ଏଲ୍ ନିନୋ ଯୋଗୁଁ ମରୁଡ଼ି ଆଶଙ୍କା!

ନୂଆଦିଲ୍ଲୀ: ଦେଶର ଅନେକ ଅଞ୍ଚଳରେ ସ୍ୱାଭାବିକଠାରୁ କମ୍ ବୃଷ୍ଟିପାତ ଏବଂ ଜୁଲାଇ ମାସରେ ମଧ୍ୟ ଦୁର୍ବଳ ମୌସୁମୀ ପୂର୍ବାନୁମାନକୁ ନେଇ କେନ୍ଦ୍ର ସରକାର ସତର୍କ ହୋଇଛନ୍ତି । ଗୃହମନ୍ତ୍ରୀ ଅମିତ ଶାହ ଶୁକ୍ରବାର ଏକ ଉଚ୍ଚସ୍ତରୀୟ ବୈଠକରେ ‘ଅଲ୍ ନିନୋ’ ପ୍ରଭାବରେ ସୃଷ୍ଟି ହୋଇଥିବା ସମ୍ଭାବ୍ୟ ମରୁଡ଼ି ସ୍ଥିତିର ସମୀକ୍ଷା କରିଛନ୍ତି । କୃଷିମନ୍ତ୍ରୀ ଶିବରାଜ ସିଂ ଚୌହାନ ଓ ବିଭିନ୍ନ ମନ୍ତ୍ରଣାଳୟର ବରିଷ୍ଠ ଅଧିକାରୀଙ୍କ ସହ ଆଲୋଚନା କରି ଶାହ ସମସ୍ତ ବିଭାଗକୁ ରାଜ୍ୟଗୁଡ଼ିକ ସହ ମିଳିମିଶି କାମ କରିବାକୁ ଏବଂ ଚାଷୀଙ୍କ ସହାୟତା ପାଇଁ ଜରୁରୀ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି।ବୈଠକରେ କୃଷି ମନ୍ତ୍ରଣାଳୟକୁ ନିର୍ଦ୍ଦେଶ ଦିଆଯାଇଛି ଯେ, ଯେଉଁ ଅଞ୍ଚଳରେ ବର୍ଷା କମ୍ ହୋଇଛି, ସେଠାରେ ଚାଷୀଙ୍କୁ କମ୍ ପାଣି ଆବଶ୍ୟକ କରୁଥିବା ଫସଲ, ଡାଲି ଜାତୀୟ ଶସ୍ୟ ଓ ମାଣ୍ଡିଆ ଚାଷ ପାଇଁ ଉତ୍ସାହିତ କରାଯାଉ। ଏହା ସହିତ ଦେଶର ପ୍ରମୁଖ ଜଳଭଣ୍ଡାରଗୁଡ଼ିକର ଜଳସ୍ତର ଉପରେ ନଜର ରଖିବା ସହ କୃଷି କାର୍ଯ୍ୟ ପାଇଁ ଅବିରତ ବିଦ୍ୟୁତ ଯୋଗାଣ ସୁନିଶ୍ଚିତ କରିବାକୁ କୁହାଯାଇଛି। ସୂଚନାଯୋଗ୍ୟ ଯେ, ଚଳିତ ବର୍ଷ ଜୁନ୍ ମାସରେ ସ୍ୱାଭାବିକଠାରୁ ପ୍ରାୟ ୪୦ ପ୍ରତିଶତ କମ୍ ବର୍ଷା ହୋଇଛି, ଯାହା ୧୯୦୧ ପରଠାରୁ ପଞ୍ଚମ ସବୁଠାରୁ ଶୁଖିଲା ମାସ ଭାବେ ରେକର୍ଡ ହୋଇଛି।ଅନ୍ୟପଟେ, ଆସାମ ଓ ଅରୁଣାଚଳ ପ୍ରଦେଶରେ ବନ୍ୟା ଓ ଭୂସ୍ଖଳନ ଯୋଗୁଁ ସୃଷ୍ଟି ହୋଇଥିବା ବିପର୍ଯ୍ୟୟର ମଧ୍ୟ ସମୀକ୍ଷା କରାଯାଇଛି। କ୍ଷୟକ୍ଷତିର ଜମି ଅନୁଧ୍ୟାନ ପାଇଁ ଏକ କେନ୍ଦ୍ରୀୟ ଟିମ୍ ତୁରନ୍ତ ସେହି ରାଜ୍ୟଗୁଡ଼ିକୁ ପଠାଇବାକୁ ଗୃହମନ୍ତ୍ରୀ ନିର୍ଦ୍ଦେଶ ଦେଇଛନ୍ତି, ଯଦ୍ୱାରା ପ୍ରଭାବିତ ଅଞ୍ଚଳକୁ ଶୀଘ୍ର ସହାୟତା ପ୍ରଦାନ କରାଯାଇପାରିବ।