ମୁମ୍ବାଇ: କଥାରେ ଅଛି ଗେଲ ଖେଳୁଖେଳୁ ତେଲ ବାହାରି ଯାଇଥାଏ । ଏହାର ଅନେକ ଉଦାହରଣ ବି ଆମେ ଆମ ଆଖି ସାମ୍ନାରେ ଦେଖିବାକୁ ପାଇଛେ । ସାଙ୍ଗମାନଙ୍କ ମଧ୍ୟରେ ହସ ଏବଂ ଥଟ୍ଟା ଏକ ସାଧାରଣ କଥା । କିନ୍ତୁ ବେଳେବେଳେ କିଛି ଥଟ୍ଟା ଏପରି ହୁଏ ଯେ ଏହାର ପରିଣତି ସାଂଘାତିକ ହୋଇଯାଇଥାଏ । ନିକଟରେ ସାଙ୍ଗମାନେ ପରସ୍ପର ସହିତ ଥଟ୍ଟାମଜା କରୁଥିବା ବେଳେ ଜଣେ ମହିଳା କୋଠାର ତଳକୁ ଖସି ପଡ଼ିଥିଲେ । ଦୁଃଖର ବିଷୟ ଏହି ଦୁର୍ଘଟଣାରେ ତାଙ୍କର ମୃତ୍ୟୁ ହୋଇଯାଇଛି । ମହାରାଷ୍ଟ୍ରର ଡୋମ୍ବିଭଭିସ୍ଥିତ କଲ୍ୟାଣ ଶେଲ ରୋଡରେ ଥିବା ବିକାଶ ନାକା ଅଞ୍ଚଳରେ ଏହି ଦୁଃଖଦ ଘଟଣା ଘଟିଛି । ଯେଉଁଠାରେ ଗ୍ଲୋବ ଷ୍ଟେଟ ବିଲଡିଂରେ ଜଣେ ମହିଳା କୋଠାର ତୃତୀୟ ମହଲାରୁ ଖସିପଡିଥିଲେ । ମହିଳାଙ୍କ ନାମ ନାଗିନା ଦେବୀ ମଞ୍ଜୀରାମ ବୋଲି ଜଣାପଡ଼ିଛି ।
ସେ ଜଣେ ସଫେଇ କର୍ମଚାରୀ ଭାବେ କାମ କରୁଥିବା ବେଳେ ଘରେ ତାଙ୍କର ୨ସନ୍ତାନ ଅଛନ୍ତି । ନାଗିନା ଦେବୀ ମଞ୍ଜୀରାମ ଏକ ସ୍ଥାନରେ ଆସି ବସିଥିଲେ । ଏହି ସମୟରେ ନାଗିନା ଦେବୀଙ୍କର ଜଣେ ସାଙ୍ଗଆସି ଥଟ୍ଟାମଜା କରି ତାଙ୍କ କାନ୍ଧରେ ହାତ ପକାଇ ଦେଇଥିଲେ । ଏହି ଘଟଣାରେ ନାଗିନା ନିଜ ଉପରେ ଭାରସାମ୍ୟ ରକ୍ଷା କରି ପାରି ନଥିଲେ । ଫଳରେ ସେ ତୃତୀୟ ମହଲା କୋଠାରୁ ତଳକୁ ପଡ଼ିଯାଇଥିଲେ । ସଙ୍ଗେସଙ୍ଗେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲେ ହେଁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହି ସମୟରେ ନାଗିନାଙ୍କ ସାଙ୍ଗ ଅଘଟଣାରୁ ଅଳ୍ପକେ ରକ୍ଷା ପାଇ ଯାଇଥିଲେ । ମାନପଡ଼ା ପୁଲିସ ଏହି ଘଟଣାର ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।
