ନୂଆଦିଲ୍ଲୀ : ସାଧାରଣ ନିର୍ବାଚନରେ ମତଦାନରେ କିଛି ଗଡବଡ ରହିଛି । ଇଭିଏମର କିଛି ତ୍ରୁଟି ରହିଛି । ଭୋଟ ଗଣତି ସମୟରେ ଏହା କିପରି ସମ୍ଭବ ହେଲା ତାକୁ ନେଇ ବିଜେଡି ସନ୍ଦେହ ପ୍ରକାଶ କରିଛି । ଏହା କୌଣସି ପ୍ରକାରେ ଜାଲିଆତି ହୋଇଥାଇପାରେ ବୋଲି ସଙ୍ଗୀନ ଅଭିଯୋଗ ଆଣିଛି ବିଜେଡି । ଏ ସମ୍ପର୍କରେ ଦଳର ଏକ ପ୍ରତିନିଧି ଦଳ ନିର୍ବାଚନ କମିଶନଙ୍କୁ ଭେଟି ଫେରାଦ ହୋଇଛନ୍ତି । ନୂଆଦିଲ୍ଲୀର ଇନିଷ୍ଟିଚ୍ୟୁସନ କ୍ଲବ ଠାରେ ଏକ ସାମ୍ବାଦିକ ସମ୍ମିଳନୀରେ ପ୍ରତିନିଧି ମଣ୍ଡଳ ପକ୍ଷରୁ ପୂର୍ବତନ ସାଂସଦ ଅମର ପଟ୍ଟନାୟକ କହିଲେ ଲୋକସଭା, ବିଧାନସଭା ନିର୍ବାଚନର ଫଳାଫଳକୁ ବିଜେଡି ବିଶେଷ ଭାବେ ଅନୁଧ୍ୟାନ କରିଛି । ଇଭିଏମରେ ଯାହା ମତଦାନ ହୋଇଥିଲା ତାହା ମୋଟ ମତଦାନ ଏବଂ ମତଦାନ ଗଣତିଠାରୁ ସମ୍ପୁର୍ଣ ଭିନ୍ନ । ସେ ଆହୁରି କହିଛନ୍ତି , ଏକ ସଂସଦୀୟ ଗଣତନ୍ତ୍ରରେ ସ୍ୱଛତା ରହିବା ଆବଶ୍ୟକ । ସ୍ୱଛତା ଲୋକଙ୍କ ବିଶ୍ୱାସ ନିର୍ଭର କରେ । ଯଦି ଏଭଳି ସ୍ୱଛତା ନ ରହିବ ତେବେ ଲୋକମାନଙ୍କ ବିଶ୍ୱାସ ଆଉ ଗଣତନ୍ତ୍ର ଉପରେ ରହିବ ନାହିଁ । ବିଜେଡି ନିର୍ବାଚନକୁ ସାକ୍ଷାତ କରି କହିଛନ୍ତି ଏହି ସବୁର ସମାଧାନ ଶୀଘ୍ର ହେବା ଦରକାର । ଏହାପରେ ଦଳର ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶାନୁସାରେ ଦଳ ପରବର୍ତ୍ତୀ ପଦକ୍ଷେପ ଗ୍ରହଣ କରିବ । ଅମର ସମ୍ମିଳନାରେ ଉଦାହରଣ ଦେଇ କହିଛନ୍ତି , ଫୁଲବାଣୀ ବିଧାନସଭା ଆସନର ବୁଥ ନମ୍ବର ୫୭ରେ ଇଭିଏମ ମତଦାନ ଓ ଇଭିଏମ ମତଗଣତି ସଂଖ୍ୟାରେ ୬୮୨ ପାର୍ଥକ୍ୟ ରହିଛି । ସେହିପରି ତଳସରା ବିଧାନସଭାର ବୁଥ ନମ୍ବର ୧୬୫ ଓ ବୁଥ ନମ୍ବର ୨୧୯ ରେ ପାର୍ଥକ୍ୟ ୬୬୦ ଓ ୭୮୪ ଅଛି । ସେହିପରି ଭୁବନେଶ୍ୱର ବିଧାନସଭା ଅନ୍ତର୍ଗତ ବୁଥ ନମ୍ବର ୩ରେ ୪୨ ପାର୍ଥକ୍ୟ ରହିଛି । ତେବେ ଏଭଳି ପାର୍ଥ୍ୟକୁ ନେଇ ନିର୍ବାଚନର ନିରପେକ୍ଷତା ଓ ସ୍ୱଛତା ଉପରେ ପ୍ରଶ୍ନ ଉଠିଛି । ରାଜ୍ୟରେ ବିଧାନସଭା ଓ ଲୋକସଭା ନିର୍ବାଚନ ଏକାଠି ହୋଇଥିଲା । ତେବେ ଆସନର