ରାୟପୁର: ଦେଶର ବିଭିନ୍ନ ରାଜ୍ୟରେ ବୁଲା କୁକୁରଙ୍କ ଆତଙ୍କ ଏତେ ମାତ୍ରାରେ ବଢ଼ିଯାଇଛି ଯେ ଲୋକମାନେ ଘରୁ ବାହାରିବାକୁ ଭୟ କରୁଛନ୍ତି । କେତେକ ଅଞ୍ଚଳରେ ଛୋଟ ଛୋଟ ପିଲା କୁକୁର କାମୁଡ଼ାରେ ମୃତାହତ ହୋଇଛନ୍ତି । ଏବେ ଛତିଶଗଡ଼ରେ ଏପରି ଏକକ ହୃଦୟବିଦାରକ ଘଟଣା ଜଣାପଡ଼ିଛି ।
ରାଜ୍ୟର କୋରିଆ ଜିଲ୍ଲାରେ ଶୁକ୍ରବାର ବୁଲା କୁକୁରମାନେ ଏକ ୫ ବର୍ଷର ଶିଶୁକନ୍ୟାକୁ ଝୁଣି ମାରିଦେଇଛନ୍ତି । ଘଟଣା ବୈକୁଣ୍ଠପୁରର ମାର୍ଗଦର୍ଶନ ସ୍କୁଲ୍ ରୋଡ୍ରେ ଘଟିଛି । ପୁଲିସ ଅନୁସାରେ ସୁକାନ୍ତି ନାମ୍ନୀ ଶିଶୁକନ୍ୟା ଜଣକ ସକାଳ ପ୍ରାୟ ୬ଟା ବେଳେ ଶୌଚ ପାଇଁ ଯାଇଥିବା ବେଳେ ବୁଲା କୁକୁରମାନେ ତାକୁ ଆକ୍ରମଣ କରିଥିଲେ । କୁକୁର କାମୁଡ଼ାରେ ଗୁରୁତର ସୁକାନ୍ତିର ଶେଷରେ ମୃତ୍ୟୁ ଘଟିଥିଲା ।
