ପିପିଲି : ପୁରୀ-ଭୁବନେଶ୍ୱର ଜାତୀୟ ରାଜପଥରେ ମର୍ମନ୍ତୁଦ ସଡ଼କ ଦୁର୍ଘଟଣା । କୋଇଲା ବୋଝେଇ ଟ୍ରକ ପଛରେ ପିଟି ହୋଇ ଚାଲିଗଲା ୨ ଜଣଙ୍କ ଜୀବନ । ଶବ ଦାହ ସାରି ଫେରୁଥିବା ବେଳେ ବାଟରେ ନିଜେ ଶବ ହୋଇଗଲେ । ସାକ୍ଷୀଗୋପାଳ ଥାନା ବୀରଗୋବିନ୍ଦପୁର ପେଟ୍ରୋଲ ପମ୍ପ ନିକଟରେ ଏକ କୋଇଲା ବୋଝେଇ ଟ୍ରକ ଠିଆ ହୋଇଥିଲା । ପୁରୀରୁ ଅନ୍ତିମ ସଂସ୍କାର ସାରି ମୋଟର ସାଇକେଲ ଯୋଗେ ୩ ଜଣ ଫେରୁଥିବା ବେଳେ ଟ୍ରକରେ ଧକ୍କା ହୋଇଥିଲେ । ଫଳରେ ଘଟଣାସ୍ଥଳରେ ୨ ଜଣଙ୍କର ମୃତ୍ୟୁ ଘଟିଛି ।
ସୂଚନା ଅନୁଯାୟୀ, ଚାଳକ ଅନ୍ୟମନସ୍କ ହେବାରୁ ବାଇକ୍ଟି ଟ୍ରକ ପଛରେ ପିଟି ହୋଇଯାଇଥିଲା । ଫଳରେ ସମସ୍ତେ ରାଜରାସ୍ତାକୁ ଛିଟିକି ପଡ଼ିଥିଲେ । ରକ୍ତ ଜୁଡ଼ୁବୁଡୁ ଅବସ୍ଥାରେ ସମସ୍ତଙ୍କୁ ଉଦ୍ଧାର କରି ସାକ୍ଷୀଗୋପାଳ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା । କିନ୍ତୁ ଡାକ୍ତର ୨ ଜଣଙ୍କୁ ମୃତ ଘୋଷଣା କରିଥିଲେ । ମୃତକ ହେଲେ ସାକ୍ଷୀଗୋପାଳ ହୋତା ସାହିର ସୂର୍ଯ୍ୟକାନ୍ତ ସାହୁ ଏବଂ ପୁରୀରେ କାର୍ଯ୍ୟରତ ମହିଳା କନେଷ୍ଟବଳ ସୁଷମା ମିଶ୍ର । ଅନ୍ୟ ଜଣେ ଗୁରୁତରଙ୍କୁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।