ସମୁଦାୟ ମତଦାନ ସଂଖ୍ୟାଠାରୁ କିଭଳି ଭିନ୍ନ ହେଲା । ତଥ୍ୟ ରଖି ଶ୍ରୀ ପଟ୍ଟନାୟକ କହିଲେ , ଢେଙ୍କାନାଳରେ ଏହି ପାର୍ଥକ୍ୟ ୪୦୫୬ ଥିବା ବେଳେ କନ୍ଧମାଳରେ ୩୫୨୧ ରହିଛି । ସେବିପରି ବଲାଙ୍ଗୀରରେ ୨୭୦୧ । ଯାଜପୁର ଲୋକସଭା ଆସନର ଫଳାଫଳ କେବଳ ୨ ହଜାର ବ୍ୟବଧାନରେ ଲୋକସଭା ଓ ବିଧାନସଭାର ସମସ୍ତ ମତଦାନରେ ୬୭୭ ପାର୍ଥକ୍ୟ ରହିଛି । ଓଡିଶାରେ ପାଖାପାଖି ୩୦ ପ୍ରତିଶତରୁ ଅଧିକ ପାର୍ଥକ୍ୟ ଦେଖିବାକୁ ମିଳୁଛି । ପାଖାପାଖି ୫୦ଟି ବିଧାନସଭା ଆସନର ଫଳାଫଳ ପ୍ରଭାବିତ ହୋଇଛି । ବିଜେଡିର ଅଭିଯୋଗ ଅନୁଯାୟୀ ଭୋଟ ଦିନ ସନ୍ଧ୍ୟା ୫ , ରାତି ୧୧ଟା ୪୫ ଗଣତି ବେଳର ତଥ୍ୟ ଭିନ୍ନ ଦର୍ଶାଉଛି । ବିଭିନ୍ନ ବୁଥରେ ପାର୍ଥକ୍ୟ ୨୦ ପ୍ରତିଶତରୁ ସର୍ୱାଧିକ ୩୦ ପ୍ରତିଶତ ହୋଇଥିବା ନଜରକୁ ଆସିଛି । ଓଡିଶାରେ ୨୦୦୪, ୨୦୦୯ , ୨୦୧୪ , ୨୦୧୯ ଓ ୨୦୨୪ରେ ଏକାବେଳ ଲୋକସଭା ଓ ବିଧାନସଭା ନିର୍ୱାଚନ ହୋଇଥିଲେ ବି ଏତେ ଫରକ ହେଉନଥିଲା । ପାର୍ଥକ୍ୟ ୦.୫ରୁ ୧.୫ ପ୍ରତିଶତରେ ସୀମିତ ରହୁଥିଲା । ହେଲେ ପୂର୍ୱ ନିର୍ୱାଚନ ଅପେକ୍ଷା ୨୦୨୪ ସାଧାରଣ ନିର୍ବାଚନରେ ଏହି ପାର୍ଥକ୍ୟ ଅଧିକ ବୋଲି ଦଳ ପକ୍ଷରୁ କୁହାଯାଉଛି । ନିର୍ଦିଷ୍ଟ କେତୋଟି ସଂସଦୀୟ ଓ ବିଧାନସଭା କ୍ଷତ୍ରେକୁ ନେଇ ବିଜେଡି ପକ୍ଷରୁ ଅଭିଯୋଗ କରାଯାଇଛି । ୫୦ଟି ବିଧାନସଭା ଆସନରୁ ୩୮ଟି ବିଧାନସଭା ଆସନରେ ମତଦାନ ହାର ତାରତମ୍ୟ ୧୫ରୁ ୨୨ ପ୍ରତିଶତ । ସେହିଭଳି ୧୦ ବିଧାନସଭା ଆସନରେ ମତଦାନ ହାର ୨୦ରୁ ୨୫ ପ୍ରତିଶତ ରହିଛି । ମୁଖ୍ୟମନ୍ତ୍ରୀ ମୋହନ ମାଝୀଙ୍କ କେନ୍ଦୁଝରର ତାରତମ୍ୟ ସରିବାଧିକ ୩୦ , ୬୪ ପ୍ରତିଶତ । ଏହା କିପରି ସମ୍ଭବ ହେଲା ଇସିଆଇ ଏହାର ପୁଙ୍ଖାନୁପୁଙ୍ଖ ତଦନ୍ତ କରିବାକୁ ବିଜେଡି ଦାବି କରିଛି । ଏହି ପ୍ରତିନିଧି ଦଳରେ ଅମରଙ୍କ ସହ ସାଂସଦ ସୁଲତା ଦେଓ , ସସ୍ମିତ ପାତ୍ର, ମାନଓ ରଞ୍ଜନ ମଙ୍ଗରାଜ , ଶୁଭାଶିଷ ଖୁଣ୍ଟିଆ , ଦେବାଶିଷ ସାମନ୍ତରାୟ, ମଞ୍ଜିବୁଲା ଖାଁ ଓ ନିରଞ୍ଜନ ବିସି ନିର୍ବାଚନ କମିଶନଙ୍କୁ ଭେଟିଥିଲେ ।
