ନୂଆଦିଲ୍ଲୀ : ଜି-୨୦ ନୂଆଦିଲ୍ଲୀ ନେତାଙ୍କ ଘୋଷଣାନାମାରେ ୟୁକ୍ରେନରେ ‘ଏକ ବ୍ୟାପକ, ନ୍ୟାୟପୂର୍ଣ୍ଣ ଏବଂ ସ୍ଥାୟୀ ଶାନ୍ତି ପ୍ରତିଷ୍ଠା’ ପାଇଁ ଆହ୍ଵାନ ଦିଆଯାଇଛି। ଏହାବ୍ୟତୀତ ସଦସ୍ୟ ରାଷ୍ଟ୍ରମାନଙ୍କୁ ମଧ୍ୟ ‘ଆଞ୍ଚଳିକ ଅଧିଗ୍ରହଣ ପାଇଁ ବଳ ପ୍ରୟୋଗର ଧମକ କିମ୍ବା କୌଣସି ରାଷ୍ଟ୍ରର ଆଞ୍ଚଳିକ ଅଖଣ୍ଡତାକୁ କ୍ଷୁଣ୍ଣ କରିପାରେ ବୋଲି ଉଲ୍ଲେଖ କରି ଏପ୍ରକାରର କୌଣସି କାର୍ଯ୍ୟରୁ ଦୂରେଇ ରହିବାକୁ’ ଅନୁରୋଧ କରାଯାଇଛି। ଆଣବିକ ଅସ୍ତ୍ର ଶସ୍ତ୍ରର ବ୍ୟବହାର କିମ୍ବା ଧମକକୁ ‘ଅଗ୍ରହଣୀୟ’ ବୋଲି ମଧ୍ୟ ଘୋଷଣାନାମାରେ ଗୁରୁତ୍ୱାରୋପ କରାଯାଇଛି।‘ୟୁକ୍ରେନର ଯୁଦ୍ଧ ସମ୍ପର୍କରେ ବାଲିରେ ହୋଇଥିବା ଆଲୋଚନାକୁ ମନେ ପକାଇ ଆମେ ଜାତିସଂଘ ନିରାପତ୍ତା ପରିଷଦ ଏବଂ ଜାତିସଂଘ ସାଧାରଣ ସଭା (ଏ/ଆରଇଏସ୍/ଇଏସ୍-୧୧/୧ ଏବଂ ଏ/ଆରଇଏସ୍/ଇଏସ୍-୧୧/୬)ରେ ଗୃହୀତ ଆମର ଜାତୀୟ ଆଭିମୁଖ୍ୟ ଏବଂ ସଂକଳ୍ପଗୁଡ଼ିକୁ ଦୋହରାଇଥିଲୁ ଏବଂ ସମସ୍ତ ରାଷ୍ଟ୍ର ଜାତିସଂଘର ଉଦ୍ଦେଶ୍ୟ ଏବଂ ନୀତି ଅନୁଯାୟୀ କାର୍ଯ୍ୟ କରିବା ଉଚିତ ବୋଲି ଗୁରୁତ୍ୱାରୋପ କରିଥିଲୁ,’ ବୋଲି ଘୋଷଣାପତ୍ରରେ କୁହାଯାଇଛି।‘ଜାତିସଂଘର ଚାର୍ଟର ଅନୁଯାୟୀ, କୌଣସି ରାଷ୍ଟ୍ରର ଆଞ୍ଚଳିକ ଅଖଣ୍ଡତା ଏବଂ ସାର୍ବଭୌମତ୍ୱ କିମ୍ବା ରାଜନୈତିକ ସ୍ୱାଧୀନତା ବିରୋଧରେ ଆଞ୍ଚଳିକ ଅଧିଗ୍ରହଣ ପାଇଁ ସମସ୍ତ ରାଷ୍ଟ୍ର ଧମକ କିମ୍ବା ବଳ ପ୍ରୟୋଗରୁ ଦୂରେଇ ରହିବା ଉଚିତ୍। ଆଣବିକ ଅସ୍ତ୍ରର ବ୍ୟବହାର କିମ୍ବା ଧମକ ଗ୍ରହଣୀୟ ନୁହେଁ’ ବୋଲି ଏଥିରେ କୁହାଯାଇଛି।
ୟୁକ୍ରେନ ଯୁଦ୍ଧ ନେଇ ଜି-୨୦ ଦିଲ୍ଲୀ ଘୋଷଣାନାମା: ‘ଆଣବିକ-ଅସ୍ତ୍ରଶସ୍ତ୍ରର ଧମକ କିମ୍ବା ବ୍ୟବହାର ଗ୍ରହଣୀୟ ନୁହେଁ’
