ନୂଆଦିଲ୍ଲୀ: ଶତ୍ରୁ ଘେରରେ ଥିବା ଇସ୍ରାଏଲ ଦେଶର ସୁରକ୍ଷା ଲାଗି କରିଛି ସମସ୍ତ ଅତ୍ୟାଧୁନିକ ବ୍ୟବସ୍ଥା। ତା ମଧ୍ୟରୁ ଗୋଟିଏ ହେଉଛି ଆଇରନ ଡୋମ ବା ଲୌହ କବଚ। କ୍ଷେପଣାସ୍ତ୍ର ଆକ୍ରମଣକୁ ପ୍ରତିହତ କରିବା ଲାଗି ଏହି ବ୍ୟବସ୍ଥା କରିଯାଇଛି। ଖରା, ବର୍ଷା, ଶୀତ, କୁହୁଡି ହେଉ କି ବରଫପାତ ସବୁ ପରିସ୍ଥିତିରେ ସଜାଗ ଥାଏ ଏହି କ୍ଷେପଣାସ୍ତ୍ର ନିରୋଧ ପ୍ରଣାଳୀ । ସ୍ୱଳ୍ପ ଦୂରଗାମୀ ରକେଟ ଆକ୍ରମଣକୁ ପ୍ରତିହତ କରିବାରେ ଏହା ଅନେକାଂଶରେ ସଫଳ ମଧ୍ୟ ହୋଇଛି।
କ୍ଷେପଣାସ୍ତ୍ରକୁ ଠାବ କରିବା ସହ ଏହାକୁ ଆକାଶରେ ହିଁ ଧ୍ୱଂସ କରିଦିଏ ଆଇରନ ଡୋମ । ୨୦୧୧ ମସିହାରେ ଇସ୍ରାଏଲ ଏହି ବ୍ୟବସ୍ଥା କରିଥିଲା । ଲେବାନନର ଆତଙ୍କବାଦୀ ସଂଗଠନ ହିଜବୁଲ୍ଲା ନିୟମିତ ଇସ୍ରାଏଲ ଉପରେ ରକେଟ ଆକ୍ରମଣ କରେ । ୨୦୦୬ରେ ହିଜବୁଲ୍ଲା ରକେଟ ମାଡ଼ରେ ୪୪ ଇସ୍ରାଏଲ ନାଗରିକଙ୍କ ମୃତ୍ୟୁ ହୋଇଥିଲା। ତାପରେ ଇସ୍ରାଏଲ ତିଆରି କରିଥିଲା ଏହି ସୁରକ୍ଷା କବଚ।
୪ରୁ ୭୦ କିଲୋମିଟର ଦୂରତାରୁ ଆସୁଥିବା ରକେଟକୁ ଠାବ କରିବା ସହ ଏହାକୁ ଧ୍ୱଂସ କରିଦିଏ ଆଇରନ ଡୋମ୍ । ଇସ୍ରାଇଲ ନିଜ ସୀମୀରେ ଆଇରନ ଡୋମର ୧୦ଟି ବ୍ୟାଟେରୀ ବା ସେଟ୍ ମୁତୟନ କରିଛି । ଏହାକୁ ଏକ ସ୍ଥାନରୁ ଅନ୍ୟସ୍ଥାନକୁ ମଧ୍ୟ ନିଆଯାଇପାରେ। ତେଣୁ ଆବଶ୍ୟକତାକୁ ଦେଖି ଏହାର ସ୍ଥାନ ପରିବର୍ତ୍ତନ କରାଯାଏ। ଆଇରନ ଡୋମ୍ ମୁଖ୍ୟତଃ ୩ଟି ପର୍ୟ୍ୟାୟରେ କାମ କରେ ।
ଏଥିରେ ଥିବା ରାଡାର ଆସୁଥିବା ରକେଟକୁ ଠାବ କରି ସେଣ୍ଟ୍ରାଲ ପ୍ରସେସିଂ ୟୁନିଟକୁ ସୂଚନା ପଠାଏ । ଏହାପରେ ସେଣ୍ଟ୍ରାଲ ୟୁନିଟ ରକେଟ ଜନବସତି ଅଞ୍ଚଳରେ ପଡିବ ନା ନାହିଁ ଆକଳନ କରେ । ଯଦି ରକେଟ ଜନବସତି ଅଞ୍ଚଳରେ ପଡିବାର ଆଶଙ୍କା ଥାଏ ତେବେ ଏହା ନିଜସ୍ୱ କ୍ଷେପଣାସ୍ତ୍ର ଫାୟାର କରିବା ସହ ଆକାଶରେ ଏହାକୁ ଧ୍ୱଂସ କରିଦିଏ । ଯଦି ରକେଟ ଜନବସତି କିମ୍ବା ପ୍ରତିରକ୍ଷା ଅନୁଷ୍ଠାନକୁ ହିଟ୍ କରିବାର ନଥାଏ ତେବେ ଏହାକୁ ନଅଟକାଇ ଛାଡ଼ି ଦିଆଯାଏ ।
ତେବେ ଏହି ବ୍ୟବସ୍ଥା କେତେ ସଫଳ ? ଇସ୍ରାଏଲ ପ୍ରତିରକ୍ଷା ବିଭାଗର ସୂଚନା ଅନୁସାରେ ଏହା ୯୬ ପ୍ରତିଶତ ନିଖୁଣ ଲକ୍ଷ୍ୟଭେଦ କରିପାରେ । ତେବେ କୌଣସି ଅସ୍ତ୍ର ଶତ ପ୍ରତିଶତ ନିଖୁଣ ନୁହେଁ କି ୫ ହଜାରରୁ ଅଧିକ ରକେଟକୁ ପ୍ରତିରୋଧ କରିବା ଲାଗି ସକ୍ଷମ ନୁହେଁ, ତାହା ହମାସ ଆକ୍ରମଣରୁ ପ୍ରମାଣିତ ହୋଇଛି।…
