ଭୁବନେଶ୍ୱର: ନବମ, ଏକାଦଶ ଶ୍ରେଣୀ କ୍ଲାସ ବନ୍ଦ ଘୋଷଣା କରାଯାଇଛି । ସରକାରୀ, ଅନୁଦାନପ୍ରାପ୍ତ ଏବଂ ଘରୋଇ ସ୍କୁଲରେ କ୍ଲାସ ବନ୍ଦ କରାଯିବ । ବର୍ତମାନର କରୋନା ସ୍ଥିତି ଦେଖିବା ପରେ ରାଜ୍ୟ ସରକାର ଏହି ଘୋଷଣା କରିଛନ୍ତି । ଏପ୍ରିଲ ୮ରୁ ୩୦ ପର୍ଯ୍ୟନ୍ତ କ୍ଲାସ ବନ୍ଦ ପାଇଁ ସରକାର ନିର୍ଦ୍ଦେଶ ଦେଇଛନ୍ତି । ଉପରୋକ୍ତ ଦୁଇ ଶ୍ରେଣୀର ପିଲା ଯଦି ହଷ୍ଟେଲ, ଆବାସିକ ସ୍କୁଲରେ ପଢୁଛନ୍ତି, ସେମାନଙ୍କୁ ଘରକୁ ଚାଲିଯିବାକୁ ନିର୍ଦ୍ଦେଶ ଦିଆଯାଇଛି । ତେବେ ଦଶମ ଓ ଦ୍ୱାଦଶ କ୍ଲାସ ୨୫ ପର୍ଯ୍ୟନ୍ତ ଚାଲୁ ରଖିବାକୁ ସରକାର ନିର୍ଦ୍ଦେଶ ଦେଇଛନ୍ତି । ବର୍ତମାନ ରାଜ୍ୟରେ କରୋନା ସଂକ୍ରମଣ ବୃଦ୍ଧି ପାଇଛି । ଗତବର୍ଷ ତୁଳନାରେ ଚଳିତ ବର୍ଷ କରୋନା ଲମ୍ବା ଡିଆଁ ମାରୁଛି । ଦୃତ ବେଗରେ ମାଡୁଛି ସଂକ୍ରମଣ । ସମସ୍ତ ପରିସ୍ଥିତିକୁ ଦୃଷ୍ଟିରେ ରଖି ସରକାର ଏହି ପଦକ୍ଷେପ ନେଇଛନ୍ତି । ବର୍ତମାନ ଯେଉଁପରି ଭାବରେ ସଂକ୍ରମଣ ବ୍ୟାପୁଛି, ଯଦି ଏ ସମୟରେ ପିଲା ସ୍କୁଲ ଯାଆନ୍ତି, ତେବେ ଏହା ଆହୁରି ବଢିବାର ଆଶଙ୍କା ରହୁଛି । ଆଗକୁ ଯଦି ସ୍ଥିତି ଗମ୍ଭୀର ହୁଏ, ତେବେ ପୁଣି ଅନଲାଇନ କ୍ଲାସ ମଧ୍ୟ ଆରମ୍ଭ ହୋଇପାରେ ।
