ଭୁବନେଶ୍ୱର: ମଦୁଆଙ୍କ ବିରୁଦ୍ଧରେ କଠୋର ହେଲା କମିଶନରେଟ ପୁଲିସ । ଗତକାଲି ରାତିରେ ମଦ୍ୟପାନ କରି ଗାଡି ଚଳାଉଥିବା ୪ ଜଣଙ୍କୁ ଗିରଫ କରିଛି ଲକ୍ଷ୍ମୀସାଗର ଥାନା ପୁଲିସ । ଗିରଫମାନେ ହେଲେ ବାଲିପାଟଣା ଅଞ୍ଚଳର ମଦନ କୁମାର ସାହୁ(୩୦), ଏୟେରଫିଲ୍ଟ ଥାନା ଅଞ୍ଚଳର ଅମୀତ କୁମାର ମହାନ୍ତି(୩୯), ପଶ୍ଚିମବଙ୍ଗର ତାପଶ ପ୍ରମାଣିକ(୨୪) ଏବଂ କଟକ ମାଲ ଗୋଦାମ ଥାନା ଅଞ୍ଚଳର ଶୁଭମ ଗୁପ୍ତା(୨୬) । ସୂଚନାଯୋଗ୍ୟ ଯେ, ଗତ କାଲି ତାରିରେ ଲକ୍ଷ୍ମୀସାଗର ଥାନାର ଚାରୋଟି ପୁଲିସ ଟିମ ନିକଟସ୍ଥ ଗୋଲେଇ ଛକ ନିକଟରେ ମୋଟର ଯାନ ଯାଞ୍ଚ ଏବଂ ମଦ୍ୟପାନ କରି ଗାଡି ଚାଳନା କରିବା ବିରୁଦ୍ଧରେ ସ୍ୱତନ୍ତ୍ର ଏନଫୋର୍ସମେଣ୍ଟ ଡ୍ରାଇଭ କରୁଥିଲେ ।
ସେହି ସମୟରେ ସମୟରେ ଗିରଫ ବ୍ୟକ୍ତିମାନେ ଦ୍ରୁତ ବେଗରେ ବେପରୁଆ ଭାବରେ ଗାଡି ଚାଳନା କରୁଥିବାର ପୁଲିସ ଟିମ ଦେଖିଥିଲେ । ଅଭିଯୁକ୍ତ ମାନଙ୍କର ବେପରୁଆ ଗାଡି ଚାଳନାରେ ସାଧାରଣ ଲୋକ ମାନଙ୍କର ଧନ ଜୀବନ କ୍ଷୟକ୍ଷତି ହେବାର ଆଶଙ୍କା ହେତୁ ପୁଲିସ ଟିମ ସେମାନଙ୍କୁ ଘଟଣା ସ୍ଥଳରେ ଅଟକାଇଥିଲେ । ସେମାନଙ୍କର ନିଶ୍ୱାସ ବିଶ୍ଳେଷଣକାରୀ ଜନ୍ତ୍ରରେ ଯାଞ୍ଚ କରିବା ସମୟରେ ସେମାନେ ଅତ୍ୟଧିକ ମାତ୍ରାରେ ମଦ୍ୟପାନ କରି ଗାଡି ଚାଳନା କରୁଥିବାର ଜାଣିବାକୁ ପାଇଥିଲେ ।
ଏନେଇ ପୁଲିସ ଟିମ ସମସ୍ତଙ୍କୁ ଗିରଫ କରିବା ସହ ସେମାନଙ୍କର ହେପାଜତରୁ ୪ଟି କାର ଜବତ କରି ଥାନାକୁ ଆଣିଥିଲେ । ପଚରା ଉଚରା ବେଳେ ସେମାନେ ସେମାନଙ୍କର ଅପରାଧ ସ୍ୱୀକାର କରିଥିଲେ । ଯାହା ଦ୍ୱାରା ସେମାନଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଛନ୍ତି ।
