପଡିଛି । ମୃତ ଗୋପନଙ୍କ ୩ପୁଅ ୧ଝିଅ ରହିଥିବା ଜଣାପଡିଛି । ଖବରପାଇବା କ୍ଷଣି ଗ୍ରାମରେ ଶୋକାକୂଳ ପରିବେଶ ସୃଷ୍ଟି ହୋଇଛି । ଉକ୍ତ ଘଟଣା ସମ୍ପର୍କରେ ଖବର ପାଇବା ମାତ୍ରେ ରାମନାଗୁଡା ବିଡିଓ ବେଣୁଧର ଶବର ଓ ଭାରପ୍ରାପ୍ତ ତହସିଲଦାର ଫ୍ରଡିନାଲ ଏକ୍କା ପହଞ୍ଚି ମୃତ ପରିବାର ୩ପୁଅ ୧ଝିଅକୁ ଭେଟି ସରକାରଙ୍କ ପକ୍ଷରୁ ସମସ୍ତ ପ୍ରକାର ସୁବିଧା ସୁଯୋଗ ପ୍ରଦାନ କରାଯିବ ବୋଲି ସୂଚନା ଦେଇଛନ୍ତି । ରାମନାଗୁଡା ଫାଣ୍ଡି ଅଧିକାରୀ କୃତିବାସ ହରିଚନ୍ଦନ ପହଞ୍ଚି ଉଭୟଙ୍କ ଶବକୁ ବ୍ୟବଚ୍ଛେଦ ନିମନ୍ତେ ଗୁଣୁପୁର ପଠାଇ ଦେଇଥିବା ସୂଚନା ମିଳିଛି ।