ବେଙ୍ଗାଲୁରୁ: ବେଙ୍ଗାଲୁରୁର ଜୟନଗର ଅଞ୍ଚଳରେ ଜଣେ ରାପିଡୋ ଡ୍ରାଇଭର ମହିଳାଙ୍କୁ ମାଡ଼ ମାରୁଥିବା ଘଟଣା ବର୍ତ୍ତମାନ ସାମ୍ନାକୁ ଆସିଛି । ଏହି ଘଟଣା ଶୁକ୍ରବାର ଦିନ ଘଟିଥିବା ବେଳେ ବର୍ତ୍ତମାନ ସୋସିଆଲ ମିଡ଼ିଆରେ ଭାଇରଲ ହେବାରେ ଲାଗିଛି । ଖବର ପ୍ରଘଟ ହେବା ପରେ ପୋଲିସ କାର୍ଯ୍ୟାନୁଷ୍ଠାନ ଆରମ୍ଭ କରିଛି । ତେବେ ଘଟଣାଟି ମହିଳା ଜଣକ ଜୟନଗରରେ ହିଁ ଏକ ଅଳଙ୍କାର ଦୋକାନରେ ସେଲ୍ସଉମେନ୍ ଭାବରେ କାମ କରନ୍ତି। ସେ ତାଙ୍କ କାର୍ଯ୍ୟସ୍ଥଳୀକୁ ଯିବା ପାଇଁ ଏକ ରାପିଡୋ ବୁକ କରିଥିଲେ । ଓଟିପି ଦେଇ ଆରମ୍ଭ ହୋଇଥିଲା ଯାତ୍ରା । ମହିଳା ଜଣକ ଡ୍ରାଇଭରଙ୍କ ବେପରୁଆ ଏବଂ ଦ୍ରୁତ ଗତିରେ ଗାଡି ଚାଳନା ଉପରେ ଆପତ୍ତି କରିଥିଲେ । ସେ ଡ୍ରାଇଭରଙ୍କ ଟ୍ରାଫିକ ନିୟମ ଉଲ୍ଲଂଘନ ଏବଂ ସର୍ଟକଟ୍ ନେବା ଉପରେ ଆପତ୍ତି କରିଥିଲେ, ଯାହା ପରେ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଡ୍ରାଇଭର୍ ଜଣକ ଦ୍ରୁତ ଗତିରେ ଗାଡି ଚାଳନା କରୁଥିବାରୁ ମହିଳାଜଣକ ତାଙ୍କୁ ବିରୋଧ କରିଥିଲେ । ଏହି କଥାକୁ ନେଇ ଦୁହିଁଙ୍କ ମଧ୍ୟରେ ବଚସା ହୋଇଥିଲା ପରେ ରାପିଡୋ ଚାଳକ ଜଣକ ମହିଳାଙ୍କୁ ଗୋଟିଏ ଶକ୍ତ ଚାପୁଡ଼ା ମାରିଥିଲେ ।
ଜୟନଗର ପୋଲିସର ସୂଚନା ଅନୁଯାୟୀ, ଡ୍ରାଇଭରଙ୍କୁ ଅଟକ ରଖାଯାଇଛି ଏବଂ ଏକ ମାମଲା ପଞ୍ଜିକରଣ କରିବା ପାଇଁ ଏଫଆଇଆରକୁ ବିଚାର କରାଯାଉଛି । ଏହି ଘଟଣା ସମୟର CCTV ଫୁଟେଜ୍ ମଧ୍ୟ ସାମ୍ନାକୁ ଆସିଛି, ଯେଉଁଥିରେ ମହିଳା ଜଣକ ପ୍ରଥମେ ଡ୍ରାଇଭରଙ୍କୁ ଦୁଇଥର ମାଡ଼ ମାରିଥିବାର ଜଣାପଡ଼ିଛି, ଯାହାର ଜବାବରେ ଡ୍ରାଇଭର ତାଙ୍କୁ ଚାପୁଡ଼ା ମାରିଥିଲେ। ଡ୍ରାଇଭର, ଯାହାଙ୍କ ନାମ ସୁହାସ ବୋଲି କୁହାଯାଉଛି, ସେ ଦାବି କରିଛନ୍ତି ଯେ ମହିଳା ଜଣକ ତାଙ୍କୁ ଦୁର୍ବ୍ୟବହାର କରିଥିଲେ ଏବଂ ପ୍ରଥମେ ଆକ୍ରମଣ କରିଥିଲେ । ସେ ଏହା ମଧ୍ୟ କହିଛନ୍ତି ଯେ ସେ ଜଣେ କନ୍ନଡ଼ ଲୋକ, ମହିଳା ଜଣକ ତାଙ୍କୁ ବାରମ୍ବାର ଇଂରାଜୀ ଭାଷା କହୁଥିବାରୁ ବିବାଦ ବଢ଼ିଥିଲା । ଏହି ଘଟଣା ରାପିଡୋ ଭଳି ଆପ୍-ଆଧାରିତ ବାଇକ୍ ଟ୍ୟାକ୍ସି ସେବାର ସୁରକ୍ଷା ଉପରେ ପ୍ରଶ୍ନ ଉଠାଇଛି । କାରଣ ଏହା ଏପରି ଏକ ସମୟରେ ଘଟିଛି ଯେତେବେଳେ କର୍ଣ୍ଣାଟକ ହାଇକୋର୍ଟଙ୍କ ନିର୍ଦ୍ଦେଶ ପରେ ଜୁନ୍ ୧୫ ତାରିଖରୁ ବେଙ୍ଗାଲୁରୁରେ ବାଇକ୍ ଟ୍ୟାକ୍ସି ସେବାକୁ ନିଷିଦ୍ଧ କରାଯାଇଛି। ରାପିଡୋ ଏହାର ପ୍ଲାଟଫର୍ମରେ ଏକ ବିବୃତ୍ତି ଜାରି କରି କହିଛି ଯେ, “କର୍ଣ୍ଣାଟକରେ ହାଇକୋର୍ଟଙ୍କ ସାମ୍ପ୍ରତିକ ନିର୍ଦ୍ଦେଶ ପାଳନ କରି ଜୁନ୍ ୧୬ ତାରିଖରୁ ଆମର ବାଇକ୍ ଟ୍ୟାକ୍ସି ସେବା ବନ୍ଦ ରହିବ।
