ରାଞ୍ଚି : ମଧ୍ୟପ୍ରଦେଶର ସିନ୍ଧି ଜିଲ୍ଲାରେ ପରିସ୍ରା କାଣ୍ଡ ଭଳି ଅମାନୁଷିକ ତଥା ଘୃଣ୍ୟ କାର୍ଯ୍ୟର ମାମଲା ଏପର୍ଯ୍ୟନ୍ତ ଶାନ୍ତ ହୋଇନଥିବା ବେଳେ ଝାଡଖଣ୍ଡରେ ଏଭଳି ଏକ ମାମଲା ସାମନାକୁ ଆସଛି । ଏଠାରେ ଜଣେ ସ୍ଥାନୀୟ ନେତା ପଞ୍ଚାୟତ ଡକାଇ ଝିଅଙ୍କୁ ଅସଦାଚରଣ କରୁଥିବା ଅଭିଯୁକ୍ତଙ୍କୁ ତାଲିବାନ ଷ୍ଟାଇଲରେ ଦେଇଛନ୍ତି ଦଣ୍ଡ । ସମସ୍ତଙ୍କ ସାମ୍ନାରେ ପୂର୍ବତନ ବିଧାୟକ କେବଳ ଯୁବକ ଜଣକୁ ଉଠ ବସ୍ କରିଥିଲେ ତାହା ନୁହେଁ,ବରଂ ତାଙ୍କୁ ଛେପ ପକାଇ ଚାଟିବାକୁ ମଧ୍ୟ ବାଧ୍ୟ କରିଥିଲେ ।
ଏହି ଘଟଣା ବେଳେ ଚାରିପଟେ ଲୋକମାନେ ଠିଆ ହୋଇଥିବା ବେଳେ ଭିଡିଓ ପ୍ରସ୍ତୁତ କରୁଥିଲେ । ଏହି ଏହି ସମୟର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ସୂଚନା ଅନୁସାରେ, ଏହି ମାମଲା ଝାଡଖଣ୍ଡର ଡୁମକା ଜିଲ୍ଲାର ଜରମୁଣ୍ଡି ବିଧାନସଭାର ସାଧୁଡିହ ଗ୍ରାମର । ଏଠାରେ ଗ୍ରାମବାସୀ ଉକ୍ତ ଅଞ୍ଚଳର ପୂର୍ବତନ ବିଧାୟକ ଦେବେନ୍ଦ୍ର କୁନୱାରଙ୍କ ନିକଟରେ ଅଭିଯୋଗ କରିଥିଲେ । ଗାଁ ଲୋକମାନେ ଅଭିଯୋଗ କରିଥିଲେ ସେ ଗାଁ ପୋଖରୀକୁ ଗାଧୋଇବାକୁ ଯାଉଥିବା ମହିଳା ଓ ଝିଅଙ୍କୁ ଅସଦାଚରଣ କରୁଥିଲା । କେବଳ ଏତିକି ନୁହେଁ ଯୁବକ ଜଣକ ସେମାନଙ୍କର ଅଶ୍ଳୀଳ ଫଟୋ ମଧ୍ୟ ଉଠାଉଥିଲା ।
ଏହି ଅଭିଯୋଗ ପାଇବା ପରେ ପୂର୍ବତନ ବିଧାୟକ ପଞ୍ଚାୟତ ଡାକି ଯୁବକଙ୍କୁ ଦଣ୍ଡ ଦେଇଥିଲେ । ରବିବାର ଯେତେବେଳେ ଅଭିଯୁକ୍ତ ଯୁବକଙ୍କୁ ଡକାଯାଇ ପଚରାଉଚରା କରାଯାଉଥିଲା ସେତେବେଳେ ପୂର୍ବତନ ବିଧାୟକ ଦେବେନ୍ଦ୍ର କୁନୱାର ଖୁବ୍ ରାଗି ଯାଇଥିଲେ । ସେ ପ୍ରଥମେ ତୌଫିକ୍ ଅନସାରୀ ନାମକ ଅଭିଯୁକ୍ତ ଯୁବକକୁ ଉଠବସ୍ କରାଇଥିଲେ । ଏତିକିରେ ସେ ସନ୍ତୁଷ୍ଟ ନଥିଲେ, ତେଣୁ ସେ ଯୁବକଙ୍କୁ ସଭା ମଝିରେ ଗୋଇଠା ମାରିଥିଲେ । ଏହାପରେ ତୌଫିକକୁ ଛେପ ପକାଇ ପୁଣି ଚାଟିବାକୁ କହିଥିଲେ । ସେଠାରେ ଥିବା ଲୋକମାନେ ଏହି ଘଟଣାର ଭିଡିଓ ତିଆରି କରି ସୋସିଆଲ ମିଡିଆରେ ସେୟାର କରିଦେଇଥିଲେ । ଉଲ୍ଲେଖନୀୟ ଯେ, ପୂର୍ବତନ ବିଧାୟକ ଜଣକ ଜରମୁଣ୍ଡିରୁ ୨ଥର ବିଧାୟକ ହୋଇଥିଲା । ପ୍ରଥମେ ଝାଡଖଣ୍ଡ ମୁକ୍ତି ମୋର୍ଚ୍ଚା ଓ ପରେ ବିଜେପିରୁ ଟିକେଟ ନେଇ ବିଧାୟକ ହୋଇଥିଲେ ।