ନୟାଗଡ଼: ନୟାଗଡ଼ ଜିଲ୍ଲା ଓଡ଼ଗାଁ ଆଦର୍ଶ ଥାନା ସୁନାମୁହିଁ ପଞ୍ଚାୟତ ଖଙ୍ଗାରପଲ୍ଲୀ ସଂରକ୍ଷିତ ଜଙ୍ଗଲ ମଧ୍ୟରେ ଶୁକ୍ରବାର ବିଳମ୍ବିତ ରାତିରେ ସଡ଼କ ଦୁର୍ଘଟଣାରେ ବାଇକ ଆରୋହୀଙ୍କ ମୃତ୍ୟୁ ହୋଇଛି । ଏ ଦୁର୍ଘଟଣାରେ ଜଣେ ଗୁରୁତର ଆହତ ହୋଇଛନ୍ତି । ମୃତ ଯୁବକ ଜଣକ ଜଗନ୍ନାଥ ପ୍ରସାଦ ଥାନା ଚାଞ୍ଚେରାପଲ୍ଲୀ ଗ୍ରାମର ୨୨ ବର୍ଷୀୟ ସରୋଜ କୁମାର ପ୍ରଧାନ ଓ ଗୁରୁତର ଜଣକ ୧୮ ବର୍ଷୀୟ ସଗ୍ରାମ ନାୟକ ।
ସୂଚନାନୁଯାୟୀ, ସରୋଜ ଓ ସଂଗ୍ରାମ ଦୁଇସାଙ୍ଗ ନୂଆଗାଁ ବ୍ଲକ ଅନ୍ତର୍ଗତ ବେରୁଆବାରୀ ପଞ୍ଚାୟତର ବଧୀଲିପୁରୁ ଗ୍ରାମରେ ଏକ ମାଲିକଙ୍କ ପାଖରେ ଜେସିବି ଅପେରେଟର ଭାବେ କାର୍ୟ୍ୟ କରୁଥିଲେ । ନିଜ ଗାଁରେ ଯାତ୍ରା ହେଉଥିବାରୁ ଯାତ୍ରା ଦେଖିବାକୁ ନିଜ ଗାଁ ଚାଞ୍ଚେରାପଲ୍ଲୀ ଅଭିମୁଖେ ବାଇକ ନଂ ଓ ଆର ୦୨ ଏଲ ୫୯୯୮ ଯୋଗେ ଫେରୁଥିବା ସମୟରେ ଏକ ବୋଲେରୋ ପିକଅପ ଗାଡ଼ି ନଂ ଓଡି ୨୫ ଜି ୨୮୯୬ ଧକ୍କା ଦେବାରୁ ଉଭୟ ଘଟଣାସ୍ଥଳରେ ଅଚେତ ହୋଇ ପଡ଼ିଥିଲେ ।
ଘଟଣା ବିଷୟରେ ସ୍ଥାନୀୟ ଗ୍ରାମବାସୀ ଜାଣିବା ପରେ ପୋଲିସକୁ ଖବର ଦେଇଥିଲେ । ଓଡ଼ଗାଁ ପୋଲିସ ଓ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଓଡ଼ଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ ସୁଦ୍ଧା ଡାକ୍ତର ସରୋଜଙ୍କୁ ମୃତ ଘୋଷଣା କରିଥିଲେ । ସଂଗ୍ରାମଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ନୟାଗଡ଼ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ପରବର୍ତ୍ତୀ ମୂହୁର୍ତ୍ତରେ ତାଙ୍କୁ ଭୁବନେଶ୍ୱରକୁ ସ୍ଥାନାନ୍ତର କରାଯାଇଥିବା ଖବର ମିଳିଛି ।
