ଚଣ୍ଡିଗଡ: ଚଣ୍ଡିଗଡ଼ର ଜିଲ୍ଲା କୋର୍ଟ ପରିସରରେ ବୋମା ସୂଚନା ମିଳିବା ପରେ ମଙ୍ଗଳବାର ସେଠାରେ ହଡ଼କମ୍ପ ସୃଷ୍ଟି ହୋଇଥିଲା । ପୁଲିସକୁ ମିଳିଥିବା ଏକ ଚିଠିରେ ଦର୍ଶାଯାଇଥିଲା ଜୁଡ଼ିସିଆଲ୍ କୋର୍ଟ ପରିସରରେ ଥିବା ଏକ ଗାଡ଼ି ବୋମା ରଖାଯାଇଛି ଏବଂ ଏହା ଅପରାହ୍ଣ ଗୋଟାଏ ବେଳେ ବିସ୍ଫୋରଣ ହେବ । ସୂଚନା ମିଳିବା ପରେ ବହୁ ସଂଖ୍ୟକ ପୁଲିସ ଫୋର୍ସ ଘଟଣାସ୍ଥଳରେ ପହଞ୍ଚି ପୂରା କୋର୍ଟ ପରିସରକୁ ଖାଲି କରିବା ସହିତ ସମଗ୍ର ଅଞ୍ଚଳକୁ ସିଲ୍ କରିଦେଇଥିଲେ । ସମସ୍ତ ଓକିଲଙ୍କୁ ବାହାରେ ରହିବାକୁ କୁହାଯାଇଥିଲା । ଏହାପରେ ଅପରେସନ୍ ସେଲ୍ର କମାଣ୍ଡୋ, ଡଗ୍ ସ୍କ୍ୱାଡ୍, ବୋମା ନିଷ୍ପ୍ରିୟକାରୀ ଟିମ୍ ଏବଂ ରିଜର୍ଭ ଫୋର୍ସ ପହଞ୍ଚି ୪ ଘଣ୍ଟା ସର୍ଚ୍ଚ ଅପରେସନ୍ ଚଳାଇଥିଲେ ।
ସେହିପରି ସେଠାରେ ଫାୟାର୍ ବ୍ରିଗେଡ୍ ମଧ୍ୟ ମୁତୟନ କରାଯାଇଥିଲା । ସର୍ଚ୍ଚ ବେଳେ ଟିଫିନ୍ ଓ ପାଣି ବୋତଲ ଥିବା ଏକ ସନ୍ଦିଗ୍ଧ କ୍ୟାରୀବ୍ୟାଗ୍ ମିଳିଥିଲା । ଯାଞ୍ଚ୍ ପାଇଁ ଚଣ୍ଡିମନ୍ଦିରରୁ ଆର୍ମି ଟିମ୍କୁ ଡକାଯାଇଥିଲା । ଆର୍ମି ଟିମ୍ର ଯାଞ୍ଚ୍ରୁ ସେଥିରେ କୌଣସି ସନ୍ଦିଗ୍ଧ ବସ୍ତୁ ନଥିବା ଜଣାପଡ଼ିବା ପରେ ସର୍ଚ୍ଚ ଅପରେସନ୍ ଶେଷ ହୋଇଥିଲା । କୋର୍ଟକୁ ଲାଗିଥିବା ବସ୍ଷ୍ଟାଣ୍ଡ୍ରେ ମଧ୍ୟ ସର୍ଚ୍ଚ ଅପରେସନ୍ କରାଯାଇଥିଲା । ଚଣ୍ଡିଗଡ଼ ଜିଲ୍ଲା କୋର୍ଟ ବ୍ୟତୀତ ପଞ୍ଚକୁଳା ଅଦାଲତରେ ମଧ୍ୟ ସମାନ ଧରଣର ଧମକ ମିଳିଥିଲା । ସେଠାରେ ମଧ୍ୟ ଓକିଲ, ଷ୍ଟାଫ୍ ଏବଂ ଅନ୍ୟ ଲୋକଙ୍କୁ ବାହାର କରି ପୁଲିସ ସର୍ଚ୍ଚ କରିଥିଲା । ଅନ୍ୟପକ୍ଷରେ ଏହି ଧମକକୁ ଦୃଷ୍ଟିରେ ପଞ୍ଜାବ ଏବଂ ହରିଆନା ହାଇକୋର୍ଟରେ ପୁଲିସ ସୁରକ୍ଷା ବଢ଼ାଇ ଦିଆଯାଇଥିଲା ।
