ଆସୁଛି ଦୀପାବଳି, ରାଉରକେଲାର ଗଳିକନ୍ଦିରେ ବାଣର ପସରା

ରାଉରକେଲା: ଆଲୋକର ପର୍ବ ଦୀପାବଳିକୁ ଆଉ କିଛି ଦିନ ବାକି ଥିବାବେଳେ ଇସ୍ପାତ ସହର ରାଉରକେଲାରେ ପାର୍ବଣର ମାହୋଲ ଜମିବାକୁ ଲାଗିଲାଣି। ସହରର ବିଭିନ୍ନ ଅଞ୍ଚଳରେ ବାଣ ଦୋକାନ ଖୋଲିବା ସହ ରଙ୍ଗବେରଙ୍ଗର ଆତସବାଜିର ପସରା ମେଲିଛି। ଛୋଟଠାରୁ ବଡ଼ ପର୍ଯ୍ୟନ୍ତ ବିଭିନ୍ନ ପ୍ରକାରର ବାଣ ଓ ଆତସବାଜି ଗ୍ରାହକଙ୍କୁ ଆକର୍ଷିତ କରୁଛି। ସହରର ବିଭିନ୍ନ ଛକ, ବଜାର ଓ ଗଳିକନ୍ଦିରେ ଦୀପାବଳି ପାଇଁ ବାଣ ବିକ୍ରିର ପ୍ରସ୍ତୁତି ଜୋରଦାର ହୋଇଛି। ଦୋକାନଗୁଡ଼ିକରେ ଫୁଲଝରି, ଚକ୍ରି, ରକେଟ୍, ରଙ୍ଗୀନ ଫୁଆରା ଓ ବିଭିନ୍ନ ପ୍ରକାରର ଆତସବାଜି ସଜାଇ ରଖାଯାଇଛି। ଦୀପାବଳି ଯେତେ ପାଖେଇ ଆସୁଛି, ବାଣ ବଜାରରେ ସେତେ ଚଳଚଞ୍ଚଳତା ବଢ଼ିବାର ଆଶା ରହିଛି। ପର୍ବକୁ ନେଇ ଛୋଟ ପିଲାଙ୍କଠାରୁ ଆରମ୍ଭ କରି ବଡ଼ମାନଙ୍କ ମଧ୍ୟରେ ଉତ୍ସାହ ଦେଖାଦେଉଛି। ତେବେ ବାଣ କିଣିବା ଓ ଫୁଟାଇବା ସମୟରେ ସୁରକ୍ଷା ନିୟମ ମାନିବା, ଅନୁମୋଦିତ ଦୋକାନରୁ ବାଣ କିଣିବା ଏବଂ ପରିବେଶ ଅନୁକୂଳ ଆତସବାଜିକୁ ପ୍ରାଥମିକତା ଦେବାକୁ ସଚେତନ ନାଗରିକମାନେ ମତ ଦେଉଛନ୍ତି।