ହାତୀ ଘଉଡ଼ାଉଥିବାବେଳେ ବନ କର୍ମଚାରୀଙ୍କୁ ଆକ୍ରମଣ, ୩ ଗିରଫ

ନାକଟିଦେଉଳ :  ନାକଟିଦେଉଳ ରେଞ୍ଜ୍ ଅଧିନସ୍ଥ କେଲୋବେନୀ ଗ୍ରାମରେ ହାତୀ ଘଉଡ଼ାଉଥିବା ବେଳେ  ବନବିଭାଗର କର୍ମଚାରୀଙ୍କୁ କେଲୋବେନୀ ଗ୍ରାମର ୩ ଜଣ ବ୍ୟକ୍ତି ମରଣାତ୍ମକ ଆକ୍ରମଣ କରିଥିବା ଅଭିଯୋଗ ହୋଇଛି । ଏନେଇ ଏକ ମାମଲା ରୁଜୁ ହେବା ପରେ ୩ ଅଭିଯୁକ୍ତଙ୍କୁ ଗିରଫ କରାଯାଇଛି । ସୂଚନା ଅନୁଯାୟୀ, ନାକଟିଦେଉଳ ରେଞ୍ଜ୍ ଅଧିନସ୍ଥ ବାଟଗାଁ ପଞ୍ଚାୟତ କେଲୋବେନୀ ଗ୍ରାମ ନିକଟସ୍ଥ ଜଙ୍ଗଲକୁ ହାତୀପଲ ପଳାଇ ଆସିଥିବା ଖବର ବନ ବିଭାଗ କର୍ମଚାରୀମାନେ ଜାଣି ପାରି କେଲୋବେନୀ ଗ୍ରାମକୁ ଯାଇ ହାତୀ ଘଉଡାଉଥିଲେ ।  ହିତସରା ଗ୍ରାମର ସୁଜିତ୍ ବାଗ୍  ହାତୀ ୱାଚର ଭାବରେ ମଧ୍ୟ ହାତୀ ଘଉଡ଼ାଇବା କାମରେ ନିୟୋଜିତ ଥିଲେ । ତେବେ କେଲୋବେନୀ ଗ୍ରାମର ୱାର୍ଡମେମ୍ବର ରମେଶ ବେହେରା, ପ୍ରମୋଦ ସାହୁ ଓ ଅଜିତ୍ କିସାନ୍ ପ୍ରମୁଖ ସଂଘବଦ୍ଧ ଭାବରେ ସୁଜିତ୍ ବାଗ୍‌ଙ୍କୁ ଆକ୍ରମଣ କରିଥିଲେ । ସୁଜିତଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା ଜଣାପଡ଼ିଛି । ତାଙ୍କୁ ନାକଟିଦେଉଳ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ସେ ଏବେ ସୁସ୍ଥଥିବା ଜଣାପଡ଼ିଛି । ପୂର୍ବ ଶତ୍ରୁତାକୁ ନେଇ ଏଭଳି ଘଟଣା ଘଟିଛି । ଗୁରୁତର ସୁଜିତ ନାକଟିଦେଉଳ ଥାନାରେ ଲିଖିତାକାରରେ ଅଭିଯୋଗ କରିବା ପରେ ନାକଟିଦେଉଳ ପୁଲିସ୍ ସେମାନଙ୍କୁ ଗିରଫ କରିବା ସହ ସେମାନଙ୍କୁ କୋର୍ଟଚାଲାଣ କରିଥିବା ନାକଟିଦେଉଳ ଥାନାଧିକାରୀ ବିଧୂଭୂଷଣ ମିଶ୍ର ପ୍ରକାଶ କରିଛନ୍ତି ।