ବଜ୍ରକାପ୍ତା କାତି ଜବତ: ୩ ଗିରଫ

ରାଜନଗର: କେନ୍ଦ୍ରାପଡ଼ା ଜିଲ୍ଲା ରାଜନଗର ବନବିଭାଗ ଟିମ ଆଜି ଅପରାହ୍ନରେ ଡିଲ ବେଳେ ବଜ୍ରକାପ୍ତା କାତି ଜବତ କରିଛି । ଏହି ଘଟଣାରେ ୩ ଜଣ ଗିରଫ ହୋଇଛନ୍ତି । ବନବିଭାଗ, ଏସଟିଏଫ ଟିମ ମିଳିତ ଭାବେ ପଟ୍ଟାମୁଣ୍ଡାଇ ଥାନା ଅନ୍ତର୍ଗତ ନୀଳକଣ୍ଠପୁର ଗାଁରେ ଚଢ଼ାଉ କରିଥିଲେ । ଚଢ଼ାଉ କରି ବଜ୍ରକାପ୍ତା କାତି ୧୪ଟି ସହିତ ୩ ଜଣଙ୍କୁ ଗିରଫ କରିଛି ଟିମ । ୧୪ଟି କାତି ପାଇଁ ୭୦ ହଜାର ଟଙ୍କାରେ ଡିଲ କରାଯାଉଥିଲା । ବନବିଭାଗର କର୍ମଚାରୀ ଗ୍ରାହକ ସାଜି ନେବାକୁ ପହଞ୍ଚିବା ବେଳେ ପୂର୍ବରୁ ପ୍ରସ୍ତୁତ ଥିବା ଟିମ ୩ ଜଣଙ୍କୁ ମାଡ଼ି ବସିବା ସହିତ ବଜ୍ରକାପ୍ତା କାତି ଜବତ କରିଥିଲେ । ଅଧିକ ତଥ୍ୟ ପାଇଁ ତଦନ୍ତ ଜାରି ରହିଛି ।