ମୋହନା : ଗଜପତି ଜ଼ିଲ୍ଲା ଅଡବା ଥାନା ଅନ୍ତର୍ଗତ ଖ୍ରୀଷ୍ଟପୁର ଗ୍ରାମ ନିକଟ ବୁଲାଣି ରାସ୍ତାରେ ଆଜି ସକାଳ ସମୟ ପ୍ରାୟ ୭ଟାରେ ଭାରସାମ୍ୟ ହରାଇ ଏକ କାର୍ ଦୁର୍ଘଟଣା ଗ୍ରସ୍ତ ହୋଇଛି । ଦୁର୍ଘଟଣାରେ କାରଟି ରାସ୍ତାରୁ ୧୫ ଫୁଟ ତଳକୁ ଖସିଯାଇଥିଲା। ପୁରୀରୁ ସମ୍ପର୍କୀୟ ପରିବାରର ୫ଜଣ ସଦସ୍ୟ ମିଳିତ ଭାବେ କାର ଯୋଗେ କୌଣସି କାମରେ ଜୟପୁର ବାଲିସାହି ଯାଉଥିବା ବେଳେ ଖ୍ରୀଷ୍ଟପୁର ଗ୍ରାମ ନିକଟ ବୁଲାଣିରେ ଡ୍ରାଇଭରଙ୍କ ଆଖିଲାଗିଯିବରୁ ଏହି ଦୁର୍ଘଟଣା ଘଟିଛି ।
ଆହତ ମାନଙ୍କ ମଧ୍ୟରେ ଜଣେ ମହିଳା ଏବଂ ୪ ଜଣ ପୁରୁଷ ଅଛନ୍ତି । ଆହତ ମାନେ ହେଲେ ନରେଶ ପଣ୍ଡା, ଦିଲ୍ଲୀପ ରଥ, ରାମଚନ୍ଦ୍ର ମିଶ୍ର, ଦେବାଶିଷ ପଟ୍ଟନାୟକ ଏବଂ ସରୋଜିନୀ ରଥ । ଗୁରୁତର ମାନଙ୍କ ମୁଣ୍ଡ, ଗୋଡ,ଛାତି, ହାତ,ଅଣ୍ଟାରେ ଗଭୀର ଆଘାତ ଲାଗିଛି। ଆହତ ମାନଙ୍କୁ ପ୍ରଥମେ ମୋହନା ସ୍ୱାସ୍ଥ୍ୟକେନ୍ଦ୍ରରେ ଭର୍ତି କରାଯାଇଥିଲା। ପରେ ୩ ଜଣଙ୍କ ସ୍ୱାସ୍ଥ୍ୟବସ୍ଥା ଗୁରୁତର ଥିବାରୁ ସେମାନଙ୍କୁ ୧୦୮ରେ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତର କରାଯାଇଥିବା ଡକ୍ଟର ଜୟ କୁମାର ପଣ୍ଡା କହିଛନ୍ତି।
