ଜଗତସିଂହପୁର: ପୁଣି ଜଣେ ସୁନ୍ଦରୀଙ୍କ ସହ ଭାଇରାଲ ହେବାରେ ଲାଗିଛି ତିର୍ତ୍ତୋଲ ବିଧାୟକ ବିଜୟ ଦାସଙ୍କ ଫଟୋ । ପୂର୍ବରୁ ସୋମାଲିକା ନାମକ ଜଣେ ଯୁବତୀଙ୍କ ସହ ବିଜୟଙ୍କର ଫଟୋକୁ ନେଇ ଚର୍ଚ୍ଚା ଜୋର ଧରିଥିଲା । ଯାହାକୁ ନେଇ ବିରୋଧୀ ଦଳ ଗିରଫ ଦାବିରେ ରାଜରାସ୍ତା ହୁଲସ୍ତୁଲ କରିଥିଲେ । ଏହି ବିବାଦରେ ପୂର୍ଣ୍ଣଚ୍ଛେଦ ପଡିବା ପୂର୍ବରୁ ଆଉ ଜଣେ ଯୁବତୀଙ୍କ ସହ ତାଙ୍କର ଏକ ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଯାହାକୁ ନେଇ ଚର୍ଚ୍ଚା ପୁଣି ଆରମ୍ଭ ହୋଇଯାଇଛି ।
ତେବେ ଫଟୋରେ ଥିବା ଏହି ମହିଳା ଜଣକ କଟକର ଏବଂ ଜଗତସିଂହପୁରରେ ତାଙ୍କର ବିବାହ ହୋଇଥିଲା ବୋଲି କୁହାଯାଉଛି । ବିବାହ ପରେ ରାଜ୍ୟ ବାହାରେ ସଂସାର କରିଥିଲେ ଏହି ଦମ୍ପତ୍ତି । କିନ୍ତୁ ପରେ ଦାମ୍ପତ୍ୟ କଳି ଯୋଗୁଁ ଉଭୟ ପରସ୍ପରଠାରୁ ଅଲଗା ହୋଇ ରହୁଥିବା ଅନୁମାନ କରାଯାଉଛି । ତେବେ ଏହା ଭିତରେ ମହିଳା ଜଣକ କିପରି ଏବଂ କେବେ ତିର୍ତ୍ତୋଲ ବିଧାୟକ ବିଜୟଙ୍କ ସମ୍ପର୍କରେ ଆସିଲେ ସେ ନେଇ କୌଣସି ସ୍ପଷ୍ଟ ସୂଚନା ମିଳି ପାରିନାହିଁ । ପେଟେ ସୋମାଲିକା ମାମଲା ଥଣ୍ଡା ପଡି ନଥିବା ବେଳେ ଏଭଳି ଆଉ ଏକ ଘଟଣା ବିଜୟଙ୍କୁ ଆହୁରି ବିବାଦ ଭିତରକୁ ଟାଣି ନେଇଛି । ଏମିତିକି ବିଧାୟକଙ୍କର କେହି ନିଜ ଲୋକ ଏପରି କରିଥିବା ମଧ୍ୟ ଆଶଙ୍କା କରାଯାଉଛି ।
ତେବେ ପୂର୍ବରୁ ୨ଟି ମାମଲାର ତଦନ୍ତ କରୁଥିବା ଜଗତସିଂହପୁର ପୋଲିସ ଫଟୋ ଭାଇରାଲ ଘଟଣାକୁ ତଦନ୍ତ ପରିସରଭୁକ୍ତ କରିବ କି ନାହିଁ ତାହା ଦେଖିବାକୁ ବାକି ରହିଲା । ସେପଟେ ତିର୍ତ୍ତୋଲ ବିଧାୟକ ବିଜୟ କୁମାର ଦାସଙ୍କ ଠାରୁ ଏ ସମ୍ପର୍କରେ କୌଣସି ପ୍ରତିକ୍ରିୟା ମିଳିପାରିନାହିଁ ।
