ୱାଶିଂଟନ: ଆମେରିକା ରାଷ୍ଟ୍ରପତିଙ୍କ ସରକାରୀ ବାସଭବନ ହ୍ୱାଇଟ୍ ହାଉସ୍ ପରିସରରୁ ଏକ କୋକେନ୍ (ମାଦକଦ୍ରବ୍ୟ) ପାଉଚ୍ ଜବତ କରାଯାଇଛି । କଡା ନିରାପତ୍ତା ବଳୟ ମଧ୍ୟରେ ଥିବା ହ୍ୱାଇଟ୍ ହାଉସ୍ ପରିସରକୁ ଏହା କିପରି ଆସିଲା ଏବଂ ଏଥିରେ କିଏ ସଂପୃକ୍ତ, ତାହା ଯାଞ୍ଚ କରିବାକୁ ରାଷ୍ଟ୍ରପତିଙ୍କ ସୁରକ୍ଷା ଦାୟିତ୍ୱରେ ଥିବା ସିକ୍ରେଟ୍ ସର୍ଭିସ ଏଜେଣ୍ଟମାନେ ତତ୍ପର ହୋଇଉଠିଛନ୍ତି । ଜୁଲାଇ ୨ରେ ହ୍ୱାଇଟ୍ ହାଉସ୍ର ୱେଷ୍ଟ୍ ୱିଙ୍ଗ୍ ପ୍ରବେଶ ପଥରୁ କୋକେନ୍ ପାଉଚ୍ ଠାବ କରାଯାଇଛି ।
ବିଶେଷଜ୍ଞ ଦଳ ଘଟଣାସ୍ଥଳରେ ପହଞ୍ଚି ଯାଞ୍ଚ କରିବାପରେ ଏହା କୋକେନ୍ ବୋଲି ଜଣାପଡିଛି । ତେବେ ପାଉଚ୍ ଉପରେ କୌଣସି ଅଙ୍ଗୁଳିଛାପ ନଥିବାରୁ ଅଭିଯୁକ୍ତଙ୍କୁ ଠାବ କରିବା କଷ୍ଟକର ହୋଇପଡିଥିବା କୁହାଯାଇଛି । ହ୍ୱାଇଟ୍ ହାଉସ୍ରେ ଶତାଧିକ କର୍ମଚାରୀ କାର୍ଯ୍ୟରତ ଥିବାବେଳେ ବ୍ୟକ୍ତିଗତଭାବେ ସମସ୍ତଙ୍କୁ ଜେରା କରିବା ମଧ୍ୟ ସମସ୍ୟା ସୃଷ୍ଟି କରିଛି । ସୂଚନାଯୋଗ୍ୟ ରାଷ୍ଟ୍ରପତି ଜୋ ବାଇଡେନ୍ଙ୍କ ପୁଅ ହଣ୍ଟର ପୂର୍ବରୁ ନିଶାସକ୍ତ ଥିବାବେଳେ କୋକେନ୍ ସେବନ କରୁଥିବାର ପ୍ରମାଣ ରହିଛି ।
