ଜୈନ ମୁନି ଶାନ୍ତିସାଗରଙ୍କୁ ୧୦ବର୍ଷ ଜେଲ୍‌

ନୂଆଦିଲ୍ଲୀ: ୧୯ ବର୍ଷୀୟା ଯୁବତୀଙ୍କୁ ଦୁଷ୍କର୍ମ କରିଥିବା ଅଭିଯୋଗରେ କୋର୍ଟ ଦିଗମ୍ବର ଜୈନ ମୁନି ଶାନ୍ତିସାଗର ମହାରାଜଙ୍କୁ ୧୦ ବର୍ଷ ଜେଲଦଣ୍ଡ ଶୁଣାଇଛନ୍ତି। ସୁରଟ ସେସନ୍ସ କୋର୍ଟ ଶୁକ୍ରବାର ଶାନ୍ତିସାଗର ମହାରାଜଙ୍କୁ ବଳାତ୍କାର ମାମଲାରେ ଦୋଷୀ ସାବ୍ୟସ୍ତ କରିଥିବା ବେଳେ ଶନିବାର ଏହି ମାମଲାରେ ଦଣ୍ଡ ଘୋଷଣା କରାଯାଇଛି। ୨୦୧୭ରେ, ଶାନ୍ତିସାଗର ଯେତେବେଳେ ସୁରଟର ନାନପୁରରେ ଅବସ୍ଥିତ ଉପାଶ୍ରୟରେ ବାସ କରୁଥିଲେ ସେତେବେଳେ ଜଣେ ୧୯ ବର୍ଷୀୟ ଶ୍ରାବିକା (ମହିଳା ଜୈନ ଭକ୍ତ) ତାଙ୍କ ବିରୋଧରେ ଦୁଷ୍କର୍ମ ଅଭିଯୋଗ କରିଥିଲେ। ଶାନ୍ତିସାଗର ସେମାନଙ୍କୁ ପୂଜା ବିଧି ବାହାନାରେ ସୁରତ ଆଶ୍ରମକୁ ଡକାଇଥିଲେ। ଏହି ପରିବାର ରାତିରେ ଆଶ୍ରୟସ୍ଥଳରେ ରହିଥିଲେ। ଏହି ସମୟରେ, ରାତି ପ୍ରାୟ ସାଢ଼େ ୯ଟାରେ, ଶାନ୍ତିସାଗର ପୂଜା ବାହାନାରେ ଝିଅଟିକୁ ତାଙ୍କ କୋଠରୀକୁ ଡାକି ପରିବାର ସଦସ୍ୟଙ୍କୁ କୋଠରୀ ବାହାରେ ଠିଆ ହେବାକୁ କହିଥିଲେ। ଏହି ସମୟରେ ପୂଜା ବାହାନାରେ ଯୁବତୀଙ୍କୁ ଧମକ ଦେଇ ସେ ଦୁଷ୍କର୍ମ କରିଥିଲେ। ପରିବାର ପ୍ରଥମେ ନିଜର ସାମାଜିକ ସମ୍ମାନ ହରାଇବା ଏଡାଇବା ପାଇଁ ଚୁପ୍ ରହିଥିଲେ, କିନ୍ତୁ ପରେ, ଏପରି ଘଟଣା ଅନ୍ୟ ଝିଅମାନଙ୍କ ସହିତ ନ ଘଟେ ବୋଲି ଭାବି ପରିବାର ଘଟଣାର ୧୩ ଦିନ ପରେ ସୁରଟର ଆଥୱାଲାଇନ୍ସ ପୋଲିସ ଷ୍ଟେସନରେ ଅଭିଯୋଗ କରିଥିଲେ। ପୋଲିସ ଏକ ମାମଲା ରୁଜୁ କରି ଜୈନ ମୁନି ଶାନ୍ତିସାଗରଙ୍କୁ ଗିରଫ କରିଥିଲା।