କଣାସ: କଣାସ ବ୍ଲକ ଅନ୍ତର୍ଗତ ଦେଇପୁର ଗ୍ରାମପଞ୍ଚାୟତର ବିରତୋଇ ଗ୍ରାମରେ ମହୁମାଛି ଆକ୍ରମଣରେ ବାପ ପଞ୍ଚୁ ସାହୁ(୮୨) ମୃତ୍ୟୁବରଣ କରିଥିବା ବେଳେ ପୁତ୍ର ଚନ୍ଦ୍ରଶେଖର ସାହୁ(୫୩) ଗୁରୁତର ହୋଇ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିବା ଜଣାପଡ଼ିଛି । ବାପ ଓ ପୁଅ ଦୁହେଁ ନିକଟସ୍ଥ ବଗିଚାକୁ ଜାଳେଣିକାଠ ସଂଗ୍ରହ କରିବାକୁ ଯାଇଥିବା ବେଳେ ବାଘୁଆ ମହୁମାଛି ଆକ୍ରମଣ କରିଥିଲେ । ବାପ ପୁଅଙ୍କୁ ଗୁରୁତର ଆହତ ଅବସ୍ଥାରେ ଭୁବନେଶ୍ୱର ଏମ୍ସକୁ ନିଆଯାଇଥିଲା ।
ଚିକିତ୍ସା ପରେ ସୁସ୍ଥ ହେବାରୁ ୧୬ତାରିଖରେ ବାପ ପୁଅ ଘରକୁ ଫେରିଆସିଥିଲେ । ଗତକାଲି ରାତିରେ ପିତା ପଞ୍ଚୁ ସାହୁଙ୍କ ରକ୍ତବାନ୍ତି ହେବାରୁ ପୁନଶ୍ଚ ଚିକିତ୍ସା ପାଇଁ ଭୁବନେଶ୍ୱର ନୀଳାଚଳ ହସ୍ପିଟାଲକୁ ନିଆଯାଇଥିଲା । ସେଠାରେ ଚିକିତ୍ସା ସମୟରେ ମୃତ୍ୟୁ ହୋଇଯାଇଥିବା ଜଣାପଡ଼ିଛି । ପଞ୍ଚୁ ସାହୁ ଜଣେ ଭୂମିହୀନ ବ୍ୟକ୍ତି ହୋଇଥିବାରୁ ତାଙ୍କ ପରିବାରକୁ ସରକାରୀ ସହାୟତା ଯୋଗାଦେବାକୁ ଗ୍ରାମବାସୀ ଦାବିକରିଛନ୍ତି ।
