ଜରୁରୀ ଅବତରଣ କଲା ଏୟାର ଇଣ୍ଡିଆ ବିମାନ

ନୂଆଦିଲ୍ଲୀ: ୨୩୦ ଜଣ ଯାତ୍ରୀଙ୍କୁ ନେଇ ଦିଲ୍ଲୀରୁ ସାନ୍ ଫ୍ରାନ୍ସିସ୍କୋ ଯାଉଥିବା ଏୟାର ଇଣ୍ଡିଆର ଏକ ବିମାନ ଯାନ୍ତ୍ରିକ ତ୍ରୁଟି ଯୋଗୁଁ ପ୍ରାୟ ୮ ଘଣ୍ଟାରୁ ଅଧିକ ସମୟ ଆକାଶରେ ରହିବା ପରେ ପୁଣି ଦିଲ୍ଲୀ ବିମାନବନ୍ଦରକୁ ଫେରିଆସିଛି। ଏୟାରଲାଇନ୍ସ ପକ୍ଷରୁ ଜାରି ବୟାନ ଅନୁଯାୟୀ, ବୁଧବାର ଦିନ ଉଡ଼ାଣ ଭରିଥିବା ଏହି ”ଏଆଇ୧୭୩” ବିମାନଟି ପ୍ରାୟ ୩ ଘଣ୍ଟାରୁ ଅଧିକ ସମୟ ଉଡ଼ି ଚୀନ୍ ଆକାଶମାର୍ଗରେ ପହଞ୍ଚିବା ପରେ ସେଥିରେ ଯାନ୍ତ୍ରିକ ତ୍ରୁଟି ଦେଖାଯାଇଥିଲା। ଏହାପରେ ସୁରକ୍ଷା ନିୟମ ଅନୁଯାୟୀ ପାଇଲଟ୍ ବିମାନଟିକୁ ସେଠାରୁ ଦିଲ୍ଲୀ ଆଡ଼କୁ ମୁହାଁଇଥିଲେ ଏବଂ ବିମାନବନ୍ଦରରେ ଏହାର ସୁରକ୍ଷିତ ଜରୁରୀକାଳୀନ ଅବତରଣ କରାଯାଇଛି। ଯାତ୍ରୀ ଓ କ୍ରୁ ସଦସ୍ୟଙ୍କ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦିଆଯାଇଥିବା ବେଳେ ବିମାନର ବୈଷୟିକ ଯାଞ୍ଚ ଚାଲିଛି ଏବଂ ଯାତ୍ରୀମାନଙ୍କ ପାଇଁ ହୋଟେଲ ଓ ବିକଳ୍ପ ବିମାନର ବ୍ୟବସ୍ଥା କରାଯାଉଛି। ସୂଚନାଯୋଗ୍ୟ ଯେ, ଗତ ମେ’ ୨୧ ତାରିଖରେ ମଧ୍ୟ ବେଙ୍ଗାଲୁରୁରୁ ଦିଲ୍ଲୀ ଆସୁଥିବା ଏୟାର ଇଣ୍ଡିଆର ଅନ୍ୟ ଏକ ବିମାନର ଇଞ୍ଜିନରେ ନିଆଁ ଲାଗିଯାଇଥିବା ବେଳେ ତାହାକୁ ଦିଲ୍ଲୀରେ ସୁରକ୍ଷିତ ଭାବେ ଓହ୍ଲାଇ ଦିଆଯାଇଥିଲା।