ନୂଆଦିଲ୍ଲୀ: ଗୌହାଟିରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ୧୦ ବର୍ଷର ବାଳକକୁ ହତ୍ୟା କରାଯାଇଛି ଏବଂ ତା’ର ମୃତଦେହକୁ ଏକ ସୁଟକେସରେ ଭର୍ତ୍ତି କରାଯାଇ ଏକ ବୁଦାରେ ଫିଙ୍ଗି ଦିଆଯାଇଛି। ଗୌହାଟି ପୋଲିସ ଡେପୁଟି କମିଶନର (ପୂର୍ବ) ମୃଣାଳ ଡେକା ପିଟିଆଇକୁ କହିଛନ୍ତି ଯେ, ପିଲାଟିର ମାଆ ଶନିବାର ପିଲାର ନିଖୋଜ ଅଭିଯୋଗ ଦାଖଲ କରିଥିଲେ, ଯେଉଁଥିରେ ସେ କହିଥିଲେ ଯେ, ତାଙ୍କ ପୁଅ ଟ୍ୟୁସନରୁ ଘରକୁ ଫେରି ନାହିଁ। “ଆମେ ତଦନ୍ତ ଆରମ୍ଭ କରିଥିଲୁ ଏବଂ ବଶିଷ୍ଠ ମନ୍ଦିର ନିକଟରେ ଏକ ବୁଦାରୁ ଏକ ସୁଟକେସ୍ ପାଇଲୁ।
ବାଳକଟିକୁ ହତ୍ୟା କରି ଲଗେଜ୍ ଭିତରେ ଭର୍ତ୍ତି କରି ସେଠାରେ ଫିଙ୍ଗି ଦିଆଯାଇଥିଲା,” ସେ କହିଛନ୍ତି। ଜେରା ସମୟରେ, ମାଆଙ୍କ ପ୍ରେମିକ ଅପରାଧ ସ୍ୱୀକାର କରିଥିଲା ଏବଂ ପୋଲିସକୁ ସୁଟକେସ୍ ଥିବା ସ୍ଥାନକୁ ନେଇଯାଇଥିଲା, ଡେକା କହିଛନ୍ତି। ସେ ଆହୁରି କହିଛନ୍ତି “ଆମେ ସେହି ବ୍ୟକ୍ତିଙ୍କୁ ଗିରଫ କରିଛୁ। ପୋଲିସ ତାଙ୍କ ମାଆଙ୍କୁ ମଧ୍ୟ ଅଟକ ରଖିଛି ଏବଂ ହତ୍ୟାରେ ତାଙ୍କର ସମ୍ଭାବ୍ୟ ଭୂମିକା ବିଷୟରେ ପଚରାଉଚରା କରିଛି”। ଡିସିପି କହିଛନ୍ତି ଯେ, ଫୋରେନସିକ୍ ଟିମ ଏବଂ ସିଆଇଡି ଅଧିକାରୀମାନେ ଘଟଣାସ୍ଥଳ ପରିଦର୍ଶନ କରି ପ୍ରମାଣ ସଂଗ୍ରହ କରିଛନ୍ତି। ସେ କହିଛନ୍ତି “ଆମେ ମୃତଦେହକୁ ପୋଷ୍ଟମର୍ଟମ ପାଇଁ ପଠାଇଛୁ, ଯାହା ସୋମବାର କରାଯିବ। ଅଧିକ ତଦନ୍ତ ଚାଲିଛି”।
