ଘର ଭିତରୁ ନବବିବାହିତ ଦମ୍ପତିଙ୍କର କ୍ଷତବିକ୍ଷତ ମୃତଦେହ ଉଦ୍ଧାର

ରାୟପୁର: ବିବାହ ଭୋଜି ପୂର୍ବରୁ ଛତିଶଗଡ଼ର ରାଜଧାନୀ ରାୟପୁରସ୍ଥିତ ଗୋଟାଏ ଘର ପ୍ରକୋଷ୍ଠରୁ ନବବିବାହିତ ଦମ୍ପତିଙ୍କର କ୍ଷତବିକ୍ଷତ ମୃତଦେହ ଉଦ୍ଧାର କରାଯାଇଥିବା କଥା ପୋଲିସ କହିଛି । ଦୁହିଁଙ୍କ ମଧ୍ୟରେ ଝଗଡ଼ା ହେବାରୁ ସ୍ୱାମୀ ସ୍ତ୍ରୀଙ୍କୁ ଛୁରି ଭୁସି ହତ୍ୟା କରିବା ପରେ ଆତ୍ମହତ୍ୟା କରିଛନ୍ତି ବୋଲି ପୋଲିସ ସନ୍ଦେହ କରୁଛି । ଘଟଣାଟି ମଙ୍ଗଳବାର ଘଟିଛି ବୋଲି ତିକ୍ରାପଡ଼ା ଥାନା ଅନ୍ତର୍ଗତ ବ୍ରଜନଗରରେ ଘଟିଥିବା କଥା ଜଣେ ସରକାରୀ ଅଧିକାରୀ କହିଛନ୍ତି । ସେ କହିଛନ୍ତି, ରବିବାର ୨୪ ବର୍ଷିୟ ଆସ୍‌ଲମ୍ ଓ ୨୨ ବର୍ଷୀୟ କଖଶା ବାନୋଙ୍କର ବିବାହ ହୋଇଥିଲା ଏବଂ ମଙ୍ଗଳବାର ସନ୍ଧ୍ୟାରେ ଥିଲା ସେମାନଙ୍କର ବିବାହ ଭୋଜି । ସେମାନେ ଭୋଜି ସମାବେଶକୁ ଆସିବା ପାଇଁ ଘରେ ସଜବାଜ ହେଉଥିବା ବେଳେ ବରର ମାଆ କନ୍ୟାର ଚିତ୍କାର ଶୁଣି ଧାଇଁ ଯାଇଥିଲେ । ଭିତରୁ କବାଟ ବନ୍ଦ ଥିଲା । ଯେତେ ଡାକିଲେ ବି ସେମାନେ ଜବାବ ନ ଦେବାରୁ ପରିବାର ଲୋକେ ଝରକାବାଟେ ଉଣ୍ଡି ଦେଖିଲେ ଯେ, ଦୁହେଁ ରକ୍ତ ଜୁଡୁବୁଡୁ ଅବସ୍ଥାରେ ଅଚେତ ହୋଇପଡ଼ିଛନ୍ତି । ତୁରନ୍ତ ସେମାନେ ଖବର ଦେବା ପରେ ପୋଲିସ କବାଟ ଭାଙ୍ଗି ନବଦମ୍ପତିଙ୍କ ଶବ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ଘଟଣାସ୍ଥଳରୁ ଗୋଟାଏ ଛୁରି ବି ଉଦ୍ଧାର କରାଯାଇଛି । ଘଟଣାର ତଦନ୍ତ ଚାଲିଛି ବୋଲି ପୋଲିସ କହିଛି ।