ମଧ୍ୟପ୍ରଦେଶ: ମଧ୍ୟପ୍ରଦେଶର ବାଲାଘାଟ ଜିଲ୍ଲାରେ ଡବଲ ମର୍ଡର। ଦମ୍ପତ୍ତିଙ୍କୁ ଧାରୁଆ ଅସ୍ତ୍ରରେ ଗଳାକାଟି ହତ୍ୟା କରାଯାଇଛି। ସ୍ୱାମୀଙ୍କ ମୃତଦେହ ଶୟନ କକ୍ଷରେ ମିଳିଥିବା ବେଳେ ତାଙ୍କ ସ୍ତ୍ରୀଙ୍କ ମୃତଦେହ ରୋଷେଇ ଘରେ ମିଳିଛି। ଉଭୟ ମୃତକଙ୍କୁ ରମେଶ ହାକେ ଏବଂ ତାଙ୍କ ପତ୍ନି ପୁଷ୍ପା କଳା ବୋଲି ଚିହ୍ନଟ କତରାଯାଇଛି। ହତ୍ୟାର କାରଣ ଏପର୍ଯ୍ୟନ୍ତ ଅସ୍ପଷ୍ଟ ରହିଛି। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି। ପ୍ରାଥମିକ ତଦନ୍ତରୁ ଜଣାପଡିଛି ଯେ ଅପରାଧଟି ରାତିରେ ଘଟିଥିଲା, ଗୁରୁବାର ସକାଳେ ଏହ ସାମ୍ନାକୁ ଆସିଥିଲା। ଏହି ଦମ୍ପତ୍ତି କଟାଙ୍ଗିର ୱାର୍ଡ ନମ୍ବର ୨ର ନଥିଟୋଲାରେ ରହୁଥିଲେ।
ରମେଶ ଜଣେ ଅବସରପ୍ରାପ୍ତ ସରକାରୀ ଡ୍ରାଇଭର ଥିଲେ। ତାଙ୍କର ଦୁଇଟି ପୁଅ ଅଛନ୍ତି, ଯେଉଁମାନେ ନାଗପୁରରେ ରୁହନ୍ତି। ଗୁରୁବାର ସକାଳେ କ୍ଷୀରବାଲା ଘରେ ପହଞ୍ଚିବା ପରେ ସେ ଦ୍ୱାର ଖୋଲା ଥିବା ଦେଖିଲେ। ସେ ପଡ଼ୋଶୀମାନଙ୍କୁ ସତର୍କ କରିଥିଲେ। କ୍ଷୀରବାଲାଙ୍କ ଡାକ ଶୁଣି ପଡ଼ୋଶୀମାନେ ଏକାଠି ହୋଇଥିଲେ। ଯେତେବେଳେ ସେମାନେ ଭିତରକୁ ଗଲେ, ସେମାନେ ଦମ୍ପତିଙ୍କ ମୃତଦେହ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଥିବା ଦେଖିଲେ। ରମେଶଙ୍କ ମୃତଦେହ ଶୟନ କକ୍ଷରୁ ମିଳିଥିବା ବେଳେ ତାଙ୍କ ସ୍ତ୍ରୀ ପୁଷ୍ପାଙ୍କ ମୃତଦେହ ରୋଷେଇ ଘରରୁ ମିଳିଥିଲା। ଡବଲ୍ ମର୍ଡର ସମ୍ପର୍କରେ ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା। ସେମାନେ ଉଭୟ ମୃତଦେହକୁ ପୋଷ୍ଟମର୍ଟମ୍ ପାଇଁ ପଠାଇବା ସହିତ ଘର ସିଲ୍ କରିଦେଇଥିଲେ।
ତଦନ୍ତରେ କୁକୁର ସ୍କ୍ୱାଡ୍ ବ୍ୟବହାର କରାଯାଇଥିଲା। ପୋଲିସ ସେହି ରାତିରେ ଦମ୍ପତିଙ୍କ ଘରକୁ କିଏ ଆସିଥିଲା ଏବଂ ଘଟଣା ପଛରେ କ’ଣ ଉଦ୍ଦେଶ୍ୟ ଥିଲା ତାହା ନିର୍ଣ୍ଣୟ କରିବାକୁ ଚେଷ୍ଟା କରୁଛି। ଷ୍ଟେସନ ହାଉସ୍ ଅଫିସର ଧର୍ମେନ୍ଦ୍ର କୁସାରାମ କହିଛନ୍ତି ଯେ ମାମଲାର ତଦନ୍ତ ପାଇଁ କୁକୁର ସ୍କ୍ୱାଡ୍ ଏବଂ ଫରେନସିକ ଦଳକୁ ବ୍ୟବହାର କରାଯାଉଛି। ଅନ୍ୟପକ୍ଷରେ, ଏହି ହତ୍ୟାକାଣ୍ଡ ପରେ ଅଞ୍ଚଳର ଲୋକମାନେ ଆତଙ୍କିତ ଅଛନ୍ତି। ପୋଲିସ ତଦନ୍ତ ପରେ ହିଁ ହତ୍ୟାକାଣ୍ଡରେ କିଏ ଏବଂ କାହିଁକି ସମ୍ପୃକ୍ତ ତାହା ନିର୍ଣ୍ଣୟ କରାଯାଇପାରିବ। ପ୍ରାୟ ଦେଢ଼ ମାସ ପୂର୍ବରୁ ବାଲାଘାଟ ଜିଲ୍ଲାରେ ଏକ ବ୍ୟବସାୟୀ ଦମ୍ପତିଙ୍କୁ ମଧ୍ୟ ହତ୍ୟା କରାଯାଇଥିଲା।
