ମସ୍କୋ: ଡୋନେସ୍କ ସହରର ଏକ ମାର୍କେଟରେ ୟୁକ୍ରେନର ଡ୍ରୋନ ଆକ୍ରମଣ । ଏହି ହମଲାରେ ୨୫ ଜଣ ପ୍ରାଣ ହରାଇଥିବା ବେଳେ ୧୦ରୁ ଅଧିକ ଆହତ ହୋଇଛନ୍ତି । ଗୁରୁତରଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି । ରୁଷ କବ୍ଜାରେ ଏହି ସହର ରହିଛି । ତେଣୁ ଡୋନେସ୍କରେ ରୁଷ୍ ପକ୍ଷରୁ ନିଯୁକ୍ତ ପ୍ରଶାସକ ଡେନିସ ପୁସିଲିନ୍ ଏନେଇ ସୂଚନା ଦେଇଛନ୍ତି । ସେ କହିଛନ୍ତି, ଡ୍ରୋନ୍ ମାଧ୍ୟମରେ ଏହି ହମଲା ହୋଇଛି । ୟୁକ୍ରେନ ସେନା, ବୋମା ଓ ଗୋଳାମାଡ଼ କରିଛନ୍ତି । ଫଳରେ ବଜାରରେ ଥିବା ଅନେକ ଘର ଧ୍ୱଂସ ପାଇଯାଇଛି ।
ସେହିଭଳି ରୁଷର ଉଷ୍ଟ-ଲୁଗା ବନ୍ଦରରେ ଥିବା କେମିକାଲ ଟ୍ରାନ୍ସପୋର୍ଟ ଟର୍ମିନାଲରେ ଦୁଇଟି ପ୍ରଚଣ୍ଡ ବିସ୍ଫୋରଣ ହୋଇଛି । ୟୁକ୍ରେନର ଡ୍ରୋନ ଆକ୍ରମଣ ଫଳରେ ସେଠାରେ ଥିବା ଗ୍ୟାସ୍ ଟାଙ୍କିରେ ବିସ୍ଫୋରଣ ହୋଇଥିଲା । ଫଳରେ ଟର୍ମିନାଲ ସମ୍ପୂର୍ଣ୍ଣ ଭାବେ ଛାରଖାର ହୋଇଯାଇଛି । ସେଣ୍ଟପିଟର୍ସବର୍ଗ ଠାରୁ ଦକ୍ଷିଣ-ପଶ୍ଚିମ ୧୬୫ କି.ମି. ଦୂରରେ ଏହି ଟର୍ମିନାଲ ରହିଛି । ଏହା ହେଉଛି ରୁଷର ଦ୍ୱିତୀୟ ସର୍ବବୃହତ ପ୍ରାକୃତିକ ଗ୍ୟାସ୍ ଉତ୍ପାଦକ ନୋଭାଟେକର ଏକ ପ୍ରମୁଖ ଟର୍ମିନାଲ । ତେବେ ଟର୍ମିନାଲ କ୍ଷତିଗ୍ରସ୍ତ ହୋଇଥିଲେ ମଧ୍ୟ ଏଥିରେ କେହି ମୃତାହତ ହୋଇନାହାନ୍ତି । ଅନ୍ୟପକ୍ଷରେ ସମଗ୍ର ଅଞ୍ଚଳକୁ ହାଇଆଲର୍ଟରେ ରଖାଯାଇଛି ।
