ନୂଆଦିଲ୍ଲୀ: ଓସ୍କାର ପାଇଁ ମନୋନୀତ ହୋଇଥିବା ଫିଲ୍ମ ‘ଛେଲୋ ଶୋ’ର ଶିଶୁ କଳାକାର ରାହୁଲ କୋଲିଙ୍କ ପରଲୋକ ଘଟିଛି । ମାତ୍ର ୧୦ ବର୍ଷ ବୟସରେ ରାହୁଲ ଆରପାରିକୁ ଚାଲିଯାଇଛନ୍ତି । ରାହୁଲ ତାଙ୍କର ପରିବାର ସହ ଗୁଜରାଟର ଜାମନଗରରେ ରହୁଥିବା ବେଳେ ତାଙ୍କର ମୃତ୍ୟୁରେ ବନ୍ଧୁ, ପରିଜନ ସହ ଫିଲ୍ମ ଇଣ୍ଡଷ୍ଟ୍ରିରେ ଶୋକର ଲହରୀ ଖେଳିଯାଇଛି ।
ରାହୁଲଙ୍କ ପିତା ରାମୁ ଅଟୋ ରିକ୍ସା ଚଳାଉଥିବା ବେଳେ ପୁତ୍ରର ମୃତ୍ୟୁରେ ସେ ଗଭୀର ଭାବେ ଭାଙ୍ଗି ପଡ଼ିଛନ୍ତି । ଏନେଇ ରାମୁ କହିଛନ୍ତି, ଅକ୍ଟୋବର ୧୪ରେ ରାହୁଲର ଫିଲ୍ମ ରିଲିଜ୍ ହେବାର ଥିଲା । ଫିଲ୍ମ ରିଲିଜ ହେବା ପରେ ଆମର ଜୀବନ ପରିବର୍ତ୍ତନ ହୋଇଯିବ ବୋଲି ରାହୁଲ ମୋତେ ଆଶ୍ୱାସନା ଦେଇଥିଲା । ମାତ୍ର ତା’ ପୂର୍ବରୁ ସେ ଆମକୁ ଛାଡ଼ି ସବୁଦିନ ପାଇଁ ଚାଲିଗଲା ।
