ମୁମ୍ବାଇ: ପୂର୍ବତନ ପ୍ରଥମଶ୍ରେଣୀ କ୍ରିକେଟର୍ ଅମୋଲ ମଜୁମଦାରଙ୍କୁ ଭାରତୀୟ ମହିଳା କ୍ରିକେଟ୍ ଟିମ୍ର ମୁଖ୍ୟ କୋଚ୍ ନିଯୁକ୍ତ କରାଯାଇଛି । ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ (ବିସିସିଆଇ) ବୁଧବାର ଏହି ଘୋଷଣା କରିଛି । ବିସିସିଆଇ ପକ୍ଷରୁ ଜାରୀ ବୟାନରେ କୁହାଯାଇଛି, ସୁଲକ୍ଷଣ ନାଇକ, ଅଶୋକ ମାଲହୋତ୍ରା ଏବଂ ଜତିନ୍ ପରାଞ୍ଜପେଙ୍କ ତିନିଜଣିଆ କ୍ରିକେଟ୍ ପରାମର୍ଶଦାତା କମିଟି (ସିଏସି) ଶର୍ଟଲିଷ୍ଟ୍ ହୋଇଥିବା ଆବେଦନଙ୍କ ସାକ୍ଷାତକାର ନେବା ପରେ ସର୍ବସମ୍ମତିକ୍ରମେ ଅମୋଲ ମଜୁଦାରଙ୍କୁ ଏହି ଦାୟିତ୍ୱ ପ୍ରଦାନ କରିଛି । ମୁମ୍ବାଇ ପକ୍ଷରୁ ୧୯୯୪ରେ ନିଜର ପ୍ରଥମ ପ୍ରଥମଶ୍ରେଣୀ କ୍ରିକେଟ୍ ଖେଳିଥିବା ମଜୁମଦାରଙ୍କ ଘରୋଇ କ୍ୟାରିୟର୍ ୨୧ ଧରି ରହିଥିଲା । ସେ ୧୭୧ ପ୍ରଥମଶ୍ରେଣୀ ମ୍ୟାଚ୍ରେ ୪୮.୧ ହାରାହାରି ଏବଂ ୭୨.୭ ଷ୍ଟ୍ରାଇକ୍ ରେଟ୍ରେ ମୋଟ ୧୧୧୬୭ ରନ୍ ସଂଗ୍ରହ କରିଛନ୍ତି । ଏହା ମଧ୍ୟରେ ତାଙ୍କର ୩୦ ଶତକ ମଧ୍ୟ ସାମିଲ । ସେହିପରି ୨୬୦ ରନ୍ ତାଙ୍କର ସର୍ବଶ୍ରେଷ୍ଠ ସ୍କୋର୍ ଥିଲା ।
ସେହିପରି ୧୧୩ ଲିଷ୍ଟ୍-ଏ’ ମ୍ୟାଚ୍ରେ ତାଙ୍କ ନାମରେ ୩୨୮୬ ରନ୍ ରହିଛି । ଏହା ମଧ୍ୟରେ ୩ଟି ଶତକ ମଧ୍ୟ ସାମିଲ । ସେ ଖେଳିଥିବା ୧୪ ଟି-୨୦ ମ୍ୟାଚ୍ରେ ଗୋଟିଏ ଅର୍ଦ୍ଧଶତକ ସହିତ ୧୭୪ ରନ୍ ମଧ୍ୟ କରିଛନ୍ତି । ମଜୁମଦାରଙ୍କ ନେତୃତ୍ୱରେ ମୁମ୍ବାଇ ବହୁ ରଣଜୀ ଟାଇଟଲ୍ ଜିତିଥିଲା । ସେ ରଣଜୀ ଟ୍ରଫି ଟୁର୍ଣ୍ଣାମେଣ୍ଟ୍ରେ ମୁମ୍ବାଇ, ଆସାମ ଏବଂ ଆନ୍ଧ୍ରପ୍ରଦେଶର ପ୍ରତିନିଧିତ୍ୱ ମଧ୍ୟ କରିଥିଲେ । ମୁମ୍ବାଇ ରଣଜୀ ଟିମ୍ର ମୁଖ୍ୟ କୋଚ୍ ଥିବା ଅମୋଲ ମଜୁମଦାର ଆଇପିଏଲ୍ ଫ୍ରାଞ୍ଚାଇଜି ରାଜସ୍ଥାନ ରୟାଲ୍ସ ଏବଂ ସାଉଥ୍ ଆଫ୍ରିକା ଜାତୀୟ ଟିମ୍ ସହିତ ମଧ୍ୟ କାର୍ଯ୍ୟ କରିଛନ୍ତି ।
