କାନାଡା: କାନାଡାର ମଣ୍ଟ୍ରିଆଲ୍ ସହର ନିକଟରେ ଏକ ହେଲିକପ୍ଟର ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ହେଲିକପ୍ଟରରେ ଥିବା ଚାରି ଜଣଙ୍କର ମୃତ୍ୟୁ ହୋଇଛି । ହେଲିକପ୍ଟରଟି ଦୁର୍ଘଟଣାଗ୍ରସ୍ତ ହେବା ପୂର୍ବରୁ ଏଥିରେ କିଛି ସମସ୍ୟା ଥିବା ଜଣାପଡିଛି । ଘଟଣା ସମ୍ପର୍କରେ ଖବର ପାଇ ଦମକଳ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ପ୍ରାୟ ଏକ ଘଣ୍ଟା ମଧ୍ୟରେ ନିଆଁକୁ ଆୟତ୍ତ କରିଥିଲେ । ପ୍ରାଥମିକ ଏହା ଏକ ଘରୋଇ ବିମାନ ଥିବା ସୂଚନା ମିଳିଛି । ତେବେ ଦୁର୍ଘଟଣାର ପ୍ରକୃତ କାରଣ କ’ଣ ଜାଣିବାକୁ ବର୍ତ୍ତମାନ ତାହାର ତଦନ୍ତ ଚାଲିଛି ।ପୁଲିସର ସୂଚନା ଅନୁସାରେ, ଶନିବାର ମଣ୍ଟ୍ରିଆଲ୍ ସହରଠାରୁ ଦକ୍ଷିଣ-ପୂର୍ବ ଦିଗରେ ଏହି ହେଲିକପ୍ଟର ଦୁର୍ଘଟଣା ଘଟିଥିଲା। ମଣ୍ଟ୍ରିଆଲ୍ଠାରୁ ପ୍ରାୟ ୫୦ କିଲୋମିଟର ଦୂରରେ ଥିବା ସେଣ୍ଟ-ବ୍ରିଜିଡ୍-ଡି’ଇବରଭିଲ୍ ଅଞ୍ଚଳରେ ଦିନ ପ୍ରାୟ ୨ଟା ୩୦ ମିନିଟ୍ ସମୟରେ ହେଲିକପ୍ଟରଟି ଦୁର୍ଘଟଣାଗ୍ରସ୍ତ ହୋଇଥିଲା। କ୍ୟୁବେକ୍ ପ୍ରାଦେଶିକ ପୁଲିସର ମୁଖପାତ୍ର ଅଡ୍ରେ-ଆନି ବିଲୋଡୋ କହିଛନ୍ତି ଯେ, ଦୁର୍ଘଟଣା ପୂର୍ବରୁ ହେଲିକପ୍ଟରରେ କିଛି ସମସ୍ୟା ଦେଖାଦେଇଥିଲା।
ଦୁର୍ଘଟଣାର ପ୍ରାୟ ଏକ ଘଣ୍ଟା ମଧ୍ୟରେ ଦମକଳ କର୍ମଚାରୀମାନେ ହେଲିକପ୍ଟରରେ ଲାଗିଥିବା ନିଆଁକୁ ଲିଭାଇ ଦେଇଥିଲେ। ତେବେ ହେଲିକପ୍ଟରରେ ଥିବା ସମସ୍ତ ଚାରି ଜଣଙ୍କୁ ଘଟଣାସ୍ଥଳରେ ହିଁ ମୃତ ଘୋଷଣା କରାଯାଇଥିଲା। ମୃତକମାନଙ୍କ ପରିଚୟ ପ୍ରାଦେଶିକ ପୁଲିସ ପକ୍ଷରୁ ଏପର୍ଯ୍ୟନ୍ତ ପ୍ରକାଶ କରାଯାଇନାହିଁ। ଦୁର୍ଘଟଣାର କାରଣ ମଧ୍ୟ ସ୍ପଷ୍ଟ ହୋଇନାହିଁ। ହେଲିକପ୍ଟରଟି ଏକ ଘରୋଇ ବିମାନ ଥିବା ଅନୁମାନ କରାଯାଉଛି। କାନାଡାର ଟ୍ରାନ୍ସପୋର୍ଟେସନ୍ ସେଫ୍ଟି ବୋର୍ଡ ପକ୍ଷରୁ ଦୁର୍ଘଟଣାସ୍ଥଳକୁ ତଦନ୍ତକାରୀ ଦଳ ପଠାଯାଇଛି। ଏହା ପୂର୍ବରୁ ଆମେରିକାର ୟୋସେମିଟି ନ୍ୟାସନାଲ୍ ପାର୍କରେ ଜଙ୍ଗଲ ନିଆଁ ଲିଭାଇବା ପାଇଁ ପାଣି ପକାଉଥିବା ବେଳେ ଦୁଇଟି ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଘଟଣାରେ ଉଭୟ ହେଲିକପ୍ଟରର ପାଇଲଟ୍ଙ୍କ ମୃତ୍ୟୁ ହୋଇଥିଲା। ରବିବାର ଅପରାହ୍ନରେ ଏହି ଦୁର୍ଘଟଣା ଘଟିଥିଲା। ଉଭୟ ହେଲିକପ୍ଟରରେ କେବଳ ପାଇଲଟ୍ମାନେ ଥିଲେ ଏବଂ ସେମାନେ ‘ପ୍ରିସିଜନ୍’ ନାମକ ଏକ କଣ୍ଟ୍ରାକ୍ଟ ଏୟାରକ୍ରାଫ୍ଟ କମ୍ପାନୀ ପାଇଁ କାମ କରୁଥିଲେ।
