ଦାରିଙ୍ଗବାଡ଼ି : ଦାରିଙ୍ଗବାଡ଼ି ଅଞ୍ଚଳରେ ଶୀତ ନିଆଁ ପୁଇଁବା ମହଙ୍ଗା ପଡିଛି । ଏହି ନିଆଁରୁ ସୋମବାର ୧୨ ବଖରା ଜଳିଯାଇଛି । ୪ ପରିବାର ବାସହରା ସହ ସର୍ବସ୍ୱାନ୍ତ ହୋଇପଡିଛନ୍ତି । ବର୍ତ୍ତମାନ ଦାରିଙ୍ଗବାଡି ଅଞ୍ଚଳରେ ପ୍ରବଳ ଶୀତ ଅନୁଭୂତ ହେଉଛି । ଲୋକେ ଘରେ ଓ ବାହାରେ ନିଆଁ ଲଗାଇ ପୁଇଁବାରେ ଲାଗିଛନ୍ତି । ହେଲେ ରବିବାର ରାତିରେ ସୋନପୁର ପଞ୍ଚାୟତର ଉପରସାହିରେ ନିଆଁ ଲଗାଇ ଲୋକେ ପୁଉଁଥିଲେ । ସେହି ନିଆଁ ୪ ପରିବାରକୁ ସର୍ବସ୍ୱାନ୍ତ କରିଦେଇଛି । ପ୍ରଥମେ ନିଆଁ ଲାଗିବାର କେହି ଜାଣିନଥିଲେ । ଜଣଙ୍କ ଘରେ ନିଆଁ ଲାଗିଥିବାବେଳେ ଏହା ଘରକୁ ଘର ବ୍ୟାପୀ ଯାଇଥିଲା ।
ଅଘଟଣ ହେବା ଭଳି ସମସ୍ତେ ବାହାରକୁ ଚାଲି ଆସିଥିଲେ । ଫଳରେ କୌଣସି ଜିନିଷପତ୍ର ସେମାନେ ବାହାରକୁ ଆଣିପାରିନଥିଲେ । ଚାହୁଁ ଚାହୁଁ ୧୨ ବଖରା ନିଆଁ ଗିଳି ଦେଇଥିଲା । ଦାରିଙ୍ଗବାଡି ଅଗ୍ନିଶମ ବିଭାଗ ନିଆଁକୁ ଆୟତ କରିଥିଲା । କିନ୍ତୁ ଘରୁ କୌଣସି ଆସବାବପତ୍ର ଉଦ୍ଧାରେ ହୋଇପାରି ନାହିଁ । କିନ୍ତୁ କେହି ହେଲେ ଆହତ ହୋଇନାହାନ୍ତି । ନିଆଁ ଲାଗିବାର କାରଣ ଜଣାପଡ଼ିନଥିବା ବେଳେ ଶୀତ ଦାଉରୁ ରକ୍ଷା ପାଇବା ପାଇଁ ଘରେ ଲଗାଯାଉଥିବା ନିଆଁ ଯୋଗୁଁ ଏହିଭଳି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି । ସୋମବାର ତହସିଲଦାର କଳାକୃଷ୍ଣ ପ୍ରଧାନଙ୍କ ନିର୍ଦ୍ଦେଶକ୍ରମେ ସ୍ଥାନୀୟ ରାଜସ୍ୱନିରୀକ୍ଷକ କ୍ଷୟକ୍ଷତି ଆକଳନ କରିଛନ୍ତି ।
