ବ୍ରହ୍ମପୁର: ବାପାଙ୍କୁ ହତ୍ୟା ଉଦ୍ୟମ କରିଥିବା ଅଭିଯୋଗରେ ପୁଲିସ ପୁଅ ସମେତ ତାଙ୍କ ବନ୍ଧୁଙ୍କୁ ଗିରଫ କରିଛି । ଅଭିଯୁକ୍ତମାନେ ହେଲେ ମୋଚି ସାହିର ଏ. ଭେଙ୍କଟରମଣଙ୍କ ପୁଅ ଏ. ସୁରଜ ଓ ତାଙ୍କ ସହଯୋଗୀ ଖାଲାସୀ ସାହିର ଜି. ଶ୍ୟାମ ବୋଲି ପୁଲିସ କହିଛି । ଘଟଣାରେ ବ୍ୟବହୃତ ଖଣ୍ଡା ପୁଲିସ ସେମାନଙ୍କ ନିକଟରୁ ଜବତ କରିଛି । ଏକ ମାମଲା ରୁଜୁ କରି ଆଜି ଉଭୟ ଅଭିଯୁକ୍ତଙ୍କୁ ପୁଲିସ କୋର୍ଟ ଚାଲାଣ କରିଛି । ସୂଚନାଯୋଗ୍ୟ ଯେ ଭେଙ୍କଟରମଣଙ୍କ ପୁଅ ଏ. ସୁରଜ ଘର ଲୋକଙ୍କ ଅନିଚ୍ଛା ସତ୍ତ୍ୱେ କିଛିଦିନ ତଳେ ଅନ୍ୟ ଜାତିର ଏକ ଝିଅକୁ ବିବାହ କରିଥିଲେ । ଭେଙ୍କଟରମଣ ପୁଅ ଓ ବୋହୂକୁ ଘରେ ରହିବାକୁ ଅନୁମତି ଦେଇନଥିଲେ ।
ଫଳରେ ସୁରଜ ଓ ତାଙ୍କ ବାପାଙ୍କ ମଧ୍ୟରେ ଏହାକୁ କେନ୍ଦ୍ର କରି ଝଗଡା ହୋଇଥିଲା । ଗୁରୁବାର ରାତି ସାଢେ ୧୦ଟାବେଳେ ସୁରଜ ଓ ତାଙ୍କ ସହଯୋଗୀ ଶ୍ୟାମ ମୋଚି ସାହିରେ ପହଞ୍ଚିଥିଲେ । ସୁରଜ ଏକ ଖଣ୍ଡାରେ ତାଙ୍କ ବାପାଙ୍କୁ ହାଣିବା ପାଇଁ ଉଦ୍ୟମ କରିଥିଲେ । ଘରେ ଥିବା ସୁରଜଙ୍କ ଅନ୍ୟ ଏକ ଭାଇ ଏ .ରସିବତ ଏହାର ପ୍ରତିବାଦ କରିଥିଲେ । ଏଥିରେ ଭେଙ୍କଟରମଣ ଓ ରସିବତ ଆହତ ହୋଇଥିଲେ । ପରେ ସେମାନେ ଏନେଇ ଥାନାରେ ଅଭିଯୋଗ କରିବା ବେଳେ ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରି ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ।
