ନୂଆଦିଲ୍ଲୀ: ଗୁଜୁରାଟର ଅହମ୍ମଦାବାଦର ଚାନ୍ଦଲୋଡିଆରେ ରହୁଥିବା ଜଣେ ୬୫ ବର୍ଷୀୟା ମହିଳା ନିଜ ୩୭ ବର୍ଷୀୟ ପୁଅ ବିରୁଦ୍ଧରେ ଏଫଆଇଆର ଦାୟର କରିଛନ୍ତି । ମହିଳା ଜଣକ ଅଭିଯୋଗ କରିଛନ୍ତି ଯେ ତାଙ୍କ ପୁଅ ତାଙ୍କୁ ଦୁର୍ବ୍ୟବହାର କରିବା ସହିତ ନିର୍ଯାତନା ଦେଉଛନ୍ତି। ବନ୍ଦ କୋଠରୀରେ ରଖିବା ସହିତ ସର୍ବଦା ମାଡ଼ ମାରୁଥିବା ନେଇ ସେ ଅଭିଯୋଗ କରିଛନ୍ତି । ଅହମ୍ମଦାବାଦର ଘାଟଲୋଡିଆ ପୋଲିସ ଷ୍ଟେସନରେ ଦାଖଲ ହୋଇଥିବା ଅଭିଯୋଗ ଅନୁଯାୟୀ, ବୃଦ୍ଧା ମହିଳା ଗାନ୍ଧୀନଗର ସ୍ଥିତ ସଚିବାଳୟରେ ପେନସନ ପେମେଣ୍ଟ ବିଭାଗର ନିର୍ଦ୍ଦେଶକରେ ଜଣେ ବରିଷ୍ଠ କ୍ଲର୍କ ଭାବରେ କାର୍ଯ୍ୟ କରୁଥିଲେ । ତେବେ କିଛି କାରଣ ହେତୁ ସେ ୨୦୦୮ ମସିହାରେ ଭିଆରଏସ ନେଇଥିଲେ ।
ବୃଦ୍ଧ ମହିଳାଙ୍କ ସ୍ୱାମୀ ଅହମ୍ମଦାବାଦର ମିର୍ଜାପୁର କୋର୍ଟରେ ଷ୍ଟେନୋ ଭାବରେ କାମ କରୁଥିଲେ । ତେବେ ବୃଦ୍ଧ ମହିଳାଜଣକ ତାଙ୍କ ପୁତ୍ର ସହିତ ରହି ଆସୁଥିଲେ । ଯେତେବେଳେ ପୁଅ ତାଙ୍କ ବୃଦ୍ଧା ମାଆଙ୍କୁ ବହୁତ ପିଟିଲା, ସମାଜର ଲୋକମାନେ ତାଙ୍କ ଘରେ ଏକାଠି ହେଲେ। ସୁଧୀର ତାଙ୍କ ବୃଦ୍ଧା ମାଆଙ୍କୁ ଧମକ ଦେଇଥିଲେ ଯେ ଯଦି ସେ ସମାଜ ସଦସ୍ୟମାନଙ୍କୁ କିଛି କୁହନ୍ତି, ତେବେ ସେ ତାଙ୍କୁ ହତ୍ୟା କରିବେ ଏବଂ ତାଙ୍କ ମୃତଦେହକୁ ଏକ ବ୍ୟାଗରେ ରଖି କୌଣସି ସ୍ଥାନରେ ଫିଙ୍ଗି ଦେବେ ବୋଲି କହିଥିଲେ । ପଡୋଶୀଙ୍କ ସହାୟତାରେ ବୃଦ୍ଧା ଥାନାରେ ଏତଲା ଦେବା ପରେ ତଦନ୍ତ ଆରମ୍ଭ କରିଛି ପୋଲିସ । କୁଳଙ୍ଗାର ପୁଅକୁ ଗିରଫ କରାଯାଇଛି ।
