ଭୁବନେଶ୍ୱର : କରୋନା ମହାମାରୀ କାଳରେ ଅଭିନେତା ସବ୍ୟସାଚୀ ମିଶ୍ରଙ୍କ ସମାଜ ସେବା ଜାରି ରହିଛି । ରୋଗୀ ସେବା ଠାରୁ ଆରମ୍ଭ କରି ଭୋକିଲାଙ୍କୁ ଆହାର ଯୋଗାଇବାରେ ସେ ଉଲ୍ଲେଖନୀୟ ଭୂମିକା ଗ୍ରହଣ କରିଛନ୍ତି । ଏଥିପାଇଁ ବିଭିନ୍ନ ଅନୁଷ୍ଠାନ ପକ୍ଷରୁ ତାଙ୍କୁ ସମ୍ବର୍ଦ୍ଧିତ କରାଯାଉଥିବାବେଳେ ପ୍ରଶଂସକଙ୍କ ଠାରୁ ପ୍ରଶଂସା ଓ ଉପକାର ପାଉଥିବା ବ୍ୟକ୍ତିଙ୍କ ଠାରୁ କୃତଜ୍ଞତାର ସୁଅ ଛୁଟିବାରେ ଲାଗିଛି । ତେବେ ସାଲେପୁରର ଦେବେନ୍ଦ୍ର ଭୋଇ ନିଆରା ଢଙ୍ଗରେ ତାଙ୍କ ପ୍ରିୟ ଅଭିନେତାଙ୍କୁ ସମ୍ବର୍ଦ୍ଧିତ କରିଛନ୍ତି । ଏହି ଅନୁଭୂତି ବଖାଣିବାକୁ ଯାଇ ସବ୍ୟସାଚୀ ଭାବ ବିହ୍ୱଳ ହୋଇପଡ଼ିଛନ୍ତି । ସବ୍ୟସାଚୀଙ୍କୁ ସାକ୍ଷାତ କରିବା ପାଇଁ ଦେବେନ୍ଦ୍ର ସାଲେପୁରରୁ ଭୁବନେଶ୍ୱର ସାଇକେଲ ଯୋଗେ ଆସି ପହଞ୍ôଚଥିଲେ । ଖରାବର୍ଷାକୁ ଖାତିର ନକରି ଦେବେନ୍ଦ୍ର ୬୦ କି.ମି ଦୂରତା ଅତିକ୍ରମ କରିଥିଲେ ।
ତେବେ ସୋସିଆଲ ମିଡିଆରେ ଜୁନ୍ ୧୫ ତାରିଖରେ ଏ ସମ୍ପର୍କରେ ସବ୍ୟସାଚୀ ଅବଗତ ହୋଇଥିଲେ ମଧ୍ୟ ଦେବେନ୍ଦ୍ରଙ୍କ କୌଣସି ଫୋନ୍ ନଂ ଉଲ୍ଲେଖ ହୋଇନଥିବାରୁ ତାଙ୍କ ସହ ଯୋଗାଯୋଗ ହୋଇପାରିନଥିଲା । ତେବେ ଶନିବାର ଦେବେନ୍ଦ୍ର ଭୁବନେଶ୍ୱରର ନୟାପଲ୍ଲୀ ଅଞ୍ଚଳରେ ପହଞ୍ôଚଥିଲେ । ବିଶ୍ୱଜିତ ମହାନ୍ତି ନାମକ ଜଣେ ଫେସବୁକ୍ ବ୍ୟବହାରକାରୀ ଏ ସମ୍ପର୍କରେ ସବ୍ୟସାଚୀଙ୍କୁ ସୂଚନା ଦେବା ପରେ ସବ୍ୟସାଚୀ ତୁରନ୍ତ ଦେବେନ୍ଦ୍ରଙ୍କୁ ଭେଟିଥିଲେ । ଆଗରୁ ଅନେକ ଥର ତାଙ୍କ ସମାଜସେବା ପାଇଁ ତାଙ୍କୁ ସମ୍ବର୍ଦ୍ଧିତ କରାଯାଇଛି । ତେବେ ଦେବେନ୍ଦ୍ରଙ୍କ ଏହି ନିଆରା ସମ୍ବର୍ଦ୍ଧନା ସେ ସବୁବେଳେ ମନେ ରଖିବେ ବୋଲି ସବ୍ୟସାଚୀ କହଛନ୍ତି । ଅନ୍ୟପଟେ ନିଜ ପ୍ରିୟ ଅଭିନେତା ତଥା ଜଣେ ହୃଦୟବାନ ବ୍ୟକ୍ତିଙ୍କୁ ଭେଟି ବହୁତ ଖୁସି ଥିବା ଦେବେନ୍ଦ୍ର କହିଛନ୍ତି । ସବ୍ୟସାଚୀଙ୍କ ଠାରୁ ଅନୁପ୍ରାଣିତ ହୋଇ ଅନ୍ୟମାନେ ସମାଜସେବା କ୍ଷେତ୍ରରେ ଆଗକୁ ବଢ଼ିବା ଦରକାର ବୋଲି ଦେବେନ୍ଦ୍ର କହିଛନ୍ତି ।
