ବାଇକ୍ ସ୍କୁଟି ମୁହାଁମୁହିଁ ଧକ୍କା: ୨ ମୃତ, ୩ ଗୁରୁତର

କେନ୍ଦୁଝର: କେନ୍ଦୁଝର ଜିଲ୍ଲା ୨୨୦ ନମ୍ବର ଜାତୀୟ ରାଜପଥର ପାଟଣା-ଢେଙ୍କିକୋଟ୍ ରାସ୍ତାର କପାସପଡ଼ା ଠାରେ ଏକ ସଡକ ଦୁର୍ଘଟଣାରେ ୨ ଜଣ ପ୍ରାଣ ହରାଇଥିବା ବେଳେ ୩ ଜଣ ଆହତ ହୋଇଛନ୍ତି । ମଙ୍ଗଳବାର ପୂର୍ବାହ୍ନ ସାଢ଼େ ଦଶଟା ସମୟରେ ପାଟଣା ବ୍ଲକ ଡୁମୁରିଆ ପଞ୍ଚାୟତ ତଣ୍ଡୋ ଗ୍ରାମର ମିତ୍ରଭାନୁ ବେହେରା(୪୦) ଓ ସ୍ତ୍ରୀ ସୁରେଖା ବେହେରା ନିଜ ବାଇକ୍‌ରେ ଢେଙ୍କିକୋଟ ଅଭିମୁଖେ ଯାଉଥିବା ବେଳେ ପଣ୍ଡାପଡା ଅଞ୍ଚଳ କାଣ୍ଡଶର ଗ୍ରାମର ଯଦୁ ମୁଣ୍ଡା(୨୬) ଏକ ସ୍କୁଟିରେ ପଣ୍ଡାପଡ଼ା ଥାନା ଅନ୍ତର୍ଗତ କାଣ୍ଡଶର ଗ୍ରାମରୁ ଭଉଣୀ ଓ ଭିଣେଇକୁ ପାଟଣା ବ୍ଲକ ଅନ୍ତର୍ଗତ ପଲାଣଘାଟି ପଞ୍ଚାୟତ ଷଡଙ୍ଗବାହାଳୀ ଗ୍ରାମକୁ ଛାଡ଼ିବାକୁ ଯାଉଥିଲେ । କପାସପଡ଼ା ବୁଲାଣିରେ ବାଇକ୍ ସହ ସ୍କୁଟିର ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣା ସ୍ଥଳରେ ଯଦୁ ମୁଣ୍ଡାଙ୍କ ମୃତ୍ୟୁ ଘଟିଥିବା ବେଳେ ସ୍ଥାନୀୟ ଲୋକେ ଅନ୍ୟ ଚାରି ଜଣଙ୍କୁ ପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ହେଲେ ଚିକିତ୍ସାଧିନ ଅବସ୍ଥାରେ ମିତ୍ରଭାନୁ ବେହେରାଙ୍କ ମୃତ୍ୟୁ ଘଟିଥିଲା । ଭବାନୀ ମୁଣ୍ଡା ଓ ସୁରେଖା ବେହେରା ଆହତ ହେଇଥିବାବେଳେ ଗୋପବନ୍ଧୁ ମୁଣ୍ଡା ଗୁରୁତର ଥିବାରୁ ତାଙ୍କୁ କେନ୍ଦୁଝର ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଛି । ଢେଙ୍କିକୋଟ ଫାଣ୍ଡି ଅଧିକାରୀ ତ୍ରିନାଥ ନାଏକ ଘଟଣାର ତଦନ୍ତ କରିବା ସହ ପାଟଣାରେ ୨ମୃତକଙ୍କ ଶବ ବ୍ୟବଚ୍ଛେଦ କରାଇଛନ୍ତି ।