ସ୍ୱାସ୍ଥ୍ୟବସ୍ଥା ପଚାରି ବୁଝିଲେ, ଚଣ୍ଡିପ୍ରସାଦ ଯାଇ ପରିବାରଙ୍କୁ ଭେଟିଲେ
ଭୁବନେଶ୍ୱର: ରିଖ ବାରଙ୍ଗ ପୋଲିସର ନିର୍ମମ ମାଡରେ ଚଣ୍ଡି ପ୍ରସାଦ ଗ୍ରାମର ଲହୁଲୁହାଣ ରାକେଶ ବେହେରାଙ୍କୁ କଟକ ଏସସିବି ମେଡିକାଲରେ ଆଜି ପିସିସି ସଭାପତି ଭକ୍ତ ଚରଣ ଦାସଙ୍କ ସହ କଂଗ୍ରେସର ଏକ ଉଚ୍ଚ ସ୍ତରୀୟ ନେତୃମଣ୍ଡଳୀ ସାକ୍ଷାତ କରିଛନ୍ତି l ପିସିସି ସଭାପତି ଶ୍ରୀ ଦାସ ପ୍ରଥମେ ମେଡିକାଲରେ ପୀଡିତ ରାକେଶର ସ୍ୱାସ୍ଥ୍ୟବସ୍ତା ପଚlରି ବୁଝିଥିଲେ ଓ ପରେ ତାଂକ ଗାଁ ଚଣ୍ଡୀପ୍ରସାଦକୁ ଯାଇ ପରିବାରବର୍ଗଙ୍କ ସହ ସାକ୍ଷାତ କରି ଘଟଣା ସମ୍ପର୍କରେ ପଚାରି ବୁଝିଥିଲେ l ଏହି ଅବସରରେ ଗଣମାଧ୍ୟମଙ୍କୁ ବିବୃତି ଦେଇ ଶ୍ରୀ ଦାସ କହିଥିଲେ, ଓଡିଶାରେ ଏକ ନିକାମ୍ମା ସରକାରର ଶାସନ ଚାଲିଛି l କୌଣସି ବିଭାଗ ଦାୟିତ୍ୱ ସମ୍ପାଦନ କରିବାକୁ ଅକ୍ଷମ l
ବିଶେଷତଃ ଗୃହ ବିଭାଗ ସମ୍ପୂର୍ଣ ଅଚଳ ହୋଇ ପଡିଛି l ରାଜନୈତିକ ଇଛାଶକ୍ତିର ଅଭାବ ଯୋଗୁଁ ପୋଲିସ ଆଜି ନିଷ୍କ୍ରିୟ ହୋଇ ପଡିଛି, ନାରୀ ନିର୍ଯ୍ୟାତନାରେ ଦେଶରେ ରାଜ୍ୟ ଦୁର୍ନାମ ବୋହିଲା, ପୁଣି ଭିଡହିଂସା ଯୋଗୁଁ ରାଜ୍ୟକୁ ମଥାନଥ କରିବାକୁ ପଡିଛି l ଏସବୁ ଘଟଣା ବନ୍ଦ ନ ହେଉଣୁ ହାଜତରେ ପୋଲିସର ବର୍ବରତା ସୀମା ଲଙ୍ଘିଛି l କବିସୂର୍ଯ୍ୟନଗର ଠାରୁ ବାରଙ୍ଗ ପର୍ଯ୍ୟନ୍ତ ପୋଲିସର ବେଆଇନ ଅlସମ୍ବିଧାନକ କାଯ୍ୟକଳାପ ବୃଦ୍ଧି ପାଇବାରେ ଲାଗିଛି l ରାକେଶ ଉପରେ ପୋଲିସର ନିର୍ମମ ଅତ୍ୟାଚାର ଏହାର ପ୍ରମାଣ l କୌଣସି ସଭ୍ୟ ଏବଂ ଗଣତାନ୍ତ୍ରିକ ରାଷ୍ଟ୍ରରେ ପୋଲିସର ନିର୍ମମତାକୁ କେବେହେଲେ ଗ୍ରହଣ କରାଯିବ ନାହିଁ l ଏହା କଣ ଅହିଂସାର ପୂଜାରୀ ଗାନ୍ଧୀଙ୍କ ଭାରତ କି? ବୋଲି ପ୍ରଶ୍ନ ପଚlରିବା ସହ ପୋଲିସର ହିଂସାତ୍ମକ କାର୍ଯ୍ୟକଳାପକୁ ସରକାର ତୁରନ୍ତ ରୋକ ଲଗାଉ ଓ ପୀଡ଼ିତଙ୍କୁ କ୍ଷତିପୂରଣ ଦିଆଯାଉ ବୋଲି ସେ ଦାବୀ କରିଥିଲେ l କେବଳ ରାକେଶ ନୁହଁ ଆଜି ସମ୍ପୂର୍ଣ ଗୃହ ବିଭାଗକୁ ସରକାର ଲହୁ ଲୁହାଣ କରି ଦେଇଛନ୍ତି l ଅକର୍ମା ମନ୍ତ୍ରୀ ଓ ନେତାଙ୍କ ପାଇଁ ପୁଲିସ ମଧ୍ୟ ଦିଶାହୀନ ହୋଇ ପଡିଛି l ପୋଲିସର ବର୍ବରତା ସମ୍ପୂର୍ଣ ରାଜ୍ୟର ଭାବମୂର୍ତ୍ତି ଉପରେ କାଳିମା ପୋତିଛି l ତେବେ କଂଗ୍ରେସ ଏଭଳି ପୋଲିସର ହିଂସାତ୍ମକ କାର୍ଯ୍ୟକଳାପ ଉପରେ ଚୁପ ହୋଇ ବସି ରହିବ ନାହିଁ ବୋଲି ସେ ଚେତାବନୀ ଦେଇଛନ୍ତି l ଏହି ସାକ୍ଷାତ କାର୍ଯ୍ୟକ୍ରମରେ ସଭାପତି ଶ୍ରୀ ଦାସଙ୍କ ସହ ପ୍ରତିନିଧି ମଣ୍ଡଳରେ ପୂର୍ବତନ ବିଧାୟକ ଡଃ ଦେବାଶିଷ ପଟ୍ଟନାୟକ, ମହିଳା କଂଗ୍ରେସ ସଭାନେତ୍ରୀ ମିନାକ୍ଷୀ ବାହିନୀପତି, କଟକ ରୁରାଲ ସିଟି କଂଗ୍ରେସ ଜିଲ୍ଲା ସଭାପତି ପ୍ରଦୀପ୍ତ କୁମାର ଦାସ ଓ ଶାନ୍ତାୟନ ମିଶ୍ର, ସେବାଦଳ ଅଧ୍ୟକ୍ଷ ଶୁଭେନ୍ଦୁ ମହାନ୍ତି, ସୋସିଆଲ ମିଡ଼ିଆ ଅଧ୍ୟକ୍ଷ ବିଶ୍ୱଜିତ ମହାନ୍ତି, ପ୍ରୋଟୋକଲ ଓ ଲଜିଷ୍ଟିକ ସମ୍ପାଦକ ପ୍ରଦୀପ ମହାପାତ୍ର, ମହିଳା କଂଗ୍ରେସ ଉପସଭାନେତ୍ରୀ ଜୟଶ୍ରୀ ପଟ୍ଟନାୟକ, ମହିଳା କଂଗ୍ରେସ ମିଡ଼ିଆ ଅଧ୍ୟକ୍ଷl ଜୟଶ୍ମିତା ମହାନ୍ତି, କଂଗ୍ରେସ ନେତା ରବୀନ୍ଦ୍ର ମଲ୍ଲିକ, ବିଶ୍ୱଜିତ ଦାସ ପ୍ରମୁଖ ଉପସ୍ଥିତ ଥିଲେ l
