ଲକ୍ଷ୍ନୌ: ୟୁପିର ସମ୍ଭଲରେ ଜାମା ମସଜିଦରେ ସର୍ଭେ ବେଳେ ବ୍ୟାପକ ହିଂସା ଘଟିଛି । ଏଥିରେ ୩ ଜଣଙ୍କ ମୃତ୍ୟୁ ହୋଇଛି । ଶନିବାର ସକାଳେ କୋର୍ଟଙ୍କ ନିର୍ଦ୍ଦେଶରେ ଟିମ୍ ସର୍ଭେ କରିବାକୁ ଯାଇଥିଲା । କିନ୍ତୁ ସ୍ଥାନୀୟ ଲୋକମାନେ ପଥର ଫିଙ୍ଗିବା ଆରମ୍ଭ କରିବାରୁ ପୋଲିସ ଲୁହବୁହା ଗ୍ୟାସ୍ ପ୍ରୟୋଗ କରିଥିଲା । ବିକ୍ଷୋଭକାରୀମାନେ ଘଟଣାସ୍ଥଳରେ ବ୍ୟାପକ ପୋଡ଼ାଜଳା କରିଥିଲେ । ଏଥିରେ ଏସପିଙ୍କ ସମେତ ବହୁ ପୋଲିସ କର୍ମଚାରୀ ଆହତ ହୋଇଛନ୍ତି । ଘଟଣା ସମ୍ପର୍କରେ ଏସପି କୃଷ୍ଣ କୁମାର କହିଛନ୍ତି, ‘ବିକ୍ଷୋଭକାରୀମାନେ ପୋଲିସ ଗାଡ଼ିରେ ନିଆଁ ଲଗାଇ ପୋଲିସକୁ ଟାର୍ଗେଟ କରିବାକୁ ଚେଷ୍ଟା କରିଛନ୍ତି । ସେମାନଙ୍କ ବିରୋଧରେ ଏନ୍ଏସ୍ଏ ଅଧୀନରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ଡ୍ରୋନ୍ ଦ୍ୱାରା ଭିଡିଓଗ୍ରାଫି କରାଯାଇଛି । ସିସିଟିଭି କ୍ୟାମେରା ସାହାଯ୍ୟରେ ଲୋକଙ୍କୁ ଚିହ୍ନଟ କରାଯାଇ କାର୍ଯ୍ୟାନୁଷ୍ଠାନ ନିଆଯିବ’ । କୋର୍ଟଙ୍କ ନିର୍ଦ୍ଦେଶରେ ଚାଲିଥିବା ସର୍ଭେ ବେଳେ ପ୍ରବଳ ଉତ୍ତେଜନା ଦେଖାଦେଇଥିଲା । ସ୍ଥିତି ନିୟନ୍ତ୍ରଣ ପାଇଁ ଘଟଣାସ୍ଥଳକୁ ମୁରାଦାବାଦ ଡିଆଇଜି ମୁନିରାଜଙ୍କ ସହ ବରେଲି ଜୋନର ଏଡିଜି ରମିତ ଶର୍ମାଙ୍କୁ ପଠାଯାଇଛି । ଏହା ବ୍ୟତୀତ ସମଗ୍ର ଅଞ୍ଚଳରେ ଚଇଉର ତିନୋଟି କମ୍ପାନୀ ମୁତୟନ କରାଯାଇଛି । ଶନିବାର ସକାଳ ୭ଟା ୩୦ରୁ ୧୦ଟା ପର୍ଯ୍ୟନ୍ତ ମସଜିଦରେ ସର୍ଭେ କରାଯାଇଥିଲା । ସମଗ୍ର ସର୍ବେକ୍ଷଣର ଭିଡିଓଗ୍ରାଫି ଏବଂ ଫଟୋଗ୍ରାଫି କରାଯାଇଛି । ନଭେମ୍ବର ୨୯ରେ ଆଡଭୋକେଟ୍ କମିଶନର ଏହି ମାମଲାରେ ନିଜର ରିପୋର୍ଟ ପ୍ରଦାନ କରିବେ ।
