ନୂଆଦିଲ୍ଲୀ: ସୋମବାର ଦିନ ବଡ଼ ହ୍ରାସ ପରେ ମଙ୍ଗଳବାର ଭାରତୀୟ ଷ୍ଟକ୍ ବଜାରରେ ଏକ ବଡ ପରିବର୍ତ୍ତନ ଦେଖାଯାଇଛି । ସକାଳର କାରବାରରେ, BSE ସେନସେକ୍ସ ୮୦୦ ପଏଣ୍ଟରୁ ଅଧିକ ବୃଦ୍ଧି ପାଇଛି ଏବଂ ନିଫ୍ଟି ମଧ୍ୟ ୨୨,୪୦୦ ଅତିକ୍ରମ କରିଛି । ଏସୀୟ ବଜାରର ପୁନରୁଦ୍ଧାର ଏବଂ ଆମେରିକୀୟ ଫ୍ୟୁଚର୍ସରେ ଶକ୍ତି ଯୋଗୁଁ ବଜାରରେ ଏହି ବୃଦ୍ଧି ଘଟିଛି। ସକାଳ ୯:୦୯ ରେ, ସେନସେକ୍ସ ୮୭୫.୮୩ ପଏଣ୍ଟ ବୃଦ୍ଧି ପାଇ ୭୪,୦୧୩.୭୩ ରେ କାରବାର କରୁଥିଲା, ଯେତେବେଳେ ନିଫ୍ଟି ୨୮୫.୧୫ ପଏଣ୍ଟ ବୃଦ୍ଧି ପାଇ ୨୨,୪୪୬.୭୫ ରେ ପହଞ୍ଚିଥିଲା । ସକାଳ ୯:୨୧ ରେ , ସେନସେକ୍ସ ୧,୨୦୦.୭୦ ପଏଣ୍ଟ (୧.୬୪%) ର ଦୃଢ଼ ବୃଦ୍ଧି ସହିତ ୭୪,୩୩୮.୫୯ ରେ କାରବାର କରୁଥିଲା ଏବଂ ନିଫ୍ଟି ୩୭୭.୦୦ ପଏଣ୍ଟ (୧.୭୦%) ର ଚମତ୍କାର ବୃଦ୍ଧି ସହିତ ୨୨,୫୩୮.୬୦କୁ ଛୁଇଁଥିଲା ।
ସେହି ସମୟରେ, ଆଜି ଆଦାନୀ ଗ୍ରୁପର ସମସ୍ତ ସେୟାରରେ ବଡ଼ ବୃଦ୍ଧି ଘଟିଛି । ସମସ୍ତଙ୍କର ପ୍ରାରମ୍ଭିକ ବାଣିଜ୍ୟରେ ୩ ପ୍ରତିଶତ ପର୍ଯ୍ୟନ୍ତ ଲାଭ ହୋଇଛି । ସୋମବାର ପୂର୍ବରୁ ଘରୋଇ ସେୟାର ବଜାରରେ ଏକ ବଡ଼ ହ୍ରାସ ଦେଖାଯାଇଥିଲା। ବିଏସଇ ସେନସେକ୍ସ ୨,୨୨୬ ପଏଣ୍ଟ ହ୍ରାସ ପାଇ ୭୩,୧୩୭ରେ ଏବଂ ନିଫ୍ଟି ୭୪୩ ପଏଣ୍ଟ ହ୍ରାସ ପାଇ ୨୨,୧୬୧ରେ ବନ୍ଦ ହୋଇଥିଲା। ଏହା ୧୦ ମାସ ମଧ୍ୟରେ ବଜାରରେ ସବୁଠାରୁ ବଡ଼ ହ୍ରାସ ଥିଲା। ଆମେରିକାର ନୂତନ ଶୁଳ୍କ ଏବଂ ଚୀନର ପ୍ରତିକ୍ରିୟା ପରେ ବାଣିଜ୍ୟ ଯୁଦ୍ଧ ଏବଂ ବିଶ୍ୱ ମାନ୍ଦାବସ୍ଥାର ଭୟ ବୃଦ୍ଧି ପାଇଛି। ଏହାର ସିଧାସଳଖ ପ୍ରଭାବ ଭାରତ ସମେତ ସାରା ବିଶ୍ୱର ବଜାର ଉପରେ ପଡ଼ିଥିଲା।
ସୋମବାରର ହ୍ରାସ ଯୋଗୁଁ ନିବେଶକମାନେ ପ୍ରାୟ ୧୪ ଲକ୍ଷ କୋଟି ଟଙ୍କା ହରାଇଛନ୍ତି। କାରବାର ସମୟରେ ଗୋଟିଏ ସମୟରେ କ୍ଷତି ୨୦ ଲକ୍ଷ କୋଟି ଟଙ୍କାରେ ପହଞ୍ଚିଥିଲା, ଯଦିଓ ଶେଷରେ କିଛି ପରିମାଣରେ ପୁନରୁଦ୍ଧାର ହୋଇଥିଲା। BSEରେ ତାଲିକାଭୁକ୍ତ କମ୍ପାନୀଗୁଡ଼ିକର ମୋଟ ବଜାର ପୁଞ୍ଜି ୧୪ ଲକ୍ଷ କୋଟି ଟଙ୍କା ହ୍ରାସ ପାଇ ୩୮୯ ଲକ୍ଷ କୋଟି ଟଙ୍କା ହୋଇଛି ।
ଏସୀୟ ବଜାରରୁ ମଙ୍ଗଳବାର ଦିନ ଆଶ୍ୱସ୍ତି ମିଳିଛି । ଜାପାନ ଏବଂ ଅଷ୍ଟ୍ରେଲିଆର ଷ୍ଟକ୍ ବଜାରରେ ଭଲ ପୁନରୁଦ୍ଧାର ଦେଖାଯାଇଥିଲା। ଜାପାନର ନିକେଇ ସୂଚକାଙ୍କ ପ୍ରାୟ ୬% ବୃଦ୍ଧି ପାଇଥିଲା ବେଳେ ଟପିକ୍ସ ସୂଚକାଙ୍କ ମଧ୍ୟ ୬% ରୁ ଅଧିକ ବୃଦ୍ଧି ପାଇଛି। ଦକ୍ଷିଣ କୋରିଆର କୋସ୍ପି ମଧ୍ୟ ପ୍ରାୟ ୨% ବୃଦ୍ଧି ପାଇ କାରବାର କରୁଥିଲା। ଯଦିଓ ଆଜି ବଜାର ନିଶ୍ଚିତ ଭାବରେ ଆଶ୍ୱସ୍ତି ମିଳିଛି , ହେଲେ ବିଶ୍ୱସ୍ତରୀୟ ଭାବନା ଏବେ ବି ଦୁର୍ବଳ ରହିଛି । ଆମେରିକା ଏବଂ ଚୀନ୍ମ ଧ୍ୟରେ ପାରସ୍ପରିକ ଶୁଳ୍କ, ଅର୍ଥାତ୍ ପରସ୍ପର ଉପରେ ଲାଗୁ ହୋଇଥିବା ପ୍ରତି ଶୁଳ୍କ, ବାଣିଜ୍ୟ ଯୁଦ୍ଧର ଭୟକୁ ବୃଦ୍ଧି କରିଛି। ଯଦି ପରିସ୍ଥିତି ଶୀଘ୍ର ସୁଧୁରେ ନାହିଁ, ତେବେ ବଜାରରେ ପୁଣି ଥରେ ହ୍ରାସ ଘଟିପାରେ।
